[有沙入眼]是咁的，我嘅職業係幫想自殺嘅人寫遺書: 451.如夢似幻

睇黎比miki講中左，我仲以為自己拜過咁多次山，肯定唔會喊

但係今次同以前唔同

就因為我轉身去面對屋企人嘅幽靈，成個世界都已經唔同哂

我一直都好驚，佢地冷漠同鄙視嘅眼神

一直好怕佢地同我講，唔想見倒我





但原來我所懼怕嘅一切，都只係我自以為是嘅折磨

淚水令純白嘅世界更加模糊，如夢似幻

佢地企喺面前，對我微笑

個笑容，係瞻仰遺容嘅時候，嗰種安靜而祥和，毫不費力就將嘴角輕輕勾起，最後嘅微笑一樣

點解只係咁簡單，就令我嘅眼淚唔受控制咁流哂落黎？





佢地靠近，張開半透明嘅手，溫柔到好似輕撫羽毛咁，抱住我