【第三者】《只不過有些感覺，不到我來控制》: 十一
(十一)
「咁點呀，我地仲玩唔玩？」Hinson望住我地兩個
「我有啲肚餓」我lunch都無食
「喂去食野呀不如」Hinson即刻講。
我地兩個將目光都放左係雪瞳身上。
「我無所謂呀」
「咁行囉！」Hinson講完就一支箭咁衝左去行頭，再次剩低我同雪瞳一齊行。
唔知係咪岩岩拖手既事令大家有啲尷尬，所以雪瞳一直dup低頭都無出聲。
「吱～」我打開手機屏幕，見到呀琳wtsapp我。
「Yoyo我幫你搞掂左，但唔該你醒醒定定。」
「點解？」
「總之佢唔會話俾Ashley知喇，但你好自為之呀。」
我好疑惑，到底呀琳同Yoyo講左啲乜？
「咁多女仔搵你呀」原來雪瞳見到呀琳搵我。
「女朋友啲fd黎咋，岩岩見到個個，我同佢無野」
「咁緊張解釋做乜」佢笑左一笑
係喎，其實我唔洗同佢解釋咁多。
但係，我唔想佢誤會。
不經不覺我地已經去到公園入口位，亦姐係出口位。
「食咩好呀兩位大佬」Hinson另過黎笑笑口咁問
「就你地呀，我都可以」
「不如出銅鑼灣食？」我望住雪瞳講
「... 好呀」佢笑左一笑
「行啦！」Hinson帶頭出去搭車
呀宇同Hinson都係住柴灣，唔通佢係想就我先出銅鑼灣食？
「其實銅鑼灣有咩好食」
「其實我住左就黎廿年都唔知」我笑住咁講
「妳真係路痴黎」呀宇話
「係咪唔得呀」
「唔係唔係，唔識路咪打俾我，港島線我都幾熟。」佢又係一路望住個天咁講。
最後，我地去左打邊爐。
「shit！死啦我唔記得帶鎖匙」我突然醒起今朝出門口個陣無帶鎖匙。
「你屋企無人咩」Hinson話
「老豆老母去左澳門，我呀妹呢兩日去camp呀」我好懊惱咁講
「妳無帶鎖匙咪姐係今朝無鎖門」呀宇微微另過黎望一望我。
「我個妹今日先去camp呀，佢遲過我出門口」
傲言住係天水圍，我地食埋野都差唔多十二點幾一點，尾班車都趕唔到，呢一刻我真係諗過唔通我今晚要訓街？
「唉，唯有問下呀wing可唔可以收留我一晚」我即刻打俾呀wing
「喂，咩料呀」佢一聽電話已經用佢個個好串好大佬feel既語氣問候我。
「我無帶鎖匙呀靚女，今晚借你屋企訓得唔得」我扮喊聲
「下！我係呀峰度訓喎今晚！」
「呢度無你既事啦，拜拜施小姐。」
「sorry囉，咁妳點呀」
「可以點，依家狗衝緊去鵝頸橋底霸位。」我好無奈咁講
「屌，認真呀八婆」佢笑住咁問我
「唔知呀，我再問下其他人囉」我嘆左口氣「鬼叫我少fd咩唉」
「扮乜呀，你小心啲呀！」
「你唔介意既話，去我度訓囉。」我收左線之後，呀宇對我講，同時間佢既目光無離開過鍋中既肥牛。
「都得喎，都唔係好遠咋嘛」Hinson即刻附和呀宇。
「會唔會... 唔係咁好呀」我遲疑左一陣
「唔會啦，我訓地下，讓張床俾你訓咪得」呀宇呢個時候抬高頭望住我。
如果俾傲言知道左，我死撚緊。
但如果唔係既話，我諗我真係要訓街。
去唔去好。
「呀宇自己一條友住你唔洗驚阻到佢架喎」
「妳唔係驚我會食左妳呀嘛」呀宇笑左一笑咁講
「先唔係囉... 我係驚我男朋友知咋」我望住個電話，到依家傲言仲未覆我機。
「屌，你唔講我唔講呀宇唔講佢鬼知咩！」Hinson一路夾起舊雞子一路講
