呀呀呀!
係差D做左勇者果個女人啊!
冷靜D!佢唔係黎追殺我下話?
喂,我只不過係搶左佢勇者個位姐,唔使咁大仇口下話!
我咩都無做過架,我清白架……
係,係呀,果四個冒險唔係我殺架!係BOSS做架!

算啦,放棄思考啦。
又要同人開拖,頭先先死戰完,我想抖下姐仆街。



打得贏就有鬼。
無人幫拖點打呀!

佢拎起把劍,一把冰做既劍,扯哂蝦咁指住我。
喂喂,我投降得唔得?
出面突然之間出現左爆炸聲,佢即刻收起把劍,無視我,繼續走入洞穴既深處。

咦?
唔係黎打我?唔係黎救冒險者?
佢黎搞乜?


不過洞穴入面得個吉既黃蜂巢,入面咩都無架。
之後,成班人衝左入黎。

骷髏人、喪屍、灰既皮膚既人、藍色皮膚既人,總之係一大班人走左入黎。
唔對路。
帶頭果個人係?

【不死族領主】 骷髏-歐西里斯 法師 LV99

HP:7296


MP:11984

力量:726  敏捷:828
防禦:788  魔力:1644

係魔界既人!
除左龍人同獸人之外既第三個領主!
不死族,但係自己既種族係骷髏。
睇黎不死族只係個統稱,包含左好多既種族係入面。

白雪,果個做唔成勇者既精靈同佢地對持緊。
一個打咁多個,係無可能贏。
最大既問題係,點解魔界既人會出現係人類聯盟既領土?
不安。
弊!仆街,個領主會唔會認得我?


睇黎唔會。
不過,我都係著草先,慢一突然之間認得咁我咪弊?
想走人,但係魔界班人封住左洞穴入口。

白雪深呼吸,然後用冰劍指住領主。
唔係用咩大法術一個地圖炮炸哂佢地下話,我都係走過去白雪到先。
骷髏領主揮一揮手,然後幾個黑色既魔法球(?)出現左。
好似之前果個法師用既火球飛彈,不過D火球係黑色咁解。
白雪突然之間一揮手,巨大既冰牆出現左,擋係兩邊人既中間。
咦?
吓?
居然走佬?
白雪跳入左蜂巢入面。
有咩用呀!
我跟埋去,點知見到蜂巢背後,有個窿係到。


好大既窿。
足夠一個成年人走入去。
白雪毫不猶豫咁走入去。
跟唔跟?
梗係跟啦,跟住呢個女人點都好過跟魔界D人掛!

我感覺到呢個窿係一條向下既通道。
唔係掛,有種不詳既預感。
好長既通道。
睇黎後面班人都無再追黎。
去到終點。
好光。
呢到係……

四圍都係草地,巨大既樹木,巨大既山林,巨大既湖。


天空,應該話係山洞頂有個光球。
呢到係地底?
[尤克特拉希爾地下城-第1層]
居然有個咁大既地下城……與其話係城,不如話係仙境,係一個巨大既山林。
我望一望後面,係地下城既盡頭,係一望無際山壁,上面有幾個大大小小既窿。
應該話係,所有既山壁上面,都有大小各異既窿,係入口?
好大……

係喎,白雪呢?
佢無視我,向前走。
我偷偷地跟住佢。
身邊好大生物行過,有雀仔,有狼,有獅子,咩都有,LV由1到40不等。
但係,佢地無攻擊我,可能係因為我係白雪後面掛。
雖然搞到好狼狽,但係佢假假地都係60幾LV既戰士、咩劍聖既後補。



行左一陣,見到係一個……村落?
已經係城市規模啦!
人類聯盟係到建立左個咁大既城市,真係得人驚。
我都係唔好跟入去,廢事煩。
不過,同我想像中既地下城好唔同,等我仲以為呢到係個陰森既地方。
點知,呢到居然只係個山林……好似無咩特別。

係呢到升升LV都好。
但係,實在有一樣野我留意左好耐。
有兩個守衛企左係到,企左係個地下通道隔離。
人類守衛,三十LV左右。
地下城,第2層?
好想入去睇下。
我走過去,但係守衛無理我,我就咁行左入去。
呢個係我黎到呢個世界之後做既第一件蠢事。

[尤克特拉希爾地下城-第2層]

頂呀!!!
我比隻狼追緊呀!

魔狼 LV-48

HP:5210
MP:3011

力量:518  敏捷:522
防禦:478  魔力:441

成身黑色帶住鎖鏈既狼追緊我呀!
可惡呀!
好恐怖!
呢到真係個迷宮……由山岩而成既天然迷宮。
呢隻狼係呢到已經係低LV怪物黎。
然後,我明白一樣野,低LV既怪物升LV之後,會走落去下面果層到。
好恐怖……
走甩左之後,我又記得番一樣野。
係喎,進得化啦喎。

[可以選擇進化,請選擇一項]
>奇美拉蟲
>摠惸?>嬩
>微型蜘蛛

如果進化既話,我希望可以進成女王蜂,睇黎都無可能啦。
不過……
……又係亂碼。
然後,微型蜘蛛想點?
我記得係一開始我係魔王城咁殺死,現實世界普通蜘蛛咁大既怪物。
姐係得番一個啦。
奇美拉,我記得以前打機見過,好似係咩獅子、羊同蛇撈埋一齊既怪物。
蜘蛛、螳螂,唔知又會撈咩呢?
一諗到就覺得自己噁心。
算啦,無得揀,袋住先啦。
一定係揀奇美拉蟲啦。
不過,不如試下揀亂碼啦!
亂碼唔知會點呢!
好!
我就揀奇美拉蟲。
我認我淆,吹咩!

完全無特效,話變就變既進化就黎啦。
身形好似大左。
都係兩對鐮刀,蜘蛛既腹部。
唔,蠍子條尾。
我有蜘蛛毒牙啦,蠍子條尾有咩用呢?
雞肋。

奇美拉蟲 LV25

HP:3618
MP:3618

力量:371  敏捷:401
防禦:322  魔力:375

[1.蜘蛛毒牙 2.螳螂之鐮 3.毒素激發 4.蠍子毒尾]
[蠍子毒尾:對單體造成大量物理傷害,然後賦予對手5秒猛毒狀態,若然本身已陷入毒狀態,使其毒傷害變為原本的兩倍]

MP用得好多,但係好似好強,不過同毒牙重疊左。
垃圾GAME,設計隻GAME既應該比人捉去打靶算啦。

講起上黎,又有兩隻狼追緊我。

咁我有被動技能未?
[免疫毒素:自身免疫毒效果]

好過無啦。
講起上黎,我比佢地趕左落第3層到。
已有 0 人追稿