遲來一年的表白，我們還剩下多少時間?: 五.花市
話咁快又過左個星期，咁岩撞正新年，當然要約Ada出黎行下花市啦，應佢要求就約左係星期五晚。不過當日放學之後我要同Ken仲有2個女仔Fd去補習，我諗要脫身唔比Ken發現都有一定既困難，因為平時我地放左補習會一齊吹水吹到12點左右。
要救命當然要搵朋友幫，所以係補緊習既時候我已經偷偷地傳左幾個訊息比其中一個一齊補習既女仔—企鵝求救。
『企鵝，陣間我約左Ada行花市，Ken果邊點搞?... 』
幾分鐘後佢就回我:
「Um…我陣間都約左條仔行花市Wo，不如一齊行啦，不過你比D時間我諗點搞掂Ken。」
『喂大佬，唔洗做低佢架，洗開佢得架喇，新年流流唔想發生血案。』
時間一分一秒過去，就黎放補習喇…佢條八婆仲唔回我…我唔係諗唔到辦法，之不過如果我同佢地食完野就話走，佢地唔知頭唔知路可能會盅左去花市玩，咁到時拖住Ada比Ken撞到正一正咁咪HIHI?
呢個時候電話好識做咁震左一震，八婆終於肯覆喇咩?
我即刻連書都廢事聽，囉起部電話黎望。
「來自Ken 的訊息：
喂Terry， 轉頭食完野行唔行花市呀? 聽講今年花市唔知搬左去邊tim wo，當係一路吹水一路搵啦!」
金翅HIHI鳥! 竟然比Ken封我去路，可惜你黎遲一步喇，有企鵝呢條八婆幫我一齊否決你既動議，你今晚只有番歸打丁一條路行咋，哈哈哈哈哈…
係呢個時候，電話中又出現一個訊息
「來自 企鵝 的訊息：
我地陣間食完野話番屋企，之後你叫埋Ada一齊過番黎我樓下，我地再去花市啦。」
如果我無搵幫手，而比你早一步提出呢個議案或者我都會HIHI，不過太遲喇，HEHE。
食完附近既劣食西貢星後我地一行人開始向平時行開既公園方向進發，途中Ken就問大家:
「不如去行花市啦，難得係撞正今日有。」
我同企鵝都立即提出反對:
『有咩好行姐，咁多人咁逼…』
「係囉，今日補完習好攰喇…」
動議立即比我地否決，最後我同Ken送晒d女仔番屋企後都分道揚鑣，而我就打左個電話比Ada。
『喂Ada，我OK喇，你去企鵝果邊個公園搵我地啦。』
「嗯，我就到架喇。」Ada答完就匆忙收左線。
無幾耐就番去到企鵝樓下喇，一望過去就見到佢同佢條仔係到等緊我，佢條仔阿浩都係我既同級同學。但係佢就好似唔知我拍緊拖喇。
『能迴避嗎?我怕了當那電燈膽~~』望住前面對奸夫淫婦係到伊伊泣泣，我無奈之下只好以歌聲唱出我既心聲…
「唔岩你都搵番個囉，咁到時等其他人做電燈膽~」阿浩聽到我既歌聲，就回頭同我講。
『搵到架喇，約埋出黎tim，比D時間你估下係邊個啦…』我即刻意氣風發咁答佢。
「B班阿Mary??A班個阿Judy?....」跟住落黎既幾分鐘阿浩都係到估，不過無個中。
『um…答案要揭曉喇!』離遠就見到Ada行緊埋黎，我就掉低佢兩個，自己行左過去。
見到佢之後我即刻過佢拖住佢隻手，帶住佢行過去企鵝佢地到。
『呢個就係我女朋友Ada。』我扮做介紹Ada比新朋友識咁，但事實上Ada係阿浩既同班同學。
「wow, 估你唔到喎，好襯呀下你兩個。」阿浩一見到我地就咁講。
『襯得過你兩個歡喜冤家咩，行啦死仔，比你估到我仲係食神黎既?』我拍一拍佢屁股示意佢起行。
