[有沙入眼]是咁的，我嘅職業係幫想自殺嘅人寫遺書: 320.自閉症

面對我嘅問題，阿文遲疑左兩秒先答：「係，我要寫。」

我呼一口氣：「咁你想點寫封遺書？」

對象係爸爸媽媽，同阿志

「能醫不自醫，就係咁解。」阿文無力咁笑一笑，問：「係喇，你知唔知，我點解會做社工？」

我擰下頭：「點解？」





「你睇唔睇得出，我有咩病？」

「睇唔出。」

「我地呢種病，通常係會好固執咁不停重複做一啲野。」

我皺一皺眉，諗翻每個月阿文買一款新嘅午餐肉上我屋企，然後就會企喺廚櫃幫我執罐頭

有次我走去睇，每個罐頭都係跟哂過期日咁擺





我唔係無懷疑過，只係阿文咁嘅人，好難同嗰種病拉埋一齊諗

「你唔係⋯⋯」

阿文點點頭：「我細個嗰陣，有輕度自閉症。」

自閉症⋯⋯如果阿文有輕度自閉，咁我對佢麻木嘅推測，由一開始就係錯嘅

「而家咁睇，我係咪好似一個正常人？」





似正常人，但永遠唔係正常人

「我細個嘅社交能力一直都好低，因為我根本唔識睇人眉頭眼額。我理解唔倒人地嘅表情係咩意思，亦都唔知咩叫設身處地，唔知咩叫為人著想。」

除此之外，阿文好中意將一舊舊野疊起，或者排序

「有一次喺親戚屋企，大人打完麻雀，我就去將啲麻雀一隻一隻咁疊起，點知比我侄女整冧左，我發左好大脾氣。又叫又喊又亂掟野⋯⋯」

嗰次之後，阿文比父母帶去做測試，先發現佢有輕度自閉

「除左爸爸媽媽同阿志，就得你知架炸⋯⋯」

一個理解唔倒其他人有咩痛苦嘅人，去做一個必須理解其他人痛苦嘅角色