地下城第一層。
穿過一條奇奇怪怪既通道,黎到地底既世界。
明明係地底既世界,但係四圍既景色好似地面咁。
係一個普通既山林,向上望見唔到盡頭,而一個光球好似太陽咁為呢到照明。
如果唔講既話,真係唔知呢到係地下城。

第一層既中心部份係一個村落。
係由聯盟既人興建而成既村落。
好似話係咩聯盟入面既咩地下城自治區。
白兔果班人係到搞緊唔知咩重要事情。



而我,就係村落外面,亦即係係森林之中。
雖然話離村落都只不過係一百米左右既路程,但係大自然本身其實都幾恐怖。
我唔走入村係因為想測試一下新技能。

最令人在意既係[牧者之歌]。
我使用呢招技能既時候郁唔到,但係用緊既時候,本來攻擊我既生物就會變得溫和起黎,唔攻擊我。
有D甚至仲會企係到聽我唱歌。
睇黎技能呢樣野,唔單係用黎戰鬥,仲有其他既用途。



好似依家咁,果幾隻森林黃蜂係到聽我唱歌。
不過,佢地聽得明我唱歌,唔代表我聽得明佢地既語言。
技能樹入面有招技能叫做[動物語言],應該就係用黎同動物溝通。
要用一點技能點數黎學,但係技能點數點樣拎?

果個係……

鬼靈殺戮者 LV25

HP:3511/3511


MP:3531/3531

力量:347  敏捷:403
防禦:302  魔力:371

係……係之前殺我全家既果隻蟲。
要點做好?
殺左佢?
冷靜少少先。
依家既我,應該打唔贏佢。
數值差太遠。
可唔可以用[牧者之歌]黎馴服佢,再偷偷地殺死佢?
唔知……但係雙腳係到震……郁唔到……
我好驚。



本來我就唔鐘意蟲,黎到呢個世界之後,更加憎恨蟲呢種生物。
好嘔心,無人性既詭異生物。
冷靜少少……

我偷偷地跟住隻蟲。
佢行到去一個入口前面。
係一條樓梯?通向地底既通道。

如果話,地下城有第一層,咁樣自然就有第二層。
有兩個守衛係到看守住,然後,隻蟲就爬左落去條樓梯到。

「小妹妹!你係到做咩!好危險架喎!」守衛同我講。
係囉,我係到做咩呢?點解我要跟住隻蟲呢?

「小妹妹,你識唔識番入村?使唔使我送你入村?」



「唔洗啦。唔該哂各位哥哥,我識路架!」
我扮個好笑容同佢地講。
然後,轉身走人。

但係。
隻腳痺左,我係驚到痺左?
雙腳一軟。

「小妹妹!」

我跌左落去。
碌樓梯,碌左幾百級。
好痛。



我爬番起身。
居然死唔去……

呢到係……第二層?
第二層同第一層完全唔同,係一個由山岩組成既迷宮。
有種不安既感覺。

魔狼 LV-48

HP:5210
MP:3011

力量:518  敏捷:522
防禦:478  魔力:441



黑色既狼。
成身帶住鎖鏈既狼。
仲要同時出現三隻。

「小妹妹!你無事……」

一個守衛行左入黎,點知即刻比狼襲擊。

係我面前,成塊肉被隻狼撕左落黎。

「呀呀呀呀!!!!」
已有 0 人追稿