我的爛Gag女友: 我們的幸福摩天輪
情人節之後的一天返學, 我的步伐在我自己不察覺之下有點彈彈跳跳, 好像小時候阿爸阿媽買了一部超任給我時一樣的情況. 在坐車的時候, 收到的第一個SMS是敏兒發過來的
“琴晚咁夜返去, 今日係咪好辛苦呀?”
除了阿媽外, 從來沒有女仔試過這樣關心, 我心想, 原來有女朋友係咁好架 (呢句而家諗番都覺得好毒), 我的嘴角忍不住向上翹起.
我覆了敏兒的SMS.
“送女朋友番屋企唔會辛苦架”
敏兒很快的回覆.
“口花花啦你”
回到課室, 見到阿王和阿禮.
禮: 喂, 阿月, 攪乜春, 成朝個嘴含晒春咁既你?
我: 係咩? 有含春咩?
王: 係喎, 成朝都陰陰笑咁, 有古怪.
我: 無喎, 有咩? 咦, 係喎阿王, 你琴日同阿琴點呀? 去邊玩呀?
王: 唉, 唔好提, 佢唔肯同我出, 話我地未去到呢個階段, 呢d日子出街唔係咁好
禮: 繼續努力啦兄弟, 你要向住你既暴乳夢想進發呀
王: 我屌你啦我, 咁你又點呀?
禮: 唉, 無呀, 又係煩, 約左條女去間餐廳食飯, 都己經我請架啦, 仲要嫌話d 野唔好食, 又要嫌多人, 好嘈, 無氣氛, 又話我淨係食飯, 好悶, 無新意. 大佬呀, 餐飯加埋紥花都成兩千幾銀架, 仲唔夠誠意牙?
我: 緊係你餵唔飽佢啦, 投訴你呀佢
禮: 唉, 女呢d 野, 總之, 有又煩, 無又煩啦
王: 係喎, 阿K走左之後, 我地都好耐無一齊唱K啦喎, 不如等陣叫埋敏兒一齊去唱丫
一聽到敏兒個名, 突然之間我覺得塊面好熱, 好緊張.
王: 嘩, 攪咩呀你? 塊面咁紅既? 發燒呀你?
我: 無呀, 可能著衫多覺得好焗啫, 我負責搵敏兒啦咁
王: 好呀, 咁我book位先啦, 都係Neway City架啦?
我: 係呀, 我去一去廁所先
去廁所洗完面, 我塊面己經退左紅, 我send個SMS俾敏兒問佢等陣放學去唔去唱K, 佢就答好. 然後, 我send個SMS問佢:
“不如等陣同阿王, 阿禮講埋我地一齊左囉”
“吓?? 唔好住先啦, 等我地一齊多一排, 感情穩定左先啦好無?”
我睇到呢個回覆係有d唔開心, 我想將我既快樂同朋友分享. 但係, 我諗可能敏兒比較怕羞, 所以想習慣左先至向大家宣佈. 我回覆:
“咁好啦”
放左學之後, 我們四人又一同去到Neway City唱k, 阿王點了很多失戀的歌, 有”擇日失戀”, “洗剪吹”, “男人最痛”, “斷點”, 相信昨天阿琴沒跟他出街對他打擊很大.
阿禮就點了很多快歌, 有”衝口而出”, “極樂”, “兩個龍捲風”等, 感覺是想把昨天所受的委屈都全部發洩出來.
我和敏兒就坐在一起, 同樣點很多周杰倫, 陳奕迅, 還有點了一首張敬軒的”酷愛”.
唱了不久, 我和敏兒不自覺地越坐越近, 近得連膞頭也挨在一起. 阿王和阿禮望一望我們, 然後雙眼變成兩條直線, 嘴巴緊合, 互相望望點了兩下頭.
我們見到這樣, 知道表現得有點過火了, 就坐開了一點.
到了周杰倫的夜曲, 這首是我追敏兒時苦練的歌, 聽到敏兒唱起, 我也很自然拿起咪和她一起唱. 我把整首歌連rap的部份完完整整的唱出. 阿王和阿禮知我本來是完全不唱周杰倫的歌, 現在這種反常情況, 他們雙眼又再變成兩條直線, 用手摸摸自己下巴互望點頭.
之後唱到的是張敬軒的”酷愛”, 我和敏兒一起唱, 一人一句, 好像夾了很多次一樣, 而且, 到了最後兩巴聲一同唱, 很亂的部份, 我和敏兒也入得天衣無縫, 沒有唱錯同一行歌詞. 阿王和阿禮覺得我們很奇怪, 熟得不尋常. 他們很識做, 在唱完k後就各自找些理由先行離去, 他們在離去時也拍一拍我膞頭.
淨下我和敏兒, 我和她決定去淘大花園行一會, 之後送她回家. 現在送她再不像以往送到車站, 而送到她家樓下, 所以行街也選一些較近敏兒家的地方.
在去九龍灣的路程, 我心情也很緊張, 不斷的用手去碰敏兒的手, 因為我們雖然開始了拍拖, 但卻沒有正式的拖手, 我很想試試拖著女朋友行街的感覺.
