今日我出街,見到隻豬係天上飛: 第四章 進軍

「吓,你真係嗰個人?拿我唔係專登架,你都知啦,邊有人.......」佢突然變得好尷尬咁「無野喎,唔信你睇下。」我伸直雙手等佢睇,但係周圍啲人望哂過黎,好囉,我收埋隻手囉,阿琳見到呢個情況都忍唔住笑「真係無?」佢問「都話係囉,男人老狗唔好咁婆媽啦......」我順口講左句,咪住,我講緊啲乜?果然講完之後阿琳都學識左京劇,塊臉黑過占士邦?「Vanessa,阿敏,我地落車啦」另一廂既阿明,仲同兩個女仔傾得好開心,有冇咁多野傾啊?車門開左,一個又一個人落車,來來回回,終於阿琳的身影消失在人群之中......「喂,阿強,你頭先見唔見到阿敏仲同我揮手say bye?」阿明個衰仔今次應該又得啦「你咪咁啦,成日欺騙啲無知少女既感情。」我無奈咁同佢講「你唔明,阿敏真係好特別,佢唔同其他人,佢有一種氣質,無錯,就係......」佢嗰頭又望住天空「仙氣係咪?你次次都咁講架啦」我聽過佢呢句好多次「豬啊!隻豬好似裝左降落傘咁降落到地下啦,快啲追!」唔駛講啦,周圍人既眼光當然望過黎,佢地心中既諗法一定係



  我同阿明都唔理得咁多,直接衝左出去車廂,出閘,望向豬降落既地方,發現嗰到唔只一隻豬,係有好多隻!



奇怪既係,啲豬停左係原地,我地見到咁梗係跑過去,而當我地跑近群豬,就聞到陣水果味,而且係越黎越濃,應該有好多種水果,包括橙同埋桃,其他水果我就唔多清楚,而當我地跑得越黎越近,群豬好似有行動了,而且我發現,啲豬既眼珠唔係正常既顏色,有橙,有粉紅色,我估豬眼珠既顏色係根據水果而分,但係有兩隻豬係特別唔同,佢地既眼珠分別係純白同埋純黑,睇黎應該係高級野黎,皮膚就冇乜特別,正當我試圖觀察豬的特徵個陣,隻黑色眼珠豬,我稱它為「黑大佬」,突然向天咆哮







  如果大家有睇過統神直播,應該就知道果種咆哮係點,同時「黑大佬」既皮膚變左做紅色,雖然好似隻乳豬咁,令人好想咬一下,但係之後成群豬就開始衝過黎,就好似萬馬奔騰既情況咁,即時塵土飛揚,我望下一眼阿明,佢又望一眼我,似乎大家都有默契,就係走為上計「痴線,點解啲豬無啦啦發癲架?」阿明邊跑邊叫「問我把鬼咩,跑啦!」我也顧不上咩邏輯,只係知道比群豬撞到就唔方好野,但係群豬跑得好快,快到就黎追上我地「阿強,你走先啦,唔駛理我......」阿明好似唔多夠氣,都叫佢平時做多啲運動「唔得,要走就一齊走,我係唔會出賣朋友架!」我講就咁講,事實係如果賣阿明有用,我一早賣左佢。但係群豬根本無諗住停,就算阿明真係比佢地撞到,我都唔覺得群豬會唔跑過黎,即係話,我同阿明遲早都要比群豬撞,但係我地都唔想咁快死住,於是我地唯有盡力向前跑,希望可以走得甩,係呢一刻,我好無助......