[有沙入眼]是咁的，我嘅職業係幫想自殺嘅人寫遺書: 349.境界

見倒阿文個樣，講真係有少少嚇親

我望向miki，佢咬住下唇，避開我嘅視線

就算miki一直陪住阿文，佢仍然變成而家咁

我一手放喺miki頭頂：「辛苦你喇。」

佢咬住唇，好似個地獄式特訓左半年，仍然喺水運會游第尾嘅小朋友一樣，唔忿氣咁點點頭





「點解每次⋯⋯我都救唔倒⋯⋯」佢細細聲講

應該係講上次希仔，同今次

陪希仔玩，陪喺阿文身邊，點解陪伴無用？

因為miki搞唔清楚先後次序

miki係比阿志救完，阿文嘅陪伴先幫倒佢個心康復





但係佢錯以為陪伴就係解決方法

試問如果當年，阿文留喺miki身邊陪佢，但每日仍然照比老豆搞，照比後母打，有咩用？

「單純陪住佢，阿文係唔會回心轉意。所以我先把握時間搵解決方法。」相反阿志就好清楚

「你咁樣消失法，如果阿文唔搵我，即刻自殺咁點？」

「我好清楚阿文份人，佢一直都好抗拒自殺，所以唔會衝動即刻走去跳樓。」





呢個係阿志對阿文嘅信任，係十年歲月嘅感情裏面慢慢堆積出黎嘅一種了解

係種一對相識十日，或者十個月嘅情侶無可能達到嘅境界

阿志係真心相信，自己嘅女朋友就算要死，都會係經過時間沉澱之後嘅選擇，而唔會係一時衝動嘅行為

而事實係，佢啱左，所以阿文先會搵我