幻像魔法真係樣神奇既樣。
實際上,白雪只係坐係草地上面,望住隻蟲(我),
但係我可以令佢感覺到自己坐係森林小屋既床上,然後望見一個人類(我既幻像)。

【大賢者的徒弟】 人類-痴線蜘蛛D蜘蛛絲癡住枝樹枝 LV76 法師

HP:7319/7319
MP:7980/7980

力量:745  敏捷:759


防禦:749  魔力:829

當然唔會再係小蛛蛛囉!

就係唔知幾時開始,天照帶住頭先果個弓手消失左,但係我好肯定佢係到偷望緊我。
而依家既我,救番白雪。
點解我要咁做呢?
唔知。
我自己都唔明白自己咁做有咩用。
我望住佢,無見一排,佢LV又升左。



【劍聖的繼承者】精靈-白雪 戰士 LV70

HP:7183/7183
MP:7294/7294

力量:541  敏捷:719
防禦:697  魔力:795

仲係好弱。


得70LV,係呢個世界根本就係廢。
單係魔王手下咁多位領主,每一個都已經係99LV。
佢面對魔界,真係無可能有勝算。
至於佢比人打到咁傷,好有可能係有領主攻打過黎。
係邊個?巨人領主應該仲係地下城第3層卡關,而我見過既,就只係得番獸人、龍人同埋排骨。
應該好有可能係排骨領主。
但係我唔係好記得佢係咩樣。
呀呀,一時之間又沉入左去自己既思考到,唔記得左白雪添。

「請問……係你救左我?」
白雪開口講。
依家細心一睇,佢又幾靚。
銀色頭髮,蒼白既皮膚,目無表情,只係淡淡既望住我。
嗚,有D緊張。
緊張個鬼咩?有咩好緊張呀。


係,深呼吸,然後答:
「係……係呀……」
已經好有進步架啦……

「多謝你救左我,痴線蜘蛛D蜘蛛絲癡住枝樹枝先生。」

今次,我既幻像角色,係個男人,設定係大賢者既學徒。
我先唔似天照咁鬼蠢扮係大賢者,何況白雪呢種大人物一定見過大賢者。

「但係,我依家要離開呢到,你知道嗎?魔王軍已經殺到過黎。」
「……」
「我有義務去,去打低佢地。」
「無可能。」
「咩無可能?你係話我無可能贏?呢個唔係贏唔贏既問題,而係我一定要去打。係喎,師父佢幾時收左你呢個徒弟架,明明之前死都唔肯收徒弟。」
師父?師乜鬼父?你師父唔係劍聖咩?


「師父最近還好嗎?幫我問候下佢老人家。仲有,幫幫忙,幫我通知大家,魔王打到黎,要大家去避難。」
「我……拒絕。」
「點解?」
「因為,你,你……你,你無可能贏。」
「都話左,呢個係我義務。」
「義……務?」
「無錯。作為勇者既義務。」

!(&(@*&(@^#&(@*#!
勇乜鬼者呀!
你知唔知勇者本人就企左係你面前呀!
姐係話,白雪本身就冒充緊勇者……
扮乜,有乜好扮。

算啦,都係時候要盡下勇者既義務。


唔單止係勇者既義務,仲係魔王既責任。
係時候教訓下班細架啦。
由我去開果副排骨拖啦。
唔得唔得,依家既我打得贏排骨姐,打完排骨之後,果班領主走哂出黎圍毆點算?
唔得唔得,我唔夠咁多人打架。

「痴線蜘蛛D蜘蛛絲癡住枝樹枝先生?」
又搞乜?
「痴線蜘蛛D蜘蛛絲癡住枝樹枝先生,請你幫幫忙,或者我真係無勝算,但係,請你去拯救民眾。依家得番痴線蜘蛛D蜘蛛絲癡住枝樹枝先生可以做到。又或者咁,痴線蜘蛛D蜘蛛絲癡住枝樹枝先生,你不如做我既同伴。雖然話做勇者既同件會好辛苦,隨時性命不保,但係我地依家必需依賴痴線蜘蛛D蜘蛛絲癡住枝樹枝先生你既力量,請你幫忙,痴線蜘蛛D蜘蛛絲癡住枝樹枝先生。」

好煩。
早知改過正常d既名……

白雪跪左係地求我。
我真係唔明白,佢地條命真係咁重要咩?


真係值得為佢地犧牲一切咩?
反正,反正佢地最後都會忘記你。
做唔到野會唾罵你。
點解要去救佢地。

「痴線蜘蛛D蜘蛛絲癡住枝樹枝先生!」

「我明白啦。你真係咁想要力量?」

「吓?」

「既然係咁,跟住我講既野,要做既野你都要無條伴跟住去做(意思好似有d奇怪……),即使發生咩事都好,請你,相信住我。」
已有 0 人追稿