遲來一年的表白，我們還剩下多少時間?: 三.兄弟喜歡的人

一月二十六號，就係我同Ada成為情侶既一日，原本以為得我同Ada知，點知當我地傾完電話之後，母親大人竟然入黎問我：「呀仔，傾電話傾到咁神祕係咪拍拖呀?」，我當然矢口否認，同時心諗，母親大人果然神通廣大!
 
懷住興奮既心情，雖然行左半日山好攰，但係我都眼光光到2點先訓得著，媽! 我有女朋友喇!!
 
翌晨，番到學校之後就係Canteen見到Ada，我地對望之後笑左笑，無理對方，因為我地唔想比人知道我地拍緊拖。但係o係出入課室既時候我都會特登行去佢後面，督下佢，玩下佢D頭髮，滿足下自己。
 
當日我全日都嘴角含春，哲頭一見到我就知咩事，走過黎話「E也，曳喇你~」，我就一拳舂埋佢話: 『咪講出去啊，我地唔想其他人知! 如果有人知既話你知會點嫁喇?』，好彩條死仔有把柄係手。
 
到左放學，問題黎喇，咁我地就約好左係學校附近既游泳池到等啦，諗住送佢番屋企(佢半年前搬左) ，等左10分鐘，見到Ada終於到左喇，咁我地就一齊行啦，途中都有講有笑，但我覺得而家係似朋友多過似情侶，得番我地兩個我反而唔敢同Ada有身體接觸，可能係我真係未ready啦…
 




傾傾下先發現原來我係Ada既初戀，感覺都有D開心。最後送到佢番到樓下，我都係無掂過佢，我真係好失敗。


而之後幾日都因為大家要補課而無放學一齊走，直到星期四，又係o係游泳池到等，今次唔知點解少左野講，去到佢屋企附近仲Dead Air埋，我當堂緊張到紅都面晒，唔知有咩講，我諗呢個時候我要拖佢隻手喇…我嘗試去伸隻手埋佢，點知發現佢隻手插緊袋，唔通插隻手落佢個袋到咩? 咁最後唯有搵D野講，我就問『不如…我地星期日去睇戲囉』，過左幾秒佢答:「好呀我想睇周星馳果套西遊呀!」，『下? 果套無周星馳嫁喎…』
 
點解我唔約佢星期六而約星期日其實係有原因既，事關星期六我約左幾個FD去行山!
 
今次行山多左幾個人上山，而行到身水身汗時，又到左屬於男人既吹水時間喇(FF) ，突然間班友就講起愛情呢個話題啦，大家輪住講，到我另一個死黨呀Ken講既時候就大問題喇，佢顯得好怕丑，一味叫我地估，卒之經過歷時十分鐘既猜測不果，佢細細聲係我耳邊講: 「其實我鍾意甲班既Ada。」
Shit!Holy SHIT!
 




最後到我講，好在今日哲頭唔係到，所以我就話，無啊，無鍾意既人，佢地就話喇: 「點會無呀，咪扮啦!」，我就唯有答『你地都知我上年表白單野嫁啦…』，最後佢地都信左我。
 
但係我心裡面點都有點唔自在…一個係兄弟，一個係女人(仔)，點算好?
 
無辦法喇，唔通同Ada分手咩? 咁難得先可以一齊，唯有瞞住Ken先啦，過得一日得一日…