你討厭地盤佬嗎？: 你討厭地盤佬嗎？ 十九

  「我係沙展4332詹建業，依家我同你錄警誡口供，你有權保持緘默，但係你所講嘅嘢將會成為呈堂證供......」房間很冷。檯燈很暗。

  我呆望極醜惡的紙筆，腦裡一片凌亂。

  我剛剛做了甚麼？

  我為了個騙我的女人而打架。

  我為她落淚。



  我以為能控制自己，不會沉迷，但原來感情，都像覆水般難以收回......

  「咩名？」

  「周偉強。」  

  「今日十點，你喺尖沙咀XXX同一個男人發生口角，繼而動武，係咪？」

  為甚麼人要這麼複雜？



  大家也喜歡對方的話，就誠實一切，除非你在騙我......你沒有愛過我，一刻也沒有。

  也沒有......

  「阿sir問你係咪呀！」

  「你唔好嘈啦，我想靜下呀......」

  「咁同我講嘢？」



  「你收皮啦好煩呀，我就嚟癲喇......」

  「依家可以告你傷人......」

  「我唔想聽呀......」

  他氣得快要想拿檯燈打我，此時門打開，一個警察進來在他耳邊說幾句話，他立時面色一變，然後望了我幾眼，一臉懷疑。

  「你走得喇，有人保你。」 沙展顯然非常不爽，轉身大力關門離去。 

  就算在場的人隻眼開隻眼閉，金毛仔怎樣都會告鳩我，證據確鑿，理應會被控告蓄意傷人，出得嚟行預咗還，我也沒期望能夠全身而退。然而現在是甚麼情況，有人保我？我可以沒事走人？是有大粒嘢照我？但明明我不認識有皇氣的人......

  我收拾一下，離開差館，才出門口，我便被人從後緊緊抱實：「好彩你無事.......」

  是阿詩......



  我甩開了她，面對著她，她情急關心的道：「阿新啱啱打俾我，話你同人打架俾人拉咗，好彩媽咪識得警方高層，我哀咗佢好耐先肯幫我......」

  我眼尾一瞥，只見她母親在倚在車子，不屑地望了我一眼，很快就駕車而去。

  「唔該。」我平靜的道。

  「我哋唔洗咁客氣喎。」阿詩又拖起我的手。

  我再次甩開她。

  她彷佛發覺有不妥，問道：「做咩？」

  「我覺得......我哋唔係幾適合。」



  「點解？我係咪做錯啲咩？」她慌忙的道。

  「你無做錯，不過我哋唔適合。」看著她的緊張的神情，我的心像被刀一下一下割著般痛苦。

  「唔適合，係咪年紀？我唔介意架。」她容貌依舊，但在我眼中就似蓋了一塊紗罩。

  「你會有更好嘅人。」我知道這樣下去，我會敗給狠起心腸，轉身就走。

  「點解！你講過要永遠愛我，依家又唔鐘意我？」她拉停了我，帶著哭腔的道。

  一瞬間世界停滯下來，那句「依家又唔鐘意我？」伴著交通燈在耳邊不斷迴響，然後是她的啜泣聲，像是個沒帶傘的孩子，被拋棄後抱膝街頭淋雨痛哭......

  好一半晌，我吁了口氣，將抑壓心底的話說出來：「我係好鐘意你！但我分唔到你邊樣嘢係真，邊樣嘢係假！你明明酒量好好，嗰晚又點會醉？你明明成日去蒲，點解要扮純情？我連你有無鐘意過我都唔知！我分唔到！其實我唔介意你以前係點，但應該坦白啲講出嚟！點解要呃我？原來我最鐘意嘅人一直戴住面具識我！我好驚當我唔喺度嗰陣，你就變咗第二個人！究竟你依家有無做戲我都唔知！我好辛苦......」

  一輪連珠炮發後，我們安靜了很久，都不敢看著彼此臉容，上映著電影一對情侶吵架的畫面。



  本來，我一直覺得所有事情都是掌握之內，但事實上我連自己最內在的情感都無從測度，沒想過我也會有這麼複雜的一天。

  也許我不應知道答案，或者繼續自欺欺人，這樣今晚我仍能與妳在漫漶的燈光勾過手指，對月發誓承諾......

  「俾多次機會我，我會解釋一切。」她拭乾眼淚，打破沉默。

  「可以點俾？」

  「我要你三日，三日之後，你想點都係你決定。」

  「我唔想再俾你呃。」

  「你根本唔俾機會我解釋。」



  「我俾機會你，跟住又點？」

  「帶我返你屋企。」