《唔係啩！我間房幅牆有個窿》: Chapter 19
這天晚上，當我在房中玩電腦玩得如火如荼之際，電話震天價的響起來。
我拿起一看見是水靈，心中有點奇怪﹕『夜麻麻搵我做咩? 』
心中是這麼想，但還是接聽了她的電話。
才一接通了就聽到她的求救聲﹕「Raymond救命呀！我搞唔掂啦！你快啲嚟幫手啦！」
我聽到她的背景聲很嘈雜，旁邊還有車聲，於是我問﹕「搞咩搞唔掂呀? 你搵Ron咪得囉。」
「阿靜飲醉咗呀！我一個人搞佢唔掂呀！你快啲嚟幫手送佢返屋企啦！」
「搞咩呀你哋? 無嗱嗱兩個女仔去飲酒，你仲要灌醉埋佢? 」
水靈埋怨道﹕「一日都係你啦！又係你叫我幫你問吓佢家姐啲嘢，睇吓可唔可以開解佢。咁我諗住一齊飲啲酒會易傾啲嘛，點知佢咁易醉喎。」
事緣我前幾天告訴水靈有關Carmen父母的事，並拜託她嘗試問一下Carmen姊姊的事，沒想到她竟然帶Carmen去喝酒。
「喂無人叫你帶佢飲酒喎！唉......你哋喺邊呀? 我而家過來啦。」
「尖咀呀！我一陣send個location比你，你快啲出嚟先啦！阿靜佢發酒癲係咁打我呀！」
「嚟啦嚟啦！你同我睇住佢呀！」
我看了看手錶，現在已經十時多。雖然香港的治安還不錯，但兩個美女在街上流連，而且有一個還醉醺醺，我也怕她們會出甚麼意外，於是我馬上出門去找她們。
收到了水靈傳送過來的位置，我下車後很快就找到她們。
我扶著Carmen，望向水靈﹕「喂點呀你? 死得未呀? 」
水靈氣喘如牛的挨著路邊旳欄杆，喘氣道﹕「嗄......你都唔知我一個人幾難先可以將佢抬出酒吧......嗄......佢又打我又推開我喎......」
她說得沒錯，Carmen不斷的扭來扭去，雙手也無間斷的推開我。
我牢牢鉗制住Carmen不讓她亂動，皺眉道﹕「喂佢飲咗好多咩? 」
「飲咗幾杯wine咋嘛，點知佢咁易醉喎......喂我交佢比你啦，你送佢返去啦，我有嘢做走先啦。」說罷她居然就拍拍屁股溜之大吉，我喊道﹕「喂！你有無問到啲咩呀? 」
她聞言轉身道﹕「無呀！都未傾到戲肉佢就醉咗啦............係喎！我警告你呀！你咪趁佢醉咗抽佢水呀！比我知道咗我唔放過你㗎！」
你當我是甚麼人了? 我是會乘人之危的那種賤人嗎?
我斜眼看著挨著我的Carmen，她醉醺醺的樣子顯得特別迷人，而且豐滿的上圍正磨蹭著我的手臂，那包著雙腿的黑絲......
媽的！又是黑絲? ！你可不要逼我做一回賤人啊！
我連忙將目光移開，免得自己獸性大發。然後我伸手截了的士，就將Carmen和自己塞進車廂裏。
還好Carmen一進車廂就呼呼大睡，沒有做出或說出甚麼令我惹人懷疑的行徑，不然的士司機可能會將我直接送到警局吧。
用不了多久，我們已經回到家樓下。這時候Carmen還是沉睡著，拍也拍不醒，我唯有揹著她，一步一步的走回家。
到了家門口，我輕輕放下Carmen再扶她挨著牆身站好，卻發現她根本沒有拿手袋，衣服也沒有甚麼口袋可以裝著鑰匙。
Shit！我怎麼打開她的家門?
