天照。
呢個世界既三大神之一,掌管住光、聯盟既守護神。
無事不登三寶殿,佢出現係呢到究竟想點?
唔通係因為我殺左白雪,令到天下大亂?

「錯啦錯啦,白雪唔係重點,佢無咩所謂……由女神咁講好似唔係幾好,不過我出現係呢到既原因唔係因為白雪。」

又玩讀心神棍。
算啦,不過,天照出現係呢到係所謂何事?



「點講好呢。好難簡單咁話比你知,算啦,儘我所能解釋一下點解我會出現啦:奧丁落左命令要追殺你。」

「咦咦咦咦咦咦?」我嚇到呆左。

「你應該慶幸既係,奧丁依家養緊傷,所以佢無親自黎殺你,所以佢派左部下黎襲擊你。大概都應該差唔多到架啦。」

「等等等陣先!發生咩事!點解我無啦啦要比你追殺!」

「拿拿拿!講清楚喎!係奧丁殺你,唔係我殺你呀!我對殺你係持反對既態度架!不過奧丁又唔係我既部下,佢做咩係佢既自由。至於點解要殺你,真係一匹布咁長。」



「姐係點呀喂!」究竟想點……

「宙斯,姐係第三個神,實際上佢唔係偷懶,而係比人襲擊,令到我地同佢失去左聯絡。然後,我地有證據證明襲擊宙斯既人係轉生者。」

「吓?咁關我鬼事?」

「姐係話,轉生者入面有賤人,係外神D FRIEND。」

「吓關我咩事呀……你地唔係懷疑係我下話?」



「其實係咁,轉生者一共有十個人既,本來我地都唔知個賤人係邊個,點知佢地差唔多死哂,依家得番三個:海龍王、果個不死族領主,同埋你。本來我地懷疑係愛麗斯或者係白兔既,點知佢地都死哂,然後海龍王就無可能係壞人啦,不死族領主一睇就知佢無可能係外神D朋友啦,所以奧丁推斷你係敵人。」

「呀,痴線,呢件排骨扮豬食老虎咋!」

「同我講無用呀,我信你呀,你應該同奧丁講,噢,黎LU~」

右邊既牆壁成個粉碎左,然後,有條龍衝左入黎。

【風的元素使】 暴風龍-希爾芙 LV70

HP:122580
MP:143211

力量:7411  敏捷:9015
防禦:6023  魔力:8255



呀呀呀呀呀!係風龍王呀!
唔惦,同元素龍王打係輸硬。

暴風龍變左個人,一個精靈族弓手。
大概係因為龍既體型太大唔方便。

「祝君好運。」天照說。

「等陣先,如果話佢係外神既人,實在有少少難以置信。」火龍妹居然幫我講野,好滾動。

「決定既人唔係我,我只係跟住軍神既指引去做事姐,定係你要幫佢?」
風龍王拉弓,向我射擊。

蜘蛛魔眼!


猛毒左佢先!

「驅魔之風」
風龍王解開左猛毒狀態。
又用驅風油逼毒,點玩呀!

黑暗飛彈!
「暴風結界EX」
佢身邊出現左個風既結界,將我既黑暗飛彈彈開。
就連魔法都可以吹得開?

「破壞龍卷」
風龍王召喚左三個迷你龍卷風出黎,天花板比佢地拆左,然後,直接車落我到。

呀……


佢既技能點解可以OP到咁。
呢D係咪就係平時ONLINE GAME入面成日出現既必輸情節?

我比龍卷風壓到去牆上面。
然後,風龍王用弓瞄準住我。
GG。
五個段落之內就比人秒殺,係咪破左一直以黎既紀錄?

「暴風射擊」
「寒冰屏障」
我面前出現左一道冰壁擋住左風龍王既攻擊。
咦?
果個人係?

黑騎士。


黑騎士?
但係白雪唔係死左啦咩?
黑騎士係邊個?

[沒有權限查閱]

沒有權限?我已經換左【魔王】稱號啦喎。
唔係,咪住,正常黎講,如果非魔王既人查黑騎士既STATUS,應該係全部黑色,而唔係沒有權限架喎。
點解會出現沒有權限?
情報掌握!
[鬼知]

「沒有權限查閱?黑騎士……小蛛蛛,你唔會真係外神既人?」天照問。

係外掛令到GM都查唔到?
如果黑騎士真係外掛,點解會黎救我。
呢個黑騎士既身份究竟係?

風龍王唔理,繼續攻擊。
最令人在意既係,黑騎士居然無比風龍王秒殺。
更加可怕既係,黑騎士壓制住風龍王。
黑騎士係舊日支配者?唔係,如果係舊日支配者,應該無可能打得贏龍王。
但係,黑騎士完美咁壓制住風龍王,佢既實力比起風龍王仲勁。

「風龍王,讓開,交比我。本來我都唔想出手架。」
天照難得以嚴肅既口吻講。

黑騎士係外神?
唔係,如果係外神既話,應該唔止呢種實力。
而且,外神無必要扮成黑騎士。
究竟佢係邊個?

「癡線蜘蛛D蜘蛛絲癡住枝樹枝先生,女神黎啦,係時候逃走啦。」黑騎士突然開口講野。
逃走?
係講緊空間魔法?
但係對面係女神……

天照:「無錯,無論你逃走到去邊,我都會追蹤到你。」
黑騎士:「細心諗下啦,回憶一下啦,一定有個逃走到既地方……記得帶埋我走。」

去邊?
但係呢個世界無論去邊都會比佢追到。
咦?
仲有果到!

空間魔法!
帶埋黑騎士一齊走!
已有 0 人追稿