「我收好D野先!扮我冇黎過!」
Smoky 隨即打算起身,將蛋糕收好,之後回避我老豆。

不過我明白,就算點避都冇用,老豆可能已經一早喺門後面已經知道Smoky 嘅存在。再者,醜婦終需見家翁,除非未來都係諗住瞞住老豆,
否則比老豆見Smoky 都只係時間問題。

我緊緊拉住準備起身嘅Smoky。

「唔好玩啦!比你老豆見到我就大鑊喇!」Smoky 回頭說。
Smoky 面上慢慢流露出焦急嘅神情。





「應承我,」

「咩呀?呢d遲d先講啦!」Smoky 一直想掙開我嘅手。

「今日開始,以『人』嘅身份生活啦。」

「下?」Smoky 被我既說話搞到一頭霧水。

屋企嘅大門緩緩打開,一個我今晚最唔想見到嘅身影亦出現喺我同Smoky 眼前。我將右手微微往後撥,示意Smoky 站於我身後。始終有d說話,兩父子自己講比較好。





「呀!你有朋友呀?仲等我買左個生日蛋糕比你添!」

「哈哈哈....係呀....咦?個蛋糕呢?」我一面拉出更多話題,
一面將Smoky 收於我身影之下。

「頭先坐車肚餓食鬼左喇!」

老豆坐喺梳化另一邊,一面將佢對唔知幾耐冇洗過嘅New balance 除下。
我坐於Smoky 同老豆之間,一方面用幻術希望可以令老豆減低對Smoky 靈力嘅感應,另一方面點都隔一隔好d嘅。Smoky 亦瑟縮於我身旁,不敢亂動。





「做乜唔介紹你朋友比我識呀?」

「呀....我朋友坐一陣架咋,就走架喇~而且又唔係咩人,唔駛介紹啦...哈哈哈。」
「係?」老豆話口未完一個閃身就企左喺Smoky 面前,
即使被師傅訓練左差唔多成年,我亦完全反應唔切,
應該話,我冇諗過老豆會有此一著,更無諗過佢身手可以咁快。

「你好嘛?妹.妹。」 老豆特意將妹妹兩個字分開讀,
証明佢一早已經睇穿我嘅戲法。

「唔係你諗架老豆!佢冇惡意架!」我立即企於Smoky 同老豆之間。
Smoky 雙手搭於我膊頭之上,剩係靠對手我嘅震動已經感覺到佢有幾驚。
佢為左我先上黎送蛋糕,我唔可以白白比佢魂飛魄散。
因為佢留得低,一定有心事未了,我唔可以比佢就咁走。





我堅定咁望住老豆,雙臂大字型打開。
老豆輕描淡寫咁企起我面前,無特別動作,亦睇唔出佢下一步。

不過咁嘅人先係最恐怖。


「你覺得你阻到我咩?」老豆雙目如鷹,
緊緊咁盯住我。

「阻唔到!不過我都會試!」