[有沙入眼]是咁的，我嘅職業係幫想自殺嘅人寫遺書: 210.最想寫嘅遺書

阿文知道我拜山需要私人空間，於是拍下我搏頭，就走左

我行上去，沿住樓梯直上，左轉

兩個靈位，左邊一個女仔，右邊一對夫婦

日光日白，身邊好多掃墓人士，同好多交談嘅聲音

但係，我覺得自己孤身一人，喺一個純白嘅空間之中





後面企左三具屍體，四肢就好似比書頁壓扁嘅百合花瓣

我深呼吸，用濕紙巾抹乾淨靈位上嘅灰塵

然後用金筆補翻甩色嘅字

「對唔住⋯⋯」

曾經都有過嘅幸福，已經離我而去





我唯一能夠做嘅，就係唔好忘記佢地，背負罪孽繼續幫人寫遺書

阿文認為我係懲罰自己，我承認當中有懲罰嘅成份，但係更現實嘅係，我只係厚顏無恥咁希望得到救贖

當我幫人寫遺書嘅時候，屍體會消失

我嘅職業，一方面保護我嘅精神以免崩潰

又一方面係想補償，見證自殺者佢地生命最後一分一絲嘅情感





我已經唔想，再睇漏任何野

如果當時嘅我，可以留意倒佢嘅笑容底下埋藏嘅痛苦，或者⋯⋯

我無力笑一笑：「呢個世界無如果。」我自己最清楚

將花插好，點蠟燭，分別向靈位鞠躬

其實我最想寫嘅，係自己封遺書