我們各自各的行, 一直行到淘大的的戲院門口時, 我停下來.
敏兒: 做咩停係度呀?
我臉又開始發熱了.
我: 不如……不如……我地拖住手行囉
敏兒笑一笑.
敏兒: 以為你想講乜添, 伸隻手出泥啦傻瓜.
終於, 我們可以像一對正常情侶一樣, 拖著手行街了. 我拖著敏兒的手, 身體卻在不斷發抖.
敏兒: 做咩咁震既你? 唔舒服呀?
我: Er…唔係呀, 我一向都係咁架
敏兒: 係咪凍呀你?
我: 哦, 唔係, 我ok架, 我地行啦.
行了大約個多小時, 我才開始平伏下來, 沒有再抖. 敏兒見我沒有再抖就向我說.
敏兒: 傻瓜, 我地都拍拖啦, 拖下手使乜咁緊張呀你
我: Er……我第一次拖女仔手拍拖, 我都控制唔到自己唔震呀
敏兒看著我嘴角微微, 再向前看, 拖著我繼續行.
敏兒: 咦, 去前面間鋪頭睇下衫啦
我: 好呀
敏兒拿起一件男裝褸併在我身上
敏兒: 著起泥睇下
我把那件褸穿起來轉了一圏給她看, 她托著下巴.
敏兒: um, 幾好睇喎, 你覺得點呀?
我: ok丫
敏兒: 好啦, 咁呢件褸就係我地第一次出泥拍拖送俾你既禮物啦.
我: 吓, 唔使啦, 我泥俾啦, 咁貴
敏兒: 得啦, 你唔好著番之前件褸得架啦, 記得要洗呀你件褸
我: 係既係既.
行完街後, 我送了敏兒回家, 同樣坐在巴士上層的位置, 但今次不同的是, 除了敏兒枕在我膞頭外, 我還伸手去撘在她另一邊膞, 抱著她的頭. 抱著敏兒, 我感覺到我們的距離前所未有的近, 好像世界只有我們兩人一樣.
雖然每個行樓梯上層見到我們的人都會抱著一種無眼睇的提子眼光, 但在此刻, 我將他們全部都解讀成羡慕目光. 到了下車後, 我送敏兒到樓下, 見她轉身想行入大廈的時候, 我捉住她的手, 叫停了她.
我: 敏兒
敏兒: 咩事呀?
我的臉又變熱了.
我: 我地……好似差左d 野咁喎
敏兒古惑的笑著看我, 然後吻了我的臉一下.
敏兒: 係咪想咁呀?
我: 吓? 咁咋?
敏兒: 唔係你仲想點呀?
我: 妳嗑埋眼, 數三聲開番我話你知丫
敏兒很聽話, 閉起雙眼. 此時我用我的嘴吻到她的嘴上, 她瞪大了眼.
敏兒: 唉, 估到你啦咸濕仔
我: Goodbye kiss丫麻
她甜甜的一笑後, 向我道別, 然後就進了大廈. 我同樣看著她入電梯才離去. 這次同樣因為太夜, 沒有車回家, 但因為敏兒己經教了我在她家外面的馬路等是有通宵小巴出旺角, 所以, 今次回家比較快. 而且, 一路上有敏兒和我傾電話陪著我, 所以車程好像轉眼就到.
我們拍拖開始了一個多月, 這個多月以來, 我們每天都保持著見面和通電話. 敏兒的出現, 把我心中所有空虛全部填滿. 加上我們本身是要好的朋友, 彼此都很了解對方, 所以, 我們一起做任何事都非常合拍, 像是找到了另一半的我一樣.
到了差不多我生日的日子, 以往因為沒有人會提起, 所以往往都是過了生日才會記起原來己經過了. 今年, 敏兒有提醒我, 但她向我說的是.
敏兒: 阿月呀, 聽日你生日, 但係我要番part time, 所以陪唔到你呀, 唔好意思呀, 有無人陪你慶祝呀聽日?
我: 得架啦, 你番工緊要呀, 我阿媽會同我慶祝架啦, 你唔使理我
敏兒: 咁好啦, 唔好意思呀
到了我生日當天, 放學後回家就開電腦, 上高登乞求巴打一句生日快樂. 老實說, 我屋企係從來都唔做生日, 所以生日都唔會有人去提起. 可能今天敏兒工作很忙, 所以她全日連一個SMS和電話都沒有.
一直上網打機, 到了六點, 敏兒打電話給我.
敏兒: 喂, 阿月呀, 我而家係太古城放左工呀, 你得唔得閒呀? 出泥行下, 食個飯丫
我: 好呀, 我而家即刻到.
大約一小時多的車程, 我到了太古坊. 我再致電給敏兒.
我: 敏兒, 我到左啦, 妳係邊呀?
敏兒: 你識唔識去太古城後邊個海傍果度呀? 我係果度坐緊呀, 你過泥丫
我: 好呀, 我搵下啦
我一邊問路, 一邊看指示牌找找, 終於找到過海邊的天橋, 敏兒又再打來給我.
敏兒: 你去到邊呀?
