唔係掛！原來真係有鬼！－現代捉鬼故事: 第六章－起步－4

隨住呢一下聲音，
Reception 既姐姐突然化為千萬個光點，慢慢一點點地飛散於我地面前，
並o係我面前化成一空氣中既微塵，慢慢散落。

「你做乜春呀！」Office 內傳來一把女聲，似乎對師傅呢一下有所微言，
well...其實都唔只係 『微言』。

一個同reception 姐姐 樣貌有幾份相似既女仔由office 內部一步步行出黎。
沒有低胸,沒有摟屌裙。
相反係一件大size 既骷髏頭tee，下半身係一條黑色legging 同一對窩釘converse。




妝容方面亦比頭先既reception 姐姐有所收減，最起碼我唔覺得「銀」眼先。

「Jessie 姐，咁早呀？」師傅舉手同眼前既型格女仔say hello。

「早你老味呀！遲成9個字，一返黎就拆我個分身符，仲o係度阿之阿左！仲有呀，姐乜春呀姐，我唔係大你好多架咋！」
原來門口既係呢位Jessie既分身，難怪十幾分鐘入面，可以坐定定郁都唔郁。

「好喇好喇，好既，解你個分身係我唔o岩。不過點都好，為你介紹，呢個係新黎既見習生，阿俊。」師傅為Jessie 介紹。

我亦對呢位前輩做出９０度鞠躬，一方面係為左表示我對前輩既尊重，而另一方面係為左未來師傅就算同呢位Jessie 有咩牙齒印，都唔好燒到自己。





「好心你學下人啦，你睇佢幾有禮貌！」Jessie對師傅破口大罵。

「Hello 呀，我叫Jessie Ma，叫我Jessie 得架喇，以後有咩唔明問我得架喇，千其唔好比ｄmk仔教銀壞你呀。」Jessie 拉住我既手同我握一握手，態度直頭同頭先有關180度既改變。我唔知Jessie 同師傅以前有咩過節，不過就咁睇佢都唔似一個咩壞人丫。
 我被安排坐o係office 既近門口既位置，
新仔多數都係坐呢ｄ位架喇。
一來個moon 又比咁多位老前輩睇曬，二來第時如果真係要接客既話都係d新仔做。
不過唔知分身符應該可以幫手接埋客，就好似我第一次上黎o個時咁。

我坐左o係電腦前面，第一日返工，又未有工作，




作為新仔既我當然係坐到直一直，好好咁扮下野。

「喂，拎住。」身後傳黎左一把聲，
一把咁唔客氣既男仔聲，唔駛問都知係師傅。
師傳拎左個地拖，單手遞比我。

「下？做咩事？」我呆左望住師傅，
我著到咁靚仔，唔係要我打掃掛？再者，公司乾淨到睇落一粒塵到無，
試問我點可以將一個一塵不染既office 打掃得更乾淨呢？