唔係掛！原來真係有鬼！－現代捉鬼故事: 第一章－離別訣－4

阿媽意外之後，阿爸變得比之前更加少講野，
頭六日入面，我同阿爸亦一句說話都冇講過。
 我都係一個打工仔，我亦都要返工。我唔會比自己既感情太影響自己工作。

講就係咁講，但係阿媽既意外對自己點會冇影響，
呢一個星期，返工我搏老命，連同事都以為我想搏升。
但係試問一個文員仔又點會賣命丫。 

【I love fried rice ~
I love noodles~




I love Chow mein~
Chow Mo-Mo-Mo-Mo Mein~ 】

突然空氣中傳黎一首煩膠歌，
一首被喻為可以打敗Friday 既神曲。

冇錯，係我既鈴聲。
本身覺得呢首歌真係夠曬膠，
如果經理有時放工打黎，聽到個鈴聲都冇咁噪。





但係呢個情況之下聽到，或者我真係讀得書太少，
我真係搵唔到字黎形容我呢一刻既心情。



「喂。」

電話另一邊既男人，以完全談唔上係人聲既語氣打開左話題。
 「今晚係你老母頭七，早Ｄ返，我煮飯。」





「哦。」

呢7日入面，我同我老豆既說話亦只有呢三句。
收線之後，我停左手上既工作，想靜低落黎，
想抖一下。


但係對眼似乎唔太聽話。
一滴，兩滴，三滴，可惜我已經笑唔出。