我的爛Gag女友: 我還有的是朋友
12月26日, 天氣異常的寒冷, 我帶著一支葡萄X上狗巴.
在上層, 我找個位置坐下, 然後手中執著昨晚那條木之葉護額, 阿寶信中的最後一句”現實裡沒有木之葉, 你也不是真正的火影” 不斷在我腦海重覆著, 揮之不去.
我在回顧著自己的過去, 嘉嘉, 阿寶, 兩次的失敗收場, 都是因為我太在意自己能否給予對方幸福, 但她們要的究竟又是不是我想給的呢?
阿寶這句”現實裡沒有木之葉, 你也不是真正的火影”, 正正像是把我從自己的FF中拉回現實.
我很內疚, 亦覺得很矛盾, 為什麼我傷害到這兩個女仔的原因, 正正就是因為我想給予她們幸福呢?
想著想著, 我已經看到見了APM, 要下車了.
我跟著家姐所提供的地址, 印出一張中聯地圖, 去到了阿K的家.
電梯一開, 行到K家的門口, 我停下按門鈴 “叮噹~叮噹~”
開門的是家姐.
家姐: 咦, 你泥啦, 入泥坐丫
我: 好呀, 唔該家姐.
家姐: 其實你可以叫我Kerry架
我: o我, 好呀Kerry
我把葡萄X遞給Kerry 作見面禮, 始終上人屋企不可以沒見面禮. 見阿K 沒有理我, 集中精禮地打Winning.
我: 喂, 靚仔, 咁精神係度打機, 應該無乜事啦
K: ok 啦, 成日都係咁架啦, 一兩日就無事.
我: 咁你31號仲去唔去到澳門呀?
K: 梗係去啦, 仲要去博殺架麻
我: 話唔定你去係俾人殺呢
K: 超! 係喎, 琴晚拍拖拍得開唔開心呀?
我: 唉, 唔好提, 一言難盡.
K: 一言難盡咪慢慢講到佢盡囉, 唔趕時間呀.
我: 大師呀, 其實我想問呢, 我記得我無同你講過我25號會做d乜, 點解你暈果晚講果d 野好似知我25號會有事發生咁既?
K: 哈哈, 因為我見我好多friend都係係2個日子俾人革職, 一個係情人節, 另一個就係聖誕啦, 所以咪勸下你, 條女發咩脾氣都好, 要忍下囉.
我: o我, 唔怪得啦.
K: 咁你點呀.
我: 無呀, 又係革左職囉.
K: 衰咩呀? 太猴擒呀你?
我: 唔係, 因為佢知道我放唔低以前鐘意果個囉.
K: 唉, 兄弟, 拎起個2機, 同我踢番場, 等哥哥講個故仔你聽下啦
阿K雖然和我是同級同學, 但其實他是比我年長三歲, 在他的口中, 永遠充滿著疑幻疑真的道理.
拿起2機, 阿K明顯讓賽, 選了中國, 而我見他選了中國也不會輕敵, 選了烏克蘭想用舒夫真高屈走位波.
球賽開始了, 阿K的中國隊球員, 跑得慢, 無速度, 唔夠快, 而且射球沒有力度, 無角度, 但阿K的確是高手, 即使用中國隊也能控著球不被我搶去.
K: 有無聽過一個和尚叫個有錢佬孭西瓜既故事呀?
我在焦急地集中精神的去搶波, 只是輕輕地回應
我: 無喎.
阿K一邊拿著手掣打機, 一邊氣定神閒的說著.
K: 從前, 有一個有錢佬, 有農場, 有力牆, 之但係佢就每日都為左怕佢兩個仆街仔敗晒佢身家而好擔心.
咁有一日, 佢頂唔順就去左間寺住番幾日當渡假靜番下. 住持見佢死狗咁既樣就同佢吹左兩句.
住持: 施主, 你有咩煩惱呀?
有錢佬: 我好煩, 兩個衰仔成日都想敗晒我副身家
住持呢個時候拎左一個大袋, 入住6個西瓜俾有錢佬.
有錢佬: 大師, 6個西瓜, 就算我分埋俾兩個保鏢都食唔晒喎.
住持: 呢袋西瓜唔係用泥俾你食, 係用泥俾你孭, 你仲會係度住多幾日, 泥緊你每日都孭住呢袋西瓜, 到走果日你既煩惱就會無晒架啦.
