孽緣-惡夢的開始

2012年9月
升上高中每個人應該都會好期待 因為有新嘅環境新嘅同學 因為高中會因你嘅選修科而分班 所以就會將本來初中同班嘅人拆散晒 我本身有四個好姊妹 阿E同水晶分左去C班 我同比比同Jenny就同一班 F班 總之因為我哋三個唔想讀英文教嘅選修科所以我哋就揀咗中國文學嚟讀
C先生係repeater 又係因為懶得讀書所以都係揀咗文學讀 順理成章我同佢就變左同一班
我地個班好小人 3個係半個大陸人1個係北京妺 所以佢地4個文學成績都好好。而我同比比同Jenny成績都係好一般 我地7個個都係F.3升上嚟 而C先生同個陣時嘅好兄弟肥仔fd同埋長期唔會點出聲嘅一個自閉仔都係repeater.

肥仔fd -好鐘意cosplay,好鐘意一句說話打wwww(其實到而家我都唔知點解架 咮)
唔知中學嗰陣係咪好會鐘意有呢啲組合 C先生高高瘦瘦咁 而肥仔fd就係肥肥嘟嘟咁囉



成班得10個人 所以個班房都係好空 不過開學到合班前我都係坐C先生前面 點解會合班?因為小人囉 後期開左學幾個禮拜左右我地就同E班合班. 冇錯就係呢幾個禮拜我哋五個人變得幾fd.應該係話佢哋三個friend D. (Jenny,比比同肥仔)
開左學都唔夠幾日 我哋5個就開左所謂嘅班group. 佢哋三個加埋我同C先生,不過係個wtsapp group 我同C先生都好小講嘢嘅。基本上我就算坐C先生前面我同佢都冇乜交流。我個陣喺學校其實真係算好乖 完全冇記過缺點 就連口頭警告我都冇一個 初中又係班長 成績永遠都係排頭五(雖然嗰陣時我個班唔係精英班)不過都算係咁啦。

C先生個陣係會攞埋個變身器返學 咩矇面超人個d呢 總之我唔係好識欣賞啦 嗰陣真係覺得佢好on9同好毒L。 同埋有時候呢佢係前面聽到佢哋後面講嘢 我都已經對佢哋冇乜好感,直至到有一日我哋要填自己個人資料
C先生:(拍拍我膊頭) 填完啦幫我傳出去
我:哦 (唔小心望到佢屋企地址)
我:下 你住###架?
C先生:係啊做咩?你又係住###咩?
我:唔係呀 我以前幼稚園同小學先住嗰度 冇諗過同你同一棟樓
C先生:咁可能我哋細個見過都未定 因為我係由細住到大


我:可能啦 哈哈

無錯就係因為呢個話題 我同佢係學校先有小小嘅交流
另外因為我哋學校係山上面所以我哋係要搭校車架 其實講到呢度唔知你估唔估到我係咩中學呢 哈哈。我諗其實唔多中學係需要搭校車嘅! 我同C先生住得比較近所以我哋係同一架校車 不過我早佢幾個站上車。點知有一日等緊校車嗰陣唔好彩中咗雀屎 重要我上到車先知 好中唔中淨係中咗係我條校裙度(前面)
我又冇買水 所以嗰陣我即刻係個WhatsApp group度叫C先生幫我買水 等陣上校車俾我。當我見到C先生上校車嗰陣我好開心 因為我好想快啲攞啲支水清理返我條校裙
平時校車我唔係同佢坐 不過我叫去幫我買野所以佢坐我隔離。
我:水呢?
C先生:冇買
我:下 (我心諗 你冇買就唔好坐我隔離啦 我即刻用個袋遮住 個pet雀屎)
C先生:做咩今日無端端叫我幫你買水


我:冇....因為食嘢嗰陣時d豉油滴左落條校裙度(求其講左個大話 因為講中雀屎真係會好樣衰)
C先生:哦 (之後拎左個電話出嚟打俾人)
(把聲仲要激溫柔 應該係嗰陣時佢嘅女朋友)
(打完電話之後)
我:哇 你把聲使唔使轉得咁快 超溫柔囉
C先生:係咩哈哈 如果你做我女朋友 我把聲都係咁溫柔架
我:收皮啦你

