「如果一陣檯底有D乜野,我諗你一排都唔駛再開鋪喇。」西裝佬語帶威脅地同我講。

要喺廟街呢種龍蛇混集之地安全咁擺檔,
當然你要同呢度嘅"地主"有兩句,同埋你要識做。
"飲茶錢"、"地租"呢D當然少不了,
另一方面就係你要識做,要聽聽話話。

如果唔係每個星期有幾位"龍哥虎哥" 走過黎同你個檔口裝下修你都幾係野。
好似我呢D冇乜生意嘅二打六,分分鐘做幾日都COVER 唔番條數。
而更嚴重嘅就真係好似呢位西裝哥哥所言,以後唔駛喺度擺檔。





西裝佬恐嚇完一輪之後,慢慢走到帳幕中唯一嘅檯背後,蹲低自己的身體。
左手抓住檯布嘅一角,而右手則伸到西裝褸中,
好似想拎出甚麼特別嘅武器,但又怕被我發現,所以就只係將手放於左胸的口袋當中。

我企喺檯嘅另一邊,半隻腳已經踏出帳幕。
準備一陣西裝佬一打開檯布,當佢地兩個相認之時,
就正正係我走佬之日。

老老實實,我真係冇諗過個西裝佬做野咁比心機又細心,




本身諗住講兩句打發佢走就算,
但當見到佢對佢工作咁有態度嘅時候,
我地唔好意思介入兩位...甚至乎係更多位嘅相認派對。

「蓬!」

黑色檯布應聲翻起,我亦準備聽到兩位相認嘅信號一響起之時,
就立即拔足而逃。
不過西裝大哥跟住落黎嘅說話反而令我嚇左一跳。





「又無!我X!都唔知條友死X左去邊!」西裝佬用佢把沙啞嘅聲發出一陣陣埋怨。
西裝佬將一張卡片放到我嘅檯面,繼而一步步離開走到我面前,
再次將佢手上其中一張巢到唔可以再巢嘅A4 紙伸到我面前。

「再如果見到呢條友,打呢個電話!」

「....哦。」

西裝佬聽到我嘅回應之後,就離開左我嘅帳篷,向下一戶人家進發。
幾個西裝佬一個一個帳篷咁搵,十幾分鐘後,當我再望出帳篷之外,
已經唔再見到佢地嘅身影。

我坐番埋我張檯後嘅膠櫈。

「出黎啦,人地走左喇。」




我對住西裝佬查看完,"空無一人"嘅檯底講。

帳篷內除左我自己嘅呼吸聲之外,再無任何聲音,
似乎我嘅問題並未有得到任何回響。

我對住面前呢張小小嘅木檯,用力敲左兩下。
「我知你仲喺度,你嘅幻術呃到其他人,
但要瞞過我,就真係仲有些少距離咁囉。」

男人小心地從檯布邊打開了一條空罅,先偷窺帳篷內情況,
之後再慢慢由檯底爬出。

「我就幫左你喇,巡例話下比我知咩事得唔得先?」