有錢佬: 咁神奇, 孭下就得
住持: 就咁啦, 五日後我再泥搵你.
五日之後, 有錢佬孭到腰酸背痛, 而袋西瓜亦臭到嘔. 住持呢個時候帶左有錢佬去山涯邊.
住持: 施主, 你呢幾日孭住袋西瓜覺得點呀?
有錢佬: 又重又臭, 好難頂.
住持: 咁你而家行去涯邊將袋西瓜掉落去啦.
有錢佬如釋重負, 行去涯邊就掉左袋瓜落去, 然後就話.
有錢佬: 我明啦, 大師.
個故仔係咁, 你自己領略下啦.
我: 即係咩呀大佬?
K: 即係好似你咁, 唔好淨係識屈走位波.
我: 唉, 真係唔夠你泥, 有無無雙打? 等陣換game啦
K: 睇泥你明白唔夠打就要換game 啦喎
我: 都唔知你蹹乜.
打了幾小時無雙之後, 我離開了, 回家online見到敏兒.
敏: 點呀你, 聖誕節順利嗎?
我: 我而家爭50張卡儲齊一副牌呀.
敏: 點解呀? 你最後都係拒絕左佢呀?
我: um……應該話, 因了解而分開啦
敏: 即係點?
我: 好長篇, 唔想打字, 下次見面先講啦.
敏: ok, 咁你呢緊有咩攪呀?
我: 我31號同阿王佢地去澳門玩一日, 而家情場失意, 去到惡晒架啦
敏: 咦!! 澳門, 可唔可以預埋我, 我都想去呀
我: 四條仔喎, 你一個女仔都去
敏: 車, 驚你熔左我咩?
我: 咁好啦, 我同佢地單聲啦.
到了31號, 我們約好早上9時在信德等.
王: 喂, 阿月, 你call下佢啦, 我地買左九點半船飛喎, 過埋關, 無乜時間淨咋喎.
我其實一直都在撥打電話, 而敏兒亦一貫答案
敏兒: 就到啦, 上緊樓梯啦.
我: 快啦, 九點半開船呀.
我向阿王他們說.
我: 你地入左去先啦, 我等埋佢就泥join番你地.
於是, 阿王他們先入閘過關, 我一個人在等敏兒.
直至9:25am, 敏兒喘著氣的跑著過來.
我: 快d 一齊跑去過關啦, 就開船啦.
我們一直跑, 看到過關人龍很長, 我們走到最前乞求一位婆婆給我們排隊, 先行關.
9:27am
我: 唔好意思呀, 我地9:30am船, 就遲到啦, 可唔可以俾我地過先呀
婆婆: 後生仔, 好心你地就唔好預到咁炆啦, 俾你地先啦, 還掂我唔趕時間.
我 和 敏兒: 多謝你呀婆婆, 多謝你呀!!!
9:29am
過關後, 我們狂奔去閘口, 阿王他們在收票員那裏等著, 見到我們急奔過來, 立即揮手高呼.
禮: 喂, 快手呀, 就柵門啦.
見到收票員開始想把玻璃門關上收檔, 阿王他們立即欄著他.
王: 唔好意思呀, 我地另外兩個朋友係果邊跑緊泥啦, 到架啦
收票員: 下次唔好咁炆水啦大佬, 隻船如果遲左後面d航班都會遲晒架.
9:31am
然後, 我們跑到櫃位, 由於遲大到, 所以正常坐位都沒有了, 收票員給了我們5個豪華位.
上到船艙, 見到上層我們的豪華位有對坐的卡位, 有一張枱可以用來玩啤牌, 估不到, 遲到也可以因禍得福.
敏兒: 唔好意思呀, 今朝有d 事遲左.
我: 唉, 你真係死性不改呀, 例牌遲到
然而, 三個厹為求攞分, 反而是幫敏兒說話.
王: 阿月, 我相信敏兒遲到一定有苦衷既, 人地都道左歉啦, 你唔好話人啦.
K: 咪係囉, 唔係因為敏兒我地邊有豪華位坐呀.
我: 屌, 頭先要跑過泥上船果個唔係你地, 你地梗係咁講啦.
禮: 嗱, 我就最公正架啦, 就算係我跑都係咁話. 唔可以咁架阿月.
敏兒裝作感動地說.
敏兒: 好多謝你地體諒呀, 你地由得阿月啦, 係我衰既, 遲到, 抵鬧
然後敏兒偷偷的向我報以一個很奸狡的笑容, 原來即使樣子如何漂亮, 但做奸狡樣貎時也是如此的狗.