之後就唔記得講左啲乜嘢 不過應該都係無聊野黎嘅 自從嗰日我哋日日朝早撘車佢都會坐我隔離 所以我哋傾嘅計就多咗大家自然就熟咗。

仲記得有一次放咗學我哋五個一齊去唱K 唱K過程中都係嘻嘻哈哈咁過 但因為我同C先生住得近所以我哋兩個一齊返屋企
C先生:撘車之前陪我去鋪頭拎返d啊?
我:好啊
鋪頭姐係C先生返part-time嘅地方
我喺門口等C先生 之後見住C先生攞咗一袋野出嚟


我:咩嚟架
C先生:我前度俾我架
(袋嘢入邊有糖 有封信同埋有一條自己積嘅頸巾)
C先生俾咗封信我睇 都係話放唔低你 好愛你嗰啲啦 之後C先生將成袋野扔咗落垃圾桶
我:點解要扔咗去?
C先生:是但啦
我:哦好啦
本身C先生話要送我返屋企 送我落車 但我都唔想佢送 所以我就自己講左句拜就走左嚕 因為覺得呢個人好奇怪 感覺上好似好多女朋友 一個接個。

我哋嘅關係一日比一日熟 不過咁岩嗰陣有一晚我同屋企人嘈交 我就好mk咁打上ig呻 然後唔使十分鐘佢就私底下WhatsApp我問我咩事 仲主動話要同我傾電話 嗰日之後仲晚晚傾電話 每次都係佢主動打俾我,同埋有一次班group d人成日話我地兩個唔上水講野 所以我就是但講啲嘢 話發緊燒睇緊醫生 點知肥仔fd多口講句話C先生條女都係喎 C先生陪緊佢。後尾C先生話 洗唔洗過嚟陪你?佢話佢自己女朋友冇事啦喎 。我嗰陣心諗我又唔係佢邊個 過嚟做咩。不過佢同佢女朋友好似一齊左兩個禮拜咋。 到到水運會前1日佢就同佢所謂嘅女朋友分左手。

水運會-
肥仔fd同Jenny同一個社 所以我就同C先生問其他人借左佢地個社嘅衫嚟著 我哋4個一齊坐 因為比比要幫自己個社做helper所以冇得同我地一齊

個陣C先生同我坐中間 肥仔坐C先生隔離 Jenny就坐我隔離。


喺看台-

J:不如一陣去食芝士麵 好想食
我:好喎 我都想食
肥仔:又食嗰間? 不如去我屋企 我整俾你地食仲好啦
C先生+我:你整?
J:得唔得架?
肥仔fd:屋企不嬲都係我煮開飯 點會唔得
J:好啦好啦
C先生:好啊好啊 去你度啦 我都想玩下你啲貓
我:好啦 去肥仔到囉
完咗水運會之後我哋一齊搭巴士去左西灣河 肥仔fd屋企 買咗少量啤酒 就上咗去。不過煮芝士麵之前我哋四個係間房到睇片 睇睇下我同Jenny就瞓咗係肥仔張床度 一前一後 我瞓床尾。其實肥仔間房好細 三個人要坐床 一個人坐電腦枱前面然後四個人望住部電腦 所以成個氣氛都幾眼瞓 後尾瞓瞓下 C先生將我個頭放左起佢嘅大脾度 佢一路搞我d頭髮一路同肥仔喺度睇矇面超人-
以前可能會覺得sweet嘅 而家除咗變態我諗唔到其他形容詞。
到肥仔去煮芝士麵 我同Jenny同埋C先生就開左啲啤酒嚟飲 話晒嗰陣酒量一定唔係咁好架啦 飲少少面就會好紅 但一定冇醉。飲到咁上下 C先生瞓左係沙發 而我就坐左係地下 之後佢將我個頭擺起佢個心度叫我聽佢嘅心跳聲。之後我好似唔知發咩脾氣 然後佢就坐係地下 後邊攬住我 之後一野咀咗落嚟 中間唔清唔楚話不姐我哋一齊啦 嗰陣Jenny同肥仔見到除咗影相send俾比比睇之外 佢哋都係得個驚訝樣。無錯嗰晚就係我哋一齊嘅一日,-2012年9月28號



可能人真係會長大啦 回頭一望只係覺得自己好愚撚蠢?
已有 0 人追稿