唔係掛！原來真係有鬼！－現代捉鬼故事: 第四章－達德行－30

「我諗你地上得黎，都聽過我地學校曾經出過意外。一場大火，好多小朋友亦走唔甩，死於o個場意外。外間既人每一個都話我地辦學者點解唔好好救人，唔設計好一條走火通道比小朋友走？當時既輿論壓力，加上內疚，我決定o係學校入面，一個少人既地方結束自己生命。」 

「就係二樓女廁...」我細細聲講。 

「嗯。加上可能我對學校有住好深既感情，當我再有番知覺，我就發現我仲o係學校入面。而火災葬生既小朋友，好多都留左o係學校入面。所以當時我就決定，留守o係呢度，為小朋友供書教學，比佢地一個可以讀書識字既機會。」 

可能你話 ；死左都仲要讀書，ｄ小朋友真係冇陰公。 
但係一個校長，因為責任而付出自己既生命，死後亦留守為小朋友做事， 
呢個善心真係好多”人”都冇。 





「咁你頭先講既地產商呢？」 

「之前有好多人都想收左呢塊地去起樓，半山喎，點會唔打呢度主意。 
之前仲有公司帶左個高人黎想收左我同班小朋友。但係佢入到黎，話乜都見唔到，叫班地產商番歸，佢仲定時會黎幫我地睇住個學校門口，唔比D閒雜人入黎。」 
校長呢個時間用凌厲既眼訓望住我同Smoky。 
朱古力藥力開始慢慢消散，校長亦可以慢慢企起身。 

「哈哈...對唔住。」我苦笑點答。 

「校長，我有個小小既請求，可唔可以借呢個班房比我地，等我地班朋友醒番我地就會走架喇。」 





「你都入左黎啦，我有得話唔好咩？」校長一步步咁向班房門行過去。 

「多謝你，後生仔。」 

「下？」 

「多謝你頭先對我留手。」校長作左個90度鞠躬。 

「乜說話丫，哈哈。」我苦笑，如果比校長知道我冇料到， 




可能我已經做左佢學校既插班生。 

「我記得呢度可以睇到日出架。」校長企o係走廊上面回頭同我地講， 
「睇埋先走啦。」校長對我地報以微笑。之後佢亦帶領住學生，o係我地面前散去。 

「校長走左lu~」Smoky 走出走廊，左望右望。 

「好喇，」我收起笑容。 
我叼起一支由Smoky 頭先袋入面跌出黎既煙， 
右手用打手機將香煙點著。用力一吸，香煙末端隨即閃出淡淡火光。 
左手拎住兩粒Melty Kiss。 
雙眼望住香煙既主人。 


「到你喇，你到底係乜人？」