[有沙入眼]是咁的，我嘅職業係幫想自殺嘅人寫遺書: 208.清明節

今日清明節，miki仍然未搵我，不過都好嘅

始終今日嘅我最需要私人空間

比miki知我去拜山實問東問西

我檢查下自己個袋，濕紙巾，金筆

落街買埋花同蠟燭，我就向墳場出發





拜祭比我害死嗰三個人

仆街，真係好多人

我向來唔中意多人嘅地方，不過都係要黎

當我去到荔枝角，順住路行去墳場，穿過隧道之後，竟然比我見倒阿文一家，阿文男朋友都喺度

世界真細小小小，其實香港都真係幾細





「你地行先。」阿文駛開左父母同仔仔

你咁搞法好似我地有咩不可告人嘅關係咁

「對唔住⋯⋯上次打你⋯⋯」

「你仲好意思講，係咪比我打翻一巴？」

阿文點點頭，合埋眼：「你打啦。」





有仇報唔通唔報咩

我伸出手

「好痛！」用手指彈左佢額頭一下