我的爛Gag女友: 一段古怪的關係-四
不經不覺, 時間已經踏入十二月, 今天是ELC的最後一堂完結.
海格: Today, is the last lesson of our ELC class. I know, some of you, call me Hagrid, (然後他拍一拍我), but I don’t mind. That’s true, I am. It is because I have a magic giving you power to pass the ELC exam. Really, I wish you all best in your future, bye bye.
我: 阿寶, 上完堂, 而家不如去食飯丫.
看上去阿寶心情很沉重.
寶: 好呀.
我: 做咩呀妳? 唔舒服呀?
寶: 唔係, 去食飯囉.
見阿寶悶悶不樂, 我就講些東西來制激一下她.
我: 不如食明相囉.
阿寶立刻整個人兇猛起來.
寶: 唔去呀, 你再諗過第二間呀!!!
我: 哈哈, 終於正常番啦咩? 玩妳咋我, 食明相係男人既驕傲, 唔岩妳去架. 不如我地去太子食煲仔飯丫, 而家凍凍地最岩架啦.
寶: 好呀
我們坐火車去到太子, 到了餐廳, 門口有個大叔滿身大汗地控制著十個煲仔飯爐煮飯, 感覺很像一隻燒墨魚丸的Flash 遊戲, 你需要在墨魚丸煮熟後, 燒焦前, 把它拿起, 就有一分. 香港其實有很多這類現實中的Flash game 玩家, 每天為生活而不斷重覆每一天.
等了一會, 有位, 可以坐下. 我遞過餐牌給阿寶看.
寶: 呢度邊款最好食食架?
我: 呢度呀, 我最鍾意食臘腸排骨飯, 加多支大支玻璃樽可樂, 呢個係至強配撘呀, 仲有加多個煎蠔餅添.
寶: 咁等你決定啦.
我: 好, 伙記. 我要兩個臘腸排骨飯, 兩支大可樂, 仲有一碟煎蠔餅.
隔一會, 食物到齊. 我替阿寶拿開煲仔飯蓋, 加鼓油去撈均, 再替她將飲管放入可樂樽, 阿寶報以一個甜絲絲的微笑.
寶: 吾, d個煲仔飯同蠔飯好正呀.
我: 梗係啦, 我呢頭食過咁多檔, 呢檔煲仔飯係最正架.
和阿寶吃過飯後, 我們在附近行了一會. 天氣有點冷, 我們走進了始創中心行, 感覺比較暖一點.
在這裏, 我們經過一間精品店, 裡頭有很多火影精品, 木葉護額, 苦無, 筆記本, 模型等, 我逐一看, 看得不亦樂乎, 阿寶在旁看著我像個大孩子揀玩具一樣, 她站在一旁暗笑起來.
看完這鋪後, 我們經過一間賣熊啤啤公仔的店鋪, 阿寶看到, 停下來.
寶: 就快到聖誕啦, 阿月, 我真係好驚呀, 我好驚到左聖誕我地就………
阿寶的淚水開始掉下, 而我, 最怕就是看見女人哭.
我: 傻女, 唔好咁啦, 唔好去諗d 唔開心野, 我地而家要開心d先係架麻
阿寶沒有回應我, 然後, 我送了她到太子地鐵站後, 一個人行到旺角新之城機鋪打機.
其實對於聖誕的約定, 我也很苦惱, 因為這三個多月時間, 我己經弄清楚我對阿寶的感情其實是出於對嘉嘉的思念, 但在這段期間的相處, 我的確又開始有點鐘意了阿寶. 只可惜, 我對阿寶的感情, 仍未能去到相愛的地步.
我拿著頭文字D的軚盤, 嘆了一句.
我: 鞋…………..應該點好呢?
然後, 3~2~1~ 我用了 $50元暫時買了50分鐘去忘記煩惱, 跳進虛擬的世界.
回家後, 我再次開電腦, 同樣list上很多人online, 今次, 竟然是阿敏主動來hi我.
敏: hihi
我: hihi, 咁好死咁主動泥hi我既?
敏: 唉, 大家朋友, 要多d 關心架麻.
我: 妳有咁好死?
敏: 你對我誤會真係太深啦, 唔可以咁架.
我: 我有d 野想問妳呀
敏: 其實我想搵你借本筆記泥影印, 因為我lecture好多堂無番, 唔知要考d乜
敏: 係既係既, 月哥, 隨便問.
我: =.=” 都話妳無咁好死架啦. 聽日番學約出泥借俾妳印啦
敏: Thx!!! 想問咩呀?
我: 就快到聖誕啦, 我仲係唔知點好呀
敏: 你仲未知自己係咪鐘意阿寶呀?
我: 唔係, 而係我己經知道左我對阿寶的感情其實是出於對嘉嘉的思念, 但呢幾個月我的確又開始有d鐘意左阿寶. 不過又未去到可以拍拖既地步喎.
敏: 咁你覺得, 如果你同佢一齊你自己會唔會開心丫?
我: 咁我自問而家有能力俾到幸福佢既
敏: 你唔好成日淨係掛住諗人啦, 我係問緊你自己同佢一齊, 你會唔會幸福呀, 唔係佢呀
老實說, 從認識嘉嘉到現在, 我一直是在想著對方會否幸福, 我們能否去到結婚的地步, 所以, 我可以選擇的女仔不太多.
我: 我唔知呀
敏: 其實你咁樣放唔低果個嘉嘉都唔係辦法個喎, 唔通你以後都唔溝女咩? 不如你搵次約嘉嘉出泥等你自己攪清楚啦
我: 我都想, 但係呢大半年泥我都見唔到佢online.
敏: 咁無計啦, 我唔同你講啦, 聽日返8點呀, 88
我: 88
過了這個星期, 正式踏入了考試. 我, 阿王, 阿禮, 阿K每天都一大早回校找些沒人用的課室來溫習. 因為想集中應付考試, 所以, 我和阿寶打算考完試後才見面.
回到學校溫書, 阿K帶了一隻有幾百首歌的USB手指, 開著課室的電腦, 一邊播歌, 一邊溫習. 我們去又一城的百佳買了很多零食, 一邊溫習一邊吃. 整天都在溫習, 到晚上走的時候.
王: 喂, 去深水埗食飯囉
我: 明相呀?
王: 唔係, 今次去金大狼啦, 我有信用卡優惠有魚生送
禮: 好呀, 去整番個雞扒飯先, 阿K你得唔得呀
K: 我OK呀, 行啦.
王: 喂聽日不如帶d 片番泥播住溫啦
我: 你睇住睇睇下片俾FMO入泥check房斷正呀, 到時你渣住野, 你眼望我望就型啦
K: 不如我地考完試去唱K 囉
禮: 好呀, 到時我帶埋我條女出泥
我: 女?? 之前無聽你講既?
王: 係喎, 咁快手既你, 點識架?
禮: Friend 撘friend 囉, 上星期出去踩單車識架
我: 吓?? 一星期就攪掂??
禮: 溝女既野, 要快, 狠, 準, 唔可以拖架麻
K: 你真利害
禮: 月, 到時帶埋阿寶出泥囉.
我: 唉, 希望啦
吃完飯後, 我們各自散水, 在回家途中, 我在想想阿禮說的話. 或者對嘉嘉的思念, 只是我一廂情願的想法.
或者拍拖真的不用去想太多, 要是不去開始了又怎可以知道結果.
雖然, 我知自己的感覺暫時未去到和阿寶相愛, 但我真的不想再見到阿寶哭. 我決定了, 考完試後, 去選一隻最可愛的熊啤啤送給阿寶作聖誕禮物.