偽魔王。

【人類的惡夢】吸血鬼-德古拉 戰士 LV98

HP:9756
MP:11066

力量:963  敏捷:972
防禦:952  魔力:999



佢企係我面前。

「巨人領主!你究竟係咩人?突然之間出現,然後三番四次係到阻礙我既計劃?」

「計劃?莫非就係你……」

「無錯!仲差少少,我就升到99LV,點解你要出現係呢到阻礙我!」

哥布林行出左幾步,然後講:
「魔王大人,等我黎解答你既問題啦。」


佢舉起一個水晶球,水晶球一閃--

「佢之所以咁強,係因為佢並唔係巨人,而係魔物。我有無講錯呀!蛛女,呢個水晶球可以睇穿你既法術。」哥布林講。

「魔物?你究竟係……」偽魔王有少少驚訝。

「明明係一隻無名既魔物,但係居然有智慧潛伏入黎魔王城入面,你既存在真係值得研究。你,就好似,一生出黎就有智慧咁。」

名?智慧?唔明佢講咩。



「你……唔通,莫非你同我一樣,係轉生者?」

轉生者?轉生?咩意思?
下一秒,我即刻明白,呢個偽魔王並唔係屬於呢個世界既存在。
無錯,佢同我一樣,都係黎自香港。
如果我無估錯,佢係黎左呢到,計埋我在內既十個同學之一。
但係,我既同學之中,有咁既癡線殺人狂咩?

「哈哈,二十幾年,我等左二十幾年,終於都比我搵到啦,你係邊個?我係阿John呀!你記唔記得我呀?」

John,呢個名有印象,雖然同佢唔係好熟,好似一句野都無講過。
無記錯既話,原來班入面佢係一個好靜,高高瘦瘦既男仔,無論點諗,佢都唔會係呢個殺人狂。
究竟,發生左咩事,佢先變成咁樣?
最令人在意既係,二十年?
無可能!


由我出世到依家,應該只係得3個月!

John一步一步行埋黎,然後問:
「你呢?你係邊個?」

「對唔住。我唔認識好似你咁樣既John。」

「你係到講咩?二十幾年啦!再次見番同班同學,你同我講D咁既野?咩唔認識John,你講緊咩呀?」

「我唔認識好似你咁樣既殺人狂。」

「你係到講緊咩呀!呢到係RPG既世界呀!係打機既世界呀!你以前有無打過機呀?殺死NPC姐!咩殺人呀!你講緊咩呀!升LV有咩問題呀!」

「NPC?咁既說話你都講得出口。」



「收皮啦!偽善撚!道德撚!明明已經升到82LV,你敢講過,你黎呢個世界無殺過人咩?殺怪升LV天公地義,人同怪又有咩分別呀?你可以殺怪升LV但係唔殺得人?咩道理呀!」

佢滿口歪理,一輪嘴噴落我到。
我……

駁唔到!
的確……
佢講得無錯……
殺人……
我係殺過人。
由一開始既狼、哥布林三人組、成條村落、打蜂后三人組、土元素,仲有好多。
多到數唔哂。

「呢個係弱肉強食既世界!」



「但係,你已經變左個殺人狂。」

「所以話!殺人有咩唔岩?」

「你唔單止殺左人,仲殺埋你自己。你,已經唔係你。」

「吓?」

突然之間,我爆左句懶係哲學性,但係實際自己都唔多明既說話出黎。
總之,唔理道理係邊,點都好。
佢既事,令我覺得唔舒服。
我唔鐘意佢,所以佢就係敵人,謹此如此。

「你同我收聲!」
John拎劍,衝左上黎。


佢已經,失去左理智。
一睇STATUS就知,佢係無可能打贏我。
所以,就送佢……

[束縛]
John比人束縛住左。

「諾登斯!你做乜野呀!」John對住哥布林大叫。

「對唔住呀!魔王大人,阻住你同你既摯友重逢。不過呀,我要背叛你啦,對唔住啦,你地下世有緣再會啦。」

哥希林地上面拎起枝鐵通,貫穿左John既身體。

「你……你……」

「對唔住呀魔王大人,我仲對你落左麻痺既藥,呢,就係今朝你飲既果碗湯呢。」

「你……你……蛛女!救我呀!你係邊個?Alice?肥豪?定係阿俊呀!救我呀……救我呀!」John一面絕望咁向我求救。

「遺憾。我唔係Alice,唔係肥豪,而且我邊到都唔俊。」
就算,你叫得出我個名,我都唔會救你。
何況,你無可能叫得出我個阿。

所以,再死多左一次啦,John,希望你可以番到去香港。

「哈哈,唔記得自我介紹,蛛女,我係哥布林領主,亦都係一名……」

哥布林鞠左個靚躬。

「舊日支配者。」
已有 0 人追稿