唔係掛！原來真係有鬼！－現代捉鬼故事: 第九章 - Showtime - 25

「人地溝鬼妹呀！似你咩，落左去十幾年又係毛都冇條。」師傅喺我地旁邊叫道。 或者我真係太天真，以為講野細聲少少師傅就會聽唔到，但係連我自己修為咁淺都可以偷聽到巴士上面坐對面嘅港女肉麻對話，師傅又點會聽唔到我喺Owen 耳邊講野。
「嘩，咁你自己真係小心D。」Owen 提醒說。「其實陰間個潮流都同陽間差唔多，你拜山都見到D smartphone 呀、Tablet 呀咁，你小心你女朋友睇完ｄ韓劇又叫你用超能力熜燈呀。」Owen 笑說。

我仲以為Owen 講既小心係指叫我小心Smoky 會對我不利，原來佢係講呢樣。

「咁...師伯，我可唔可以問多個問題？」

Owen 開始唔再抗拒被我叫做師伯。
「你想問乜先？」





「點解.....」

「嗯？」

「點解你唔投胎？」

Owen 聽到後，苦笑了幾下。
「即係咁，唔係我唔想投，如果可以投嘅話我一早去左排隊，
問題係，我投唔到。」Owen 說畢，又唉了一口氣。





「下？點解嘅？」

「都幾難解釋你聽...」Owen 縐了縐眉。
一面思考如何可以解釋得更為簡單。

「我講啦。」師傅再次搭咀說。「即係你依家見到呢個Owen，其實佢又唔可以叫佢做Owen 喎！」

「你講乜呀...」就連Owen自己也被師傅搞到一頭煙。

「最簡單咁講，呢條友死嗰時，唔知點解，個靈魂分左兩份，




一份就比D鬼差捉左去投胎，而另一份就留左喺人間。而每個人投胎亦只有一次機會，
咁個胎位比人用左喇，佢就投唔到胎咁囉，我解釋得好唔好呀Owen大師？」
 「大約係咁啦。」Owen苦笑道。

「咁你有乜方法可以再投胎？」我再問。

「等我另外一part死多次，我諗就可以同佢再排多次。」Owen 答。

「下，頭先又話每個人得一個胎位嘅？」
「所以咪有雙胞胎囉醒目仔！」師傅借機會立即抽一抽我水。

「哈哈哈。」Owen 也忍不住笑了笑。「我差唔多夠鐘喇，係時候要返落去喇。
我呢個朋友唔識照顧自己，你做佢徒弟既，得閒幫我睇住佢。有機會就幫佢同你師母搭下路啦，哈哈。」

我笑了笑，點了一下頭。





「咳咳！兩位，其實我聽到架。」師傅立即咳了兩下。

「走喇我，下次唔好等比人打到爆曬血先叫我出黎啦，
早D叫都得嘅o者。」

「你知唔知你D 金幣幾貴呀大佬，你每個又只可以用一次，叫你出黎一次我冇左大半份糧呀。」師傅抱怨道。
 「無計啦，最緊要...」

「型嘛。」二人伸出了自己的右手，向對方的拳頭輕擊了一下。
眼前的白色劍士突然幻化成一點一點的白色光芒，向師傅的右手飛去。
光芒環繞著師傅的右手、掌手打轉。最後也全都飛到師傅的拳中。

師傅打開了右手，已經沒有半點白色光芒，只剩下一個黃金色的籌碼。
原來白色劍士的位置，人已經消失得無影無縱，地上亦只有一把白色的長傘。





「唔叫你出黎唔係因為貴呀兄弟。」師傅對著黃金籌碼自言自語。
「而係...我已經欠你太多。」