正苦惱之際，我的電話響起來了，是水靈打來。來得正好，我正想問她該怎麼辦。
「喂? 水靈? 你知唔知Carmen條屋企鎖匙擺喺邊? 佢無手袋跟身嘅? 」
「哈！就係想打比你話你知，佢擺咗的電話銀包鎖匙落我度，頭先我又唔記得比你，sorry。」
「唔係啩? 咁我點開門呀? 」
「你帶佢去你度瞓一晚先啦，反正喺隔離啫，我聽日先過嚟比返啲嘢佢啦。」
「喂唔係好方便喎，話哂孤男寡女獨處一室！」
「咁咪益咗你囉！你唔係鍾意佢咩? 比個機會你照顧佢囉！講明先呀，你咪趁佢醉咗抽佢水呀！比我知道咗我唔放過你㗎！」
「喂你講第二次啦，煩唔煩呀你? 你信唔過我咪過嚟比番條鎖匙嚟囉！」其實我也有點信不過我自己，水靈你最好現在來幫我開門吧。
「唔信你就唔會將佢交比你啦，係咁。」她說完就將電話掛上。
What the......！這個不負責任的女人！
我看著搖搖欲墜的Carmen，也不知道該高興還是嘆氣，還是先將她安置好吧。
我打開了自己的家門，再扶著她進去，然後讓她躺在沙發上。
我呼了一口氣，然後到浴室洗了把臉，再順道弄了一條冷毛巾，幫Carmen擦了一下臉。
「嘔......嘔....嘔......」Carmen被冷毛巾弄得清醒了點，但卻嘔吐大作，頭一側吐得我一身以及地板都是酸臭的液體。
我也沒有阻止她，反正也來不及扶她到浴室，而且要髒的都已經髒了，就讓她吐乾淨好了。
頃刻後她已經停止嘔吐，我替她抹了抹嘴巴，清潔好地板然後狼狽不堪的走進浴室。
極速洗乾淨身體之後換了乾淨的衣服，又弄了一條熱毛巾。回到客廳，卻見Carmen坐起來，我連忙道﹕「你醒啦? 敷一敷條毛巾先啦，會舒服啲㗎。」說話的同時，我將毛巾遞給她。
她接過隨手抹了抹，就將毛巾丟在一旁，然後一直嗚咽的哭著。
我被她嚇得有點手忙腳亂，拿起紙巾就想幫她抹眼淚。
她卻一手拍開我，駡道﹕「臭男人！走開呀！你哋無個好人呀...嗚......」
我知她只是喝醉了亂說話，也沒有怪她，一邊和應她道﹕「係...係......我哋無個好人......」一邊幫她抹著眼淚。
她突然抓著我的手凝視著我道﹕「係咪個個男人都咁衰㗎? 點解佢哋一個二個都唔負責任? 」
甚麼? Carmen她到底有著甚麼樣的過去? 她這麼討厭男人，難道不單是因為她父親拋妻棄女，而且也因為她過去被男人不負責任過嗎? 那麼，那個要負的責任是......
我盯著Carmen的肚子，腦裏開始胡思亂想的同時，Carmen繼續哭著發牢騷﹕「點解爸爸唔要媽咪? 點解家姐又要比人呃? ...嗚......點解呀......嗚......」
呼.....真的嚇壞了我，我還以為是Carmen被人始亂終棄了......
Carmen一邊搥打著我，一邊嚷道﹕「嗚......如果唔係個衰人家姐就唔會死...佢就唔會丟低我同媽咪......嗚......」
原來Carmen的姐姐是因為一個男人而死的，而且因為她爸爸的事情，難怪Carmen這麼討厭男人了。
我輕輕的將她擁入懷裏，安撫道﹕「無事喇......無事喇......有我喺度，唔會有人蝦你㗎啦。」
她的嗚咽聲漸漸變成了悠長的呼吸聲。我低頭一看，發現她已經睡著了。
我慢慢讓她靠在沙發上，走到房間換了乾淨的被鋪枕頭，然後小心奕奕的將Carmen抱到床上。
幫她蓋好被後，我關上了門逕自的睡在沙發上。
睡得矇矓之際，我感到身上好像蓋上了一件東西，我揉了揉眼睛，原來已經早上了。
我聽到一把輕柔的聲線﹕「sor...sorry呀......我...整醒咗你呀? 」
我定睛一看，原來是Carmen，她正靦腆的看著我。
