[有沙入眼]是咁的，我嘅職業係幫想自殺嘅人寫遺書: 453.幸福消失

抖震嘅頭顱90度向我扭過黎：「點解⋯⋯」miki雙腳發軟，跌左喺地下

我一時之間反應唔切，想埋去扶起miki

佢推開我，㩒住個頭慘叫，眼淚水滑過佢扭曲悲鳴嘅面頰

「無可能⋯⋯咁林伯又係咩人⋯⋯」

miki聽倒我錯愕嘅疑問，雙眼嘅紅筋顯現出黎：「林伯⋯⋯上次個客⋯⋯原來係咁⋯⋯你明知佢同場手術有關都瞞住我！！！！！！」





大腦一片空白，而家發生緊咩事我根本理解唔倒

林伯明明話係佢做手術，點解做手術嗰個會變左係我老豆？

講笑炸下話？

定發夢？

係個天對我嘅惡作劇？唔好笑呀，咪玩啦五寶





miki好狼狽咁逃走，而我就連追上去嘅氣力都無

我跪左喺度

隔左好耐，頭腦慢慢清晰，先理解倒發生咩事

我諗翻起同林伯嘅對話，講到場手術嘅時候，佢面有難色，好似唔想認咁

原來佢嘅表情，只係猶豫，唔係唔想認，因為佢根本就無做過





而之後下定決心嘅表情，唔係決定承認自己嘅過錯

林伯只係，決定向我講大話

我同miki嘅幸福，已經消失得無影無蹤