雖然話一齊行，但係隨住我地兩Pair人既步速唔同，我地同企鵝佢地明顯差左幾個身位既距離，方便左我同Ada咬耳仔。
「哼，約人咁夜架…」Ada不滿咁講。
『咁我要補習丫嘛，嘩頭先呢你知唔知我地洗開阿Ken呢……』我將成個過程話晒比佢聽。
「哦…其實我都知阿Ken中意我架…」Ada既回答嚇左我一跳。
『下…?佢有同過你表白?』我即刻好緊張咁問。
「咁又無，不過我感覺到姐…做咩咁緊張呀你? 怕佢搶走我呀?」Ada笑住咁答。
『超，佢搶到咪搶囉，不過而家既你係屬於我既!』我露出奸狡既笑容望住Ada。
「色狼呀~~」Ada亦都好配合。
「後面兩位仁兄唔該收斂下，呢到街黎架。」企鵝就係呢個時候加把嘴，打斷左我地。
『顧掂自己先啦八婆。』我立刻反擊。
爭論既結果最後都係一場空，我地都係一Pair前一Pair後咁行。
係呢個時候，我發現唔知點解雖然唔係第一次拖Ada隻手，但係都係有少少生理反應，而今次係呢條陰暗既小路到竟然比Ada發現左…
「喂…點解你條褲有野突起既?」Ada帶住好奇既語氣問。
『Err….唔好問啦。』我尷尬咁回答。
「咩黎架，話比我知啦~~」Ada講呢句野既同時一手拍左落去。
『…』「…」我地都同時靜左落黎，過左一陣，Ada就紅住面咁話：
「你地d男仔淨係識諗邪野，哼!」
『大佬，我比你打到好痛呀，唔好咁啦，我都唔想架…但係我拖住你就…』我忍住痛咁講。
「淨住准對住我咁咋，試下對住第二個咁丫!」Ada用威脅既語氣對我講。
『係係係，知道大佬!』呢個時候老虎蟹都話係啦！
「係係係，Terry BB，我地就到架喇，真係唔該你地收斂下。」企鵝係呢個時候又加把嘴，結果轉左彎，真係到左花市喎，八婆不愧係八婆，個花市搬到咁辟你都知，利害! 我忍唔住以讚嘆既目光投向企鵝，而佢既眼神亦話我知：「梗係，如果唔係點做八婆呀?」
見到花市我地梗係急急腳行入去，我就同身邊既Ada講：
『拿，今年係我第一年同你行花市，以後我地年年都行好冇?』Ada用力咁點左一下頭，仲望住我係到傻笑…
行左冇耐，我地已經同企鵝佢地失散左，咁唯有自己行啦，我地一路行左大半個場都無咩斬獲，我就提議不如去玩下撈金魚啦，所以我地就向金魚檔進發，點知呢，竟然見到幾個同級既人係到撈緊金魚，中間仲要有一個出左名既大喇吧，比佢地見到就大__獲喇。係呢個時候Ada嚇到即刻轉身，無射到三分波，不過就鬆開左我隻手，唔知走左去邊，咁無計啦，咪去搵佢囉，點知個幾條友咁岩又見到我，捉我過去吹左幾句，好在Ada走得快，如果唔就係HIHI喇…
擺脫班友之後我即刻從人海中搜尋Ada既蹤影，點知驀然回首，那人卻在後面涼亭處到偷望我，我當然飛身過去拖番住佢唔比佢再走左去啦，同一時間亦講：
『好彩你走得快先無比佢地睇到咋，但係下次就唔好喇，拍拖姐，咪由佢公開囉，遲早有人知架喇，唔洗好似偷雞摸狗咁架…』
見到Ada點左一下頭，我就放心喇，但係一諗到Ken既問題，我諗o係呢個危機四伏既花市真係不宜久留，卒之都係搵番企鵝佢地，一齊離開花市，去食糖水，再散水。
------------------------------------------------------------------------------
『Ada, 恐怕我兌現唔到9個月前對你既承諾喇…』