我看到身上蓋著被子，原來她剛才幫我蓋被。我連忙道﹕「唔係，唔關你事，我個人醒瞓啫。」我看到天色早已大亮，又道﹕「其實都天光啦，起身都差唔多。」說罷我已經坐起來。
Carmen坐在我的旁邊，輕聲道﹕「噚晚......係你送我返嚟嘅? 」
我點點頭﹕「噚晚水靈打比我，話你醉咗要我幫手，咁我咪去送你返嚟囉，但嗰個水靈又唔記得比返你啲銀包鎖匙我，咁我唯有帶你嚟我度先囉......」我怕她有甚麼誤會，連忙道﹕「噚晚你瞓房，我瞓廳，咩事都無發生過。」
她噗哧一笑﹕「我唔該你就真，又送我返嚟，又做咗成晚廳長。」她頓了頓，又道﹕「我......係咪嘔到周圍都係呀? ......對唔住呀...搞到你......」
我有點不好意思，搔頭道﹕「其實好小事啫......係呢，你肚唔肚餓呀? 我整早餐你食吖。公仔麵啱唔啱呀? 」
「等我整吖，你去刷牙洗面先啦。啲嘢係咪喺廚房呀? 」
我呆了呆，沒想到她會給我弄早餐。我連忙將材料及廚具的位置告訴她，就到浴室梳洗。
待會要不要主動提起昨晚她說過的事呢? 但這樣好像有點多管閒事，但不說的話就無法解開她的心結......嗯，還是說吧，不說的話她可能一輩子都會這樣，還是盡我能力開解她吧。
梳洗完畢，我先替她沖了一杯參茶讓她解酒，然後就坐在餐桌上等她。
「Raymond，食得啦。」Carmen捧著兩隻大碗從廚房走出來，感覺就像妻子給丈夫做早餐一樣，我是在做夢嗎?
她放下碗筷後發現了我呆呆的看著她，問道﹕「嗯? 我塊面有污糟嘢呀? 」
「無無無！無呀......呀！我沖咗杯參茶比你，你有無頭痛呀? 飲咗會舒服啲喎！」我連忙將手上的參茶遞給她。
她接過杯子，呷了一口後輕輕道﹕「唔該你。」
我覺得是時候開解她了﹕「你噚晚做咩飲到咁醉呀? 」
她苦笑了一下，沒有回答我。
「唔開心? 」
她看了我一眼，又低下了頭沒有回答我。
「有咩唔開心可以同我講喎，我都算係你朋友吖，鬱埋鬱埋對自己唔好㗎。」
「我......」她欲言又止的，最後還是說﹕「無嘢喇......」
她還是不肯說出來，我決定拋磚引玉﹕「其實你噚晚都講咗啲出嚟，係咪因為你屋企同你家姐嘅事? 」
Carmen有點驚訝的看著我，但最後她還是點了點頭。
我知道她馬上就要說出來了，所以我沒有催促她，只是靜靜的等著。
果然，她說話了﹕「喺我中一嗰陣，我爸爸喺大陸包二奶，跟住就丟低咗我哋。媽媽佢因為呢件事得咗精神病，之後又無咗份工，好彩嗰陣有家姐撐住頭家......」她吸了一口氣道﹕「我家姐佢大我十年，喺屋企有事嘅時候，佢好努力咁賺錢養家......」
原來，她姊姊那時候認識了一個男人，一個以為會待自己很好的男人。但數年前，這個男的騙光了她姊姊的錢，又將她棄如敝屣，這個時候她姊姊卻發現懷有身孕，最後她受不了打擊自殺死了。
Carmen眼睛紅紅的，淚水靜靜的滑過臉頰。我拿起紙巾，輕輕的替她抹著，歉意道﹕「sorry呀，要你諗返起啲唔開心嘅事。」
她搖搖頭笑了笑﹕「其...其實......我講咗出嚟舒服好多啦....多謝你呀......」
我微笑道﹕「咁你以後有咩唔開心都話我知喎，我好樂意聆聽㗎。」
Carmen笑著點點頭，然後又有點靦腆道﹕「Raymond呀......你嚟緊個星期六得唔得閒呀? 」
星期六? 要幹甚麼? 想跟我約會嗎?
我壓下心裏的狂喜，淡然道﹕「哦? 得閒呀，做咩呀? 」
「我...我想你陪我去一個地方呀......」她的樣子像是難以啟齒的。
她這個很難開口的樣子，她要是我陪她去甚麼地方?
不過反正就算要上刀山，下油鑊我也會陪她去的，我也沒有問她要去哪。
我馬上答應﹕「好呀，無問題。」
Carmen笑意盈盈﹕「咁星期六朝早10點喺調景嶺站等吖。」
調景嶺? 到那裏幹甚麼? 為甚麼不一起出門呢?