王: 唔好理阿月, 等陣去澳門我請妳食個豬扒包呀下.
我: 挑!!
一個多小時的船程, 三個厹拿出啤牌和敏兒鋤Dee, 而敏兒也刻意的戲弄我.
敏兒: 阿月, 你副牌呢? 儲夠未呀?
我瞇起雙眼對著敏兒說.
我: 你老味呀.
然後, 我在袋中拿出了新租的一期火影忍者來看.
一個多小時後, 船泊了岸. 我們沒有預備行程, 只打算去到那裏, 玩到那裏. 在碼頭, 我們看到澳門旅遊局的櫃位, 拿了一張澳門地圖. 上面列出很多建議去玩的地方, 在我還在想去那裏時, 阿王己經爭先的說.
王: 喂, 我地要買定張博物館套票先呀, 如果唔係逐間買飛貴好多架.
聽上去, 阿王好像很熟識澳門, 於是我們都沒出聲, 就跟著他的指示去做.
買飛後, 阿王說, 我們五個人去坐一架的士的話比坐巴士價錢差不多, 於是我們便五個人坐上一部黑色的士.
王: 去大馬路丫
司機: 收到.
到了大馬路下車後, 阿王表示要行快一點到大三巴, 我們都不知原因.
王: 就快一點啦, 要快d 行啦
我: 乜果個大三巴一點收架咩?
王: 行啦, 到左先解釋啦.
到了大三巴, 阿王立即拿出相機.
王: 你地都拎相機出泥啦, 就快到啦.
我, 敏兒和阿K都沒有相機, 只有阿禮跟著做.
下午一時正. “鈴~~~~~~~~~~~~~”
然後, 很多著校服的女學生在旁邊的小路走出來.
我, 阿K和敏兒此刻對望著在若笑. 而阿王和阿禮在興致勃勃的在拍照.
見到這邊漂亮的, 拍一張, 那邊騎著綿羊仔的, 又拍一張. 那邊三五成群在談笑的又拍一張. 拍了十分鐘左右, 人群己經散去, 他們很滿意地停下來看看自己的戰績.
禮: 果然好介紹呀下.
王: 梗係, 我次次泥都會係度影學生妹架
我: 你地唔好咁變態啦, 我地泥玩架, 唔係做痴漢架
K: 唉, 無眼睇
敏兒則叫著肚餓.
敏兒: 喂, 食得飯未呀? 好肚餓啦
王: 得, 第一站, 我帶你地去食豬扒包, 呢度行番出小小就係架啦.
到了一個小檔口, 我們排了一會隊, 買了一人一個豬扒包吃過後, 今次真的走到大三巴遊覽了. 阿王帶了我們去大三巴的地下室看先人遺體, 那裏好像連溫度也特別低. 繼而, 我們用套票遊覽了幾個博物館, 賽車博物館, 澳門博物館等等.
在賽車博物館, 有些賽車女郎的模特兒公仔, 阿王伸出他的一雙祿山之爪, 爪著賽車女郎的模特兒公仔拍照. 我現在很確定, 阿王和阿禮兩個的而且確是很出色的痴漢.
阿K在替他們拿相機, 影下他們玩弄賽車女郎的模特兒公仔的不同變態姿勢, 我和敏兒則在博物館行.
敏兒忍不著問我阿寶的事.
敏兒: 你同阿寶點呀? 聖誕果晚飛左你呀佢?
我: 又唔可以講話係飛既
敏兒: 咁即係點?
我: 即係又齊多一張卡囉.
敏兒: 詳細小小得唔得呀? 懶高深咁
我: 咁八做咩呀妳?
敏兒: 唔係八, 話晒都同你訓過, 想關心下你姐.
我: 妳又泥啦妳.
敏兒: 咁你快d 講啦
我: 其實係咁既, 阿寶其實一直都知我當佢係嘉嘉…………………
我: 嗱, 成件事就係咁囉.
敏兒聽完整件事後, 心情好像也被我拖下了深谷一樣變得有點幽暗.
敏兒: 咁你有無事呀而家?
我: 無既, 如果比著兩三年前既我遇到咁既情況, 我實會屈住有排唔開心, 但係而家既我, 知道左有人為左我, 寧願放棄自己既快樂泥等我好過d, 我反而係好感動. 因為我好明白, 雖然時間好短暫, 但係阿寶係真係愛我既.
