唔係掛！原來真係有鬼！－現代捉鬼故事: 第四章－達德行－20

我同紅色靈體對望左好一段時間。
唔係有心望，只係我唔知可以做ｄ乜。

每個靈體都可以見佢大約既形狀，
只係見唔到佢地既 『人樣』。
紅色靈體帶領住”學生們”，
一個跟住一個咁，
慢慢咁向住我地身旁既樓梯方向行埋黎。
彷彿就好似學校早上集會完後，學生一個跟住一個咁走上班房。





「走啦仲望！」Smoky 拉住我向我地身邊既樓梯跑，
希望可以襯 『學生們』去到樓梯之前，快過佢地落到地面。

我地一行七人拔足就跑，
可惜去到第一個轉角位既時候，我地已經見到學生們行緊上黎，
阻擋住我地既去路。

學生們個個面無表情...唔係，
係面無五官先真，向住我地慢慢行埋黎。





「返轉頭！快！」一路被封，
我地依然可以行返我地上黎既路，
原路離開學校，呢個係我地依家剩底既唯一方法。

我地幾個立即跑番上頭先既走廊。

「快ｄ跑！去番頭先我地黎既樓梯落去！」

「哦！」Yan 聽完我講之後,立即比反應。
原來唔係所有女仔o係危險既時候，都好似d喪屍片既女主角咁，




只係識大叫大喊，或者只有金髮鬼妹先係咁。

如果我今次死唔去，我一定會搵個金髮鬼妹再黎多次引証我冇講大話。

一間、兩間。
我地跑過左兩間課室，離樓梯只剩兩間課室既距離。
三小花跑o係我地前面，
我只係拉住Smoky 向前跑，其他野之後先再理吧。

「救命呀！」後方突然聽到Bella 既叫聲。

「嗄....我跑唔到喇....」肥榮呢個時刻跪左o係地下。

「做乜春呀你，起身跑啦契弟！」恐懼已經埋沒左我既理志，
除左鬧呢個肥仔之外，我真係唔知可以做乜。





「佢好似扭親呀！」Bella 一邊喊，一邊扶住肥榮。

有冇咁老土呀！
比鬼追之後又扭親？
就係咁老土，有時人驚起上黎，真係乜都有可能發生。

「咁點呀依家？」Hidy 望住肥榮，再望望Yan，
期待佢會拎出一個領導性既答案。

「點？你一係就走，一係就幫我手扶佢入去班房！」我望住Hidy，
大聲咁喝。

大難臨頭各自飛，我唔會怪任何人。
如果任何人要走，呢個亦好乎合情理。





不過我決定留低，最起碼，我o係Smoky 面前，
比我扮一次型，比我o係我人生畫上句號之前，扮一次英雄。