自殺以後，進入了RPG的世界: ❆黑騎士與蜘蛛

在場無一個人打得贏梁同學。
眾所週知，梁同學好強。
放眼全世界，全宇宙，只要唔用管理員權限，應該無一個人打得贏佢。
無論係Alice，以至加百列、烏列爾，甚至係天照，應該都唔會贏得佢。

佢嘅人生充滿住挑戰。
孤獨嘅佢，弱小嘅佢，一直挑戰緊同佢唔符合嘅對手。
一路以弱勝強，以最弱嘅能力挑戰強大嘅存在。
一次又一次嘅下剋上，終究成為咗異世界嘅神。
成為最強嘅佢，依舊都係咁孤獨。




孤獨而強大，卻又喪失了人性。
應該話，呢個人，打從一開始就無人性呢樣嘢。
喺佢轉生之前，佢已經係孤獨嘅存在。
無法理解人類嘅愉悅，無法理解他人嘅想法，價值觀打從一開始就同眾人唔同。
身為班長時嘅我，就一直諗緊，點解佢一個朋友都無。

唔係因為怕醜之類嘅普通理由，亦唔係毒之類嘅問題。
而係佢一直都係別種生物。
我同佢或者有機會成為朋友。





身為白雪嘅時候，佢為我而擔心，誤以為我死咗嘅時候緊抱住我。
我曾經以為，我對佢嚟講，係至關緊要嘅存在。
但原來唔係。
喺白雪人生嘅最後，佢殺死咗我。
輕描淡寫咁殺咗我，無帶有一絲嘅悔疚。
唔存在乜嘢理由，嗰一下純粹只係覺得我麻煩，然後就殺咗我。

身為班長嘅時候，我嘗試過搵佢講嘢。
我以為佢只係怕醜，只係毒，只係融入唔到其他人。
我不斷咁搵話題同佢講嘢，嘗試去了解呢個人。




但係，佢幾乎都一一拒絕。
打從根源開始，佢就拒絕同其他人接觸。
佢係孤獨嘅存在，不斷咁斬斷佢同其他人之間嘅聯繫。

身為溫蒂妮嘅時候，我以第三身嘅角度望呢一個人。
就算去到異世界，佢一樣都拒絕其他人成為佢嘅同伴。
隻身一人咁稱霸世界，喺佢眼中，所有嘅人唔係敵人就係棋子。
佢嘅一生，無一個人稱得上係同伴。
無論係白雪定係蝴蝶女王，對佢嚟講都只係即棄嘅工具。

我恨佢。
對我嚟講，佢係同伴。
係戰友，係可以互相依賴嘅友人。
佢輕易咁背叛咗我。
無法想像摯友一下子就背叛咗我，究竟佢係懷住點樣嘅心情，僅僅因為求其、是但、隨便、麻煩嘅理由，將我殺死。




我嗰一下先清楚明白，我同佢之間嘅友誼，不過係我一相情願嘅嘢。
當我轉生成溫蒂妮嘅時候，由全知角度，終於睇清咗呢點。

呢個人無藥可救。
生存於世上，只會為所有嘅人帶來不幸。
只要稍微唔滿意，就會對世界產生憎恨。
唔滿意，於是輕易咁放棄自己珍貴嘅生命。
唔滿意，於是就殘害無數嘅生命，弑神，毀滅世界。
佢唔會思考其他人嘅感受，毫無疑問係惡嘅化身。

我喺到諗，我呢三段嘅人生，數千年嘅生命，係咪為咗消滅呢個惡神而存在。
我要再一次殺死佢。
再一次殺死佢，如今異世界已經無足夠嘅資源使佢復活多一次。
佢必須死喺呢到。





我叫內比羅斯退後。
佢係必須由我出面迎戰嘅敵人。
天照、Alice無法打低嘅對手，就由我嚟殺死佢。
結束呢段千年恩怨。

「班長。」

唔會再比佢嘅語言迷惑。
無論講咩都好，都阻止唔到我千年決意。