敏兒: 估唔到你原來有咁高既修為, 我未拍過拖, 我唔信拍拖, 又唔信結婚, 所以, 呢d 事, 唔會係我身上發身. 不過, 你地呢單野真係幾精彩.
我: 精彩? 妳當我吹架?
敏兒: 唔係咁既意思, 你唔好咁敏感.
行了一個圏, 我們又再遇到了阿王他們.
我: 點呀? 個公仔有無抹番乾淨呀? 唔好攪到痴笠笠喎.
王: 影下相姐, 點會痴笠笠呀
我: 係咩?? 咁而家去邊呀我地?
王: 我地而家去搵何生拎錢食飯啦.
禮: 咁早? 三點幾咋喎
王: 玩得泥岩架啦.
我們又再一行五人坐的士到葡京門口. 一進去大廳, 感覺是煙霧彌漫, 就像新年的車公廟一樣, 香火頂盛. 阿K和敏兒:受不了, 先行離去. 而我對於這種像大檔一樣的污煙瘴氣的地方也不太受得了, 所以, 剩下阿王和阿禮在玩骰盅.
我, 阿K和敏兒走到旁邊一個老虎機中心, 可能賭仔都全跑到大廳, 這裏沒什麼煙霧, 像一間普通的遊戲機中心. 我們也各自去兌換散銀玩老虎機.
在出發前, 我在想著玩老虎機的策略, 我會換$300元來玩, 無論如何, 到最後輸清就走, 不會再拿多一元.
而我看網上的討論說過, 老虎機雖然每一部看似是隨機的轉出結果, 但原來是有一個模式去運作.
首先, 最重要的第一原則就是一定要先限定自己要玩的金額上限, 否則在機器設定輸的機會率較高的情況下, 最後必定是會輸錢.
另外, 原來同一間店內, 老虎機雖然外表是一樣, 但原來內裏設定的勝負機會率也會有所不同. 通常在門口或通道口的機中獎機會率會較高, 因為其他人行過看見中獎, 也會被吸引去玩其旁邊輸錢機會率較高的機.
而你在玩之前, 需要拿一點時間去觀察四周在玩老虎機的人, 因為通常機器設定是會一連很多局的輸錢, 然後接著是一連幾局的嬴錢, 梅花間竹一樣.
最後是你可以問問店員那部機大機會中獎, 通常他們都會回答. 因為你嬴了錢, 而且是因為他介紹, 他走過來你也不好意思不給貼士.
我綜合了以上幾點, 再加上堂上學到的一些分散風險理論, 於是我選了五台路口的機, 每玩一局之後, 不論嬴輸, 都跳去玩下一部機, 一直在不斷的轉機去玩. 因為我沒有太多時間去觀察那一台是己輸了一輪錢, 於是, 我的策略就變為找幾台嬴錢機會率較高的機來平攤輸錢風險.
敏兒和阿K見我一部一部機的去玩, 不斷行來行去, 覺得很奇怪, 於是, 他們沒有玩, 停下來看我做什麼.
我在開始時玩了大約三十分鐘, 手上的三百元己經變成大約九百元. 然而, 我的目的其實是想消磨時間, 於是我繼續玩.
而敏兒和阿K見我這個策略後也跟著去找幾部機來做用同樣的方法去玩.
而到二小時之後, 因為我在最頂峰時九百元沒有收手, 最後變為只剩下六百多員, 算是賺回船飛. 敏兒和阿K則每人嬴了百多元.
得到了兩個多小時的刺激, 還有幾百元賺, 算是滿足了. 而阿王和阿禮因為玩骰盅而輸去了八百多元.
之後, 敏兒和阿K問我為什麼知道剛才玩老虎機的方法.
我: 咁情場失意, 梗係要係賭場得意下架啦. 俾下面啦大佬.
之後, 我們一行五人又坐車去到了大馬路附近一間吃水蟹粥的餐廳. 聽說這間餐廳很有名, 鋪內貼了很多名人合照.
吃了一大餐飯, 玩了一整天, 我們都很疲累想回香港了, 但阿王提議.
王: 喂, 唔係係度倒數咩?
我: 你數, 數完打番香港話我知.
敏兒: 我都好攰啦, 想番去啦, 唔數啦.
就此, 隨著阿寶的離去和這個澳門旅行的結束, 這個Sem break 也正式結束了.