【苦】《英雄聯盟》 - 一件次世代既愛情工具: 《眼淚》
原來詩娜醉醺醺咁爬過黎，只係想拎我身邊既遙控器去開電視…
等我仲以為佢真係酒後亂性添，原來酒後心邪果個…係我先真。
當詩娜全神貫注地睇電視既時候，我望一望隻錶，原來…已經差唔多凌晨三點。
雖然我聽日係返晏姐…但佢再唔訓既話…恐怕我都無機會離開。
就係呢個時候。
『唔…』詩娜迷迷糊糊地按著遙控：『都無野睇既…』
我一留意到佢想撳個遙控轉台既時候…！
「喂！」我立即躍到床上：「唔好撳呀…！」
『下…？』
吱——
『Oh…oh...yes!oh yes! Fuck me!....oh!!I'm coming...coming!!』
此時此刻，由於我太匆忙想搶去詩娜手上既遙控，結果反而弄巧成拙，
我唔小心將詩娜撲到在床上，而且…我地既位置仲非常之尷尬。
我雙手就正正按係詩娜既頭旁邊，雙眼默默地凝視著佢…
詩娜亦被我既舉動嚇到呆左，只係瞪大雙眼一動不動的與我對望著。
更重要一點，係我地身後既電視都不斷播住呻吟既叫聲。
場面不單止尷尬…甚至彷彿連我倆之間的空氣都凝結了一樣。
整個房間、連同隔離房都縈迴淫蕩既聲音，不絕於耳。
「對…」我即時彈起，回過神來澄清道：「對唔住…我只係驚你轉左去ＡＶ台…」
『唔…唔緊要…』詩娜亦尷尬地望向旁邊，不斷地弄著被我整亂的頭髮。
「我都係熄左佢喇。」我拿起遙控：「Sorry…唔記得同你講呢度會播呢啲野…」
『唔緊要…』
由岩岩我撲倒詩娜果一刻開始，詩娜不單止臉紅…而且仲好似變左個機械人咁，
淨係識講「唔緊要」，老實講，我真係以為嚇傻左佢。
因為以佢既性格，我仲以為佢會一手推開我，然後再不斷打我黎出氣…
點知…我預期既事…全部都無發生。
「咁…」我關上電視後說道：「不如熄燈訓啦…？」
『好…』詩娜想了想後，續道：『咁你呢？…』
「放心，」我站起來，走到門口的燈掣位置：「我等你訓著左先走…咁你放心啦？」
『好…但…但你…！』
「知喇，」我打斷詩娜道：「唔準行近你一米範圍以內嘛？」
『仲好講…』詩娜稚氣地鼓埋泡腮：『頭先你犯規我都未鬧你…！』
「Sorry囉。」我敷衍後，接著說：「咁我關燈架喇？」
『嗯…。』
啪—
『呀～！！』漆黑中忽然傳來詩娜的尖叫聲：『咁…咁黑既？』
「下…」我對著她的方向說：「咁關燈係咁黑架啦。」
『開返…開返佢先呀！』詩娜焦急地道。
啪——
「又會咁大個人都怕黑既…」我喃喃地說。
『咁…咁…點同喎…！』詩娜嘟起小嘴解釋道：『正常都會有少少光線架嘛…！我點知會咁黑架喎…衰人！』
其實又難怪詩娜會咁意外既，因為呢間酒店房唔同一般旅遊既酒店。
嚴格黎講呢度係一個密室；無天花，無窗戶，甚至連門口都無光線透入，難免會令詩娜感到害怕既。
不過，當然亦有另一個貼心既設計。
我開返燈後，再慢慢扭動開關掣旁邊的圓形掣，然後整個明亮的房間…便開始慢慢的昏暗起來。
「點呀～」我得戚的說：「而家暗暗地…有冇好啲？」
『好…好好多……』詩娜稍稍安心的說。
「嗯。」
『係呢…』詩娜蓋上棉被，露出雙眼問：『咁你…訓邊…？』
「我？」我慢慢走到她床邊：「訓地下囉。」
『哦…』詩娜呢一刻就好似小貓咁溫柔。
我躺係地上，幸好，有條毛巾墊住都唔算太凍。
只係望住個陌生既天花板，感覺…有點寂寞。
因為，平時黎到呢啲地方，經常都會大戰一輪到力竭筋疲先肯罷休；
果陣時既我，仲邊會咁得閒望住個天花板呢？一早就訓左啦。
只不過…今晚就好唔同。
今次係我第一次係無扑野既情況之下，黎到時鐘酒店訓覺。
儘管我行左成日已經身心疲累都好，唔知點解我始終都係訓唔著。
可能我想等到詩娜訓左再自己離開，又可能係…身邊有詩娜係度…令到我個心忐忑不安。
拿，事先聲明先，我唔係心邪呀，只係…只係…
屌，點講呢？
就好似讀書果時，假如你身邊坐左一個你一直暗戀既女仔咁，
只要佢係你身邊，無論你平時點懶散，點懶訓都好，唔知點解都會特別精神，
好似每一分鐘都想表現自己，吸引佢注意你一樣。
而家既我，正正就處於呢種狀態。
正當我嘗試好努力咁去訓覺，唔好諗其他野，怕自己做錯野時……
『喂…』
