我要寫出一個好好好好甜既好故事: 第十二章 海底針
自從上次被人磨完之後,
唔知點解陳瑤上堂都用好奇怪既眼神望住我,
好似瘋狂科學家望住實驗物嗰種變態眼神,
「喂,你望夠未?」
我忍唔住出聲,
只見到佢隨即將嗰頭擰返向前,
回眸一笑,
雖然唔算係美人,
但都幾可愛下,
「拿你唔同我講你做乜成日望住我,我就當你鐘意我架啦~」
帶有威脅性的言論果然起到一定的作用,
「唔...唔係啊,我只不過係好奇,點解你地啲男仔咁鐘意互相整大家......」
陳瑤好細聲咁講,
臉漲得通紅,
我完全唔明佢講緊乜,
「其實你可唔可以講清楚啲?」
陳瑤靜左一陣,
之後望住我下面,
哇估你唔到咁猴擒,
等陣先......
「哦,我明你講乜啦,我都唔知點解男仔會咁,
不如我幫你問下阿楠?佢係呢方面既專家。」
女性一定比男性進化得更多,
大家睇佢地套語言系列就知道,
邊有人講好嗰陣就係唔好,
唔好就係好?
好難捉摸啊!
各位唔好話我貶低男性,
你試過同女性朋友溝通就會知道,
女性根本就唔係來自地球,
佢地係來自高度發達文明既星球!
有人話,
「女人心,海底針」
點解會咁講?
一支針跌落海會點?
無錯,
就係渣都冇得剩!
「唔...唔駛,費時佢地誤會。」
誤會啲乜啊又?
正當我諗住問佢驚有乜誤會時,
我內心既尊嚴同我講,
唔得,
我要靠自己破解呢套加密咗既語言,
就好似當初波蘭人破解納粹德軍既密碼,
雖然人地有成個國家幫手,
我只係得自己單人匹馬咁作戰,
誤會......誤會佢對阿楠有興趣?
應該唔係,
根據前文後理,
應該係講緊襲擊下體呢件事,
唔通係誤會陳瑤對呢方面有特別興趣?
我找到了,
那一縷黑暗中的光芒,
不比當初阿基米德既Eureka!遜色,
我當然充滿自信咁同陳瑤宣佈答案,
「哦,你唔駛驚,呢個時期對嗰方面有興趣唔出奇既......」
我嘗試加密說話,
令佢體驗到解密既痛苦之際,
「唔係啊,我係驚佢地以為我對你有意思。」
敗了,
徹徹底底的敗了,
首先唔好講佢秒殺咗我嗰加密,
有冇人話我知點解誤會可以去到呢個層次,
我地明明係講緊襲擊下體呢件事,
我可以講,
柯南只會得一集,
如果柯南要調查女性說話既真正含意,
佢一定會諗到傻,
然後自爆身亡,
我估中了開頭,
卻猜不中結局,
不,
我連開頭都估唔中......
我亦無心戀戰了,
我只可以無奈咁望住窗外既雀仔,
慨嘆人生既苦短,
人生已經有好多挑戰,
令我地苦苦思考對策,
只係勢估唔到最大既哲學,
竟然係出自女性既說話,
我頓時明白「學海無涯」的真正意思,
學海並唔係學習知識的海洋,
而係女人的心思!
我地一直以來都誤會了先人的教誨,
先至喺同女性溝通呢一方面屢戰屢敗,
「我既意思唔係介意佢地誤會我咩你......」
陳瑤再次發出攻勢,
而我竟然連咁直白既說話都聽唔到其中既意思,
「得啦,你唔駛再講了,我明白哂了。」
臉上回復以住冷淡既表情,
陳瑤見狀亦靜了下來,
氣氛十分尷尬,
直至小息既鐘聲響起先至紓解呢種情況,
我若無其事咁走出班房,
眼角睄到陳瑤寂落既表情,
嘴角微微向下,
眼簾低垂,
突然意識到,
開學到依家,
陳瑤都冇乜朋友,
可能因為佢太過有禮貌,
而樣子又一般,成日怕怕羞羞咁,
比唔上winkie呢種爽朗既性格,
只見陳瑤輕輕搖頭,
似乎要擺脫一些不應該的思想,
從書包抽出一張畫紙,
然後從筆袋拿出一支黑色既筆,
睇落去十分精緻,
應該係專業畫畫用既筆黎,
緩緩在紙上劃動,
那全神貫注的神情,
甚至看得到她眼中的光芒,
此時的她既自信又漂亮,
在喧嚷的班房中自成一格,
而陳瑤應該意識不到自己的獨特,
我忍不住微笑,
決定以後一定要好好了解陳瑤呢個人,
不夾雜一絲男女之情。
我自逕走到小食部,
「阿姨,唔該兩包維他奶,一包要暖既。」
由於我一打鐘就落黎,
所以唔駛同成班狗衝落去既痴線佬爭排隊,
小食部阿姨面露不悅,
「十蚊。」
我之前都嘗試說服自己,
同阿楠一樣叫阿姨做靚女,
但係始終都係過唔到自己內心嗰關,
說罷兩包維他奶放到櫃台上,
我攞住一凍一熱既維他奶,
輕鬆地走向樓梯,
突然身後傳來一陣嚴厲既聲音,
「同學,唔可以帶飲品上去架喎!」
我回頭一看,
原來是校工,
校工的眼睛睜得老大,
可見其堅決,
「通融下啦,我同學冇食早餐低血糖,唔該啦......」
我用哀求既語氣向校工求情,
只見校工打量了我一眼,
之後擺擺手,
「冇下次呀,知唔知?」
校工的語氣十分溫柔,
與一開始的呼喝有天壤之別,
我點頭以示感謝,
「係呢,點稱呼啊?」
我差點忘記了應有的禮貌,
「你叫我海伯就得架啦,快啲上去啦,血糖低可大可少架......」
海伯不耐煩的語氣中,帶有關心,
於是我便拿著兩包維他奶,
朝著班房奔去。