打打下丁比外星人帶走咗: ３－自己友？

人群中出現咗一隊類似軍隊咁嘅野，佢地嘅外觀亦都同其他人唔同。
佢地有啲似人類，著住灰色嘅皮草，同原始人差唔多。
唔通佢地係自己友？我開始見到希望

而班屎忽鬼好似起晒鋼咁，仲想脅持我
不過我需然係毒撚，但係我都學過下功夫
想捉我？冇咁易
所以我一手格擋咗佢，班原始人就乘機拉咗我上馬，離開依個地方
睇嚟佢地係一個比較強大嘅種族，果班怪物都唔敢同佢正面衝突





上咗馬之後，騎馬果條友就係咁同我講野
屌，都聽唔明佢講緊咩話
所以我都唔打算理佢，望下風景好過，過咗陣佢都開始冇癮，自動收皮

經過大約廿分鐘嘅馬程，我地終於到達一條小村莊。
啲屋同露營果啲camp差唔多，條村中間有條清澈嘅河流，旁邊又比樹木包圍住，同郊外啲camp site差唔多，間直係世外桃源

我落咗馬之後，就比人帶咗去最大嘅camp入面，相信係見佢地嘅村長

一入到去，就見到有個呀伯坐咗係中間個位度。




佢滿頭白髮，梳咗pat斜陰，帶住黑框眼鏡，留咗執白色羊咩鬍，係一個MK呀伯。
佢左手揸住碌有尖刺嘅木棍，右手攞住舊紫色麵包，類似叮噹入面果舊翻譯蒟蒻。
佢向我招手，示意我過去

我行到埋去之後，佢比咗舊紫色野我，做咗個手勢叫我食咗佢。
喂呀哥，我同你三唔識七，你比舊咁嘅野我我點敢放入口呀
佢見我唔想食咁款就開始有啲嬲，攞起碌木棍想fit落嚟咁
你知啦，毒撚係一種怕事嘅生物，多一事不如小一事啦
好喇我食喇
於是我一次過塞晒舊野入口，表示我嘅誠意。

其實食食下又好似幾好味咁喎
所以我就問：「嘩好味呀，我想攞多舊今晚做宵夜得唔得呀」

唉呀，唔記得咗佢地聽唔明嘅添
正當我冇打算收到任何回覆嘅時候，個呀伯出咗句聲