遲來一年的表白，我們還剩下多少時間?: 一.遲來的表白

冬末，是一眾登山客活動既好時機，毫無經驗既我要準備同兩個朋友踏出第一步。1月26日，星期日，係我第一次行山既日子，當日風和日麗，非常適宜登山，我諗我既心情應該會同天氣一樣好，但係我卻提唔起勁去行，正確黎講，我個心好亂，好亂。

一朝早大約5點鐘，鬧鐘係我耳邊轟炸，將睡意驅去，我努力爬起身，換好運動裝束，準備出發。但當我心情大好，正要出門口之際，我留意到電話顯示出Whatsapp 有兩個訊息，係琴晚傳黎既，而發送者並唔係我電話薄入面既人，雖然係咁，但係我都認得個電話號碼係無同我聯絡已經一年既女神 Ada 既電話，當時已經心裡一震，再睇落去：
「Terry?」 

「其實我想同你講，我好鍾意你嫁...」

就係呢兩句野，將我既心情全盤打亂，我只可以話我個腦一片空白，我既第一個念頭就係「唔會既，可能係同FD玩遊戲輸左先Send比我既姐。」，所以我只係回應一句「唔好囉呢D野黎玩啦~」，我只能藉此安慰自己，眼見Ada 既最後上線時間係00:23AM 我就知佢未會見到，所以我唯有先去應約，呢件事等以後再處理。

係小巴上，我靜靜地坐埋一角，同其他嘈吵既人形成強烈既反比，我好努力去聽下佢地講咩，令自己既注意力分散，唔去諗有關Ada既野，雖然係咁，佢地既聲音卻阻止唔到回憶一幕幕咁浮現係我眼前。







「Ada呀，我想問下聽日通識有咩要交呀?」我記得呢句係我同佢Msn講既第一句，我諗我同好多校園故一樣，同女神既接觸都係由功課開始。

慢慢，我地開始多左野傾，由講下學校既八掛野，到自己既生活，無所不談。

之後我又成功囉到佢既電話號碼，每晚SMS到訓著為止，第二朝又用SMS炸醒對方。

「Terry呀,下星期個數學Test我仲未準備好呀，不如聽朝早D番學你教我啦~~」見佢講到咁我仲唔狗衝咩? 雖然係咁，我都係提出左一個幾過份既要求：「咁呀?好呀，不過唔知會唔會有人叫我起身呢?你知啦，我又懶，又怕凍~」記得當日朝早真係天寒地凍，但係o係我收到佢個Morning Call既時候個心真係好暖，而係我教緊佢既時候，佢個路過既FD就問左句:「你地兩個係咪拍拖呢~」，之後我就見到Ada紅都面晒咁話唔係，當時我愈來愈覺得自己有機…





去到12月，我當時將一句情歌既歌詞放左係Msn 到，之後我就收到Ada問「做咩咁Sad呀?話比姐姐聽~」，我就同佢講我鍾意左個女仔，但係唔知個女仔點諗，點知佢話「咁你仲唔同人表白?我比一個星期你呀，快D同人表白啦!」，我仲柒到以為佢知個” 女仔” 就係佢自己，示意叫我同佢去馬。

雖然我放學同Ada係同一條路番屋企，但係身為一個毒撚，試問又點敢當面表白呢?結果過左一個星期，我就係Msn打左一大篇野比Ada示愛，最後梗係Fail左啦，果然毒撚最忌有自信。

其實呢一年我都覺得自己唔會再有機會，想死左條心佢，但係腦海中佢既身影總係揮之不去...去到個團火就黎熄既時候，竟然搞D咁既野，咁我呢一年其實係咪過得好無謂?如果係真既，我應該點?望住車外既風景，我問自己。

諗諗下，都有D眼濕濕，後悔點解當時咁無用，無膽去搵佢。奈何小巴已經到站，唔容許我再坐係到亂諗野，我只好動身落車。而我突然發現，Whatsapp又有一個訊息傳黎「我唔係玩嫁，我好認真!」，睇到呢個訊息我既刻呆左，我仲打左自己兩巴，果一刻既喜悅實在難以形容，對我而言就好似中左頭獎咁，一年零一個月，我等左呢句一年零一個月喇，我終於等到喇!!!
 
見到Ada回我，就知佢起左身，我猶疑左一陣，畢竟我係表白失敗之後避左佢成年，我仲柒到以為佢會討厭我所以無膽搵佢，而佢又無主動搵過我，多少都有D尷尬同埋疏遠左，但係我覺得件事始終都要面對，唯有鼓起勇氣撥個輪過去，經過漫長既鈴聲後我終於聽到一把熟悉而久違既聲音—






『喂? 係咪Ada呀? 』