我又唔係做啲咩，我諗... 無事既。
「... 咁好啦，咁麻煩你啦」我抬頭望住呀宇
「都差唔多十二點啦喎，走未呀我地」呀琪撓住呀敏講。
「... 哦，好呀，走啦」呀敏仲係心不在焉咁
「我去廁所先」呀軒對住我講講，同時拍左我一野
「我都去。」然後我地兩條友就走左去廁所
「你同呀敏岩岩搞咩黎。」呀軒一入到廁所即刻問
「咩呀」我扮無知
「你仲扮，呀敏岩岩對眼紅曬，仲有說好的donald duck呢？岩岩你去個間紀念品店係賣toys story野架白痴！」
「...」
「你唔好同我講你鍾意左佢呀」呀軒好認真咁問
「屌我都唔知呀，但我發覺呢排我同雪瞳見得咁少，而且上次嘈完之後好似怪怪地咁。」
我諗番起前幾日同雪瞳係譚仔求婚既片段，其實又係咪心底話。
定抑或係內疚，係想氹佢所以先咁做？
「你呢期有同雪瞳嘈交咩，無聽你講過」呀軒望住我問
「咩呀，我同過你講架喎... 呀... 好似係同呀敏」我諗左一諗
「無得救架啦你，依家呀敏緊要過女朋友，緊要過兄弟」呀軒用好失望既語氣講。
就係雪瞳去船p前兩日，我同佢嘈完黎，就係因為呀敏。
個日我要做project，呀敏係圖書館陪我，但我就同雪瞳講係同呀軒一齊。
雪瞳個日想俾驚喜我，偷偷地黎左圖書館搵我諗住陪我做pj同埋見我。
但係就俾佢見到呀敏坐係我隔離。
佢行左埋黎，然後企係我面前望住我。呀敏見到，呆左一呆咁拍我。
我抬高頭，窒左一下。然後我拉住雪瞳出左圖書館。
「岩岩個個邊個黎架」雪瞳用好平靜既語氣問我
「同學黎架...」心虛既感覺原來係咁
「哦...點解同學要攬腰既」佢直視我，無表情咁講
「岩岩係入面佢話凍，所以... 對唔住呀bb」我攬住佢。
但係雪瞳一下推開我「咁呀軒呢？係邊？」佢繼續望住我
「...」我答唔出
「佢話凍你就攬佢？咁我凍係咪就可以是但搵個男同學攬先？」雪瞳不自覺提高左聲浪，吸引左幾個岩岩行出圖書館既同學。
「妳過黎先」我拉住佢衝左出去
「你怕俾人見到我同你嘈交，咁點解唔怕俾人見到你同個條女咁親密呀」雪瞳一下甩開我隻手。
「... 對唔住，我知我唔岩啦」捉番住佢雙膊
「你俾我冷靜下，你今晚做完project 先搵我」雪瞳對住我講，然後佢就頭也不回咁離開左圖書館。
「件事就係咁」我講完之後直視呀軒。
「姐係佢地正面交鋒過啦，唉，死性不改，無得救架啦你。」呀軒搖搖頭，然後就行出廁所。
以為嘈交，雪瞳都會同我一齊爆seed鬥鬧，但上次呀敏單野，好平靜就解決左。
個晚番到去，我即刻wtsapp打左一大篇道歉俾佢，然後打左俾佢同佢say sorry。
出奇地雪瞳已經無事，成件事佢隻字不提。雖然好奇怪，但我都無多問，廢事又爆發第二次世界大戰。
「去廁所去咁耐架你地，仲耐過我地啲女仔」出到黎，呀琪笑笑口咁講
「傲言跌左落屎亢呀嘛」呀軒隨口講
「好核突呀你」呀琪笑住咁拍左佢一下
「我走先啦，太夜無車」呀敏突然開口講
「咁我都走啦」呀琪望一望手錶「咦你兩個順路喎，送呀敏番去啦女仔危險」
「唔洗啦，我走先啦」呀敏講完，就諗住走
「一齊走啦。」我拉住佢隻手
我feel到，呀軒望住我。