係伸手不見五指既昏暗環境中，我聽見詩娜的聲音。
「做咩？」我躺在地上，望著天花板道。
『冇……』詩娜頓了頓，接著說：『你訓著左啦…？』
「係呀，我訓左啦，而家發緊開口夢同你講野。」
『任天衡…！』詩娜依舊用那小朋友的聲線道：『你而家算係串我咁話喇喎……！』
「哈哈…唔係…講下笑之嘛…」
呢種感覺，真係好奇怪。
係漆黑既環境中，聽見另一個人既聲音，而且，你知道佢仲係你身邊，而你又見唔到佢。
嘩屌，簡直同撞鬼一樣。
有人講過，愛情同鬼一樣；相信既人多，遇見既人少。
我到呢一刻終於明白呢個道理。
「你呢？」我打破冷場道：「你仲唔訓？」
『我訓唔著……』她語帶尤憐的說。
「飲左咁多酒都訓唔著？」我反問。
『係呀…我都唔知點解既…』詩娜想了想後接著說：『不如咁呀～？』
「又點？」我有種不詳的預感。
『任天衡……』詩娜罕有地用溫柔的聲音說：『不如…你講故仔比我聽呀…？』
「講故仔…！？」我聽後哭笑不得：「仲細咩？…講咩故仔啊…」
『我唔理呀…！』詩娜稚氣地鬧著彆扭：『我要聽故仔……』
「故仔……」
喂大佬，一時三刻邊度搵個故仔講比你聽呀…？
不過，我只好運用急才去講，將我畢生所學一次過串聯諗一個故仔出黎。
「想我講都得，」我奸笑了一下：「但你要有心理準備喎…！」
『喂呀…！』詩娜妮聲道：『唔聽鬼故呀…！』
「放心啦，唔係鬼故黎。」
『咁你講啦…』詩娜心有餘悸的說。
「拿，咁你聽住喇…」我想了想，吸一口氣說：「從前…有個女仔，佢叫詩娜喎——」
『咪住先！』詩娜打斷我：『做咩會同我同名架～？唔準啊…改過第二個…』
「喂～你係咪想聽故仔架，咁多要求既。」
『唔準呀…唔準呀！』
「佢都唔係你果個詩娜。」我解釋。
『咁係邊個丫咁…？』
「死屍個屍，拿破崙個拿。」我忍笑說。
『哼…』她語帶嫌棄地說：『咁你講喇…煩…！』
都唔知係佢煩定我煩。
「咁你聽住啦。」我續道：「從前有個女仔…佢叫詩娜，識左個好窮既男仔…叫———」
『唔會係任天衡掛？』詩娜插嘴道。
「唔係，佢識果個男仔叫任天堂。」
『嘻嘻～』詩娜忍不住甜笑著：『咁你繼續～』
我接著說：「詩娜識左個好窮既男仔叫任天堂，好快，佢地就一見鍾情，開始拍拖喇。」
『嘩…』詩娜驚訝的說：『乜果個「屍拿」咁無品味架，揀左個姓任既男仔拍拖…比著我就一定唔會喇～呵呵。』
我繼續講：「咁之後話說有一日，到左佢地既拍拖週年紀念日，任天堂一早就起身，準備出門口去買禮物比詩娜喎。」
『之後呢？』詩娜好奇地追問。
「之後…」我想了想：「好窮既男仔買完禮物之後，滿心歡喜地交到詩娜手上…但點知詩娜望左一眼後就即刻好嬲，一手掉左男仔既禮物落垃圾桶。」
『點解既…？』詩娜追問：『個男仔送左啲咩啊…？』
「個好窮既男仔送左一隻鑽石戒指比個女仔。」
『咁…點解要掉左佢…？』詩娜移到床邊，向著我問。
「因為…個女仔以為個男仔係偷返黎既。」我解釋：「所以…個女仔就好嬲咁掉左落垃圾桶。」
『跟住呢～？』詩娜瞪著水靈靈的眼睛問。
「之後過左無幾耐…個男仔…就死左喇。」
『死左～～？』詩娜聽到一頭霧水：『點解架？？太傷心？？』
「唔唔……」我搖搖頭說：
「因為…個男仔唔止窮，而且更身患絕症，知道陪唔到個女仔好耐…只係想係最後呢段日子，可以留返一個美好回憶比個女仔，於是，男仔就決定係紀念日買隻戒指送比女仔。但無奈地，自己根本無錢，所以…就賣左自己既器官，將換返黎既錢去買戒指，希望女仔會將隻戒指永遠留係身邊，就好似…男仔對女仔既呢份愛一樣。」
『………』
「詩娜？」我坐起來：「做咩啊…？」
『嗚嗚……任天衡…！』
即使係漆黑之中…我仍然看見身旁的詩娜眼中所閃耀著的淚光。
「做…做咩…？」
『任天衡…！』詩娜雙眼通紅，流著淚說：『我唔會要你隻戒指架…！仲有…仲有…無我批准…你唔準死呀…！』
「傻瓜…」我尷尬地笑著：「咪話左係故仔黎囉…？傻左咩…？」
『我唔理呀…』詩娜扁著嘴，扭計的說：『任天衡你無我批准…唔準死…唔準離開我…知唔知…！』
「都話故仔黎咯……」
『應承我呀…！衰人…！』
「哦…」
我完全無諗過…隨口講個故事都會整喊佢。