我: 我去到間酒店後面, 過埋條天橋就到海邊啦.
敏兒: 岩啦, 咁你快d上天橋啦.
我從太古城那邊走到天橋對面的落樓梯位置, 見到敏兒在橋上對海的石椅那邊.
敏兒: 你快d過泥啦.
我: 做咩呀? 咁急咁既?
走到敏兒的位置, 我看到石椅上放著一個朱古力雜果蛋糕, 而且還有特多的水果, 上面插著一支蠟燭, 一個牌”月, 生日快樂, 敏兒”
敏兒: 我今日成個下晝就係去左整呢個蛋糕呀, 你等陣要食多d呀.
看著蛋糕上的燭光映照著眼前的敏兒, 我的眼睛有點缺堤了. 我很感動, 從來沒有人會記起我的生日, 而且還為了我用了一天的時間去做一個生日蛋糕.
敏兒: 快d 許個願, 吹蠟燭先啦
我閉起雙眼, 許了個願, 希望敏兒會變成月太, 然後便吹熄蠟燭.
敏兒: 許左個咩願呀?
我: 唔講得架, 講左出泥會唔靈架.
然後, 敏兒在袋中拿了一個盒出來, 雙手遞給我.
敏兒: 嗱, 你既, 生日禮物.
我: 咦? 咩泥架? 可唔可以而家拆呀?
敏兒: 梗係得啦.
我拆開一看, 原來是個銀包.
敏兒: 我見你個銀包d格爛晒都唔換, 所以買個俾你呀, 呢個好多格架, 你睇下岩唔岩
我很感動上天賜給我一個那麼體貼的女朋友, 我忍不住抱著她大叫.
我: 敏兒, 我愛妳呀!!!
四周的人見到我們這樣也同時看過來.
敏兒: 喂, 放開我先啦, 好多人望住呀
我擦一擦眼睛, 然後把敏兒放開.
敏兒: 我地一齊食蛋糕先啦, 我整得好辛苦架, 你要食多d呀
我和敏兒把整個蛋糕吃掉, 這個敏兒親手做的蛋糕, 比世上任何的甜品美食更甜, 更可口. 這個是我出世以來, 第一個有女仔專誠為我做的蛋糕, 至今我還記得這個蛋糕的美味.
吃過蛋糕後, 我們手牽手在海傍漫步. 我們兩個人沒有說話, 只是一起走著, 感受這刻無言的浪漫和幸福. 我們雖然都沒有說話, 但手掌和手掌的觸碰感覺, 己經把對對方的關心和愛完全傳遞給對方, 相信這種就是所謂的心靈相通的感覺吧.
過了兩個月之後, 己經是Year 2 Sem B, 阿王和阿禮又約了我和敏兒一同去看陳奕迅演唱會. 因為我們還未正式公佈己經拍拖, 所以見到他們時仍會分開雙手, 沒有拖著.
我們在又一城大學吃過飯後才過去紅館. 在Canteen, 敏兒直接找位置坐下, 沒有說吃什麼, 我, 阿王和阿禮就排隊買飯吃. 敏兒沒有說吃什麼, 因為她習慣了由我幫她買東西吃, 她知我會點她愛吃的東西, 所以她很放心, 但在阿王和阿禮眼中, 我們這個行為就很曖昧.
我們買好食物後, 便拿著餐盤走到敏兒坐著的位置坐下. 阿王忍不著問.
王: 咦, 你地好似好friend咁喎, 食咩都唔使講就可以幫妳買埋既?
敏兒扮天真的看著我問.
敏兒: 吓? 係咩? 我無講咩? 咁點解你知我食乜既?
我: hei, Canteen既野, 泥泥去去都係得果幾樣架啦, 求其揀樣啫
阿王顯然不相信我的答案, 哈哈了一聲作回應.
吃過飯後, 我們到了紅館入場坐下. 我們坐的是山頂位, 所以, 行的樓梯都比較高, 比較恐佈. 我跟在敏兒後面, 她一隻手扶著欄杆, 一隻手扶著我遞上的手. 找到位置後, 我們四人坐下.
聽著陳奕迅一直的唱, “買了球鞋, 再買玩具”, “當我還在, 公園散步”, “若問世界誰無雙”, “今天等我來”, “我想將, 天使的小禮物呈上, 一雙翅膀”, 然後到了幸福摩天輪. 聽到歌詞, 我很有感覺, 不期然捉住敏兒的手起來.
我見敏兒沒有主動的鬆開我, 於是, 我拖著她的手, 舉起來, 拍拍阿王和阿禮示意. 這時, 敏兒還在裝傻, 看著舞台跟著陳奕迅唱幸福摩天輪. 阿王和阿禮終於忍不住指著我開口.
王 和 禮: 一早估到你兩條友有路啦.
我: 咁得唔得先? 高唔高興先?
王 和 禮: 高興, 不過要擺番圍賀下佢喎, 你請啦阿月
我: 無問題, 請你地去牡丹樓, 一個一個豬柳蛋漢堡加細可樂啦.
王: 你條仆街.
我: 好, 我而家正式宣佈, 我同敏兒拍緊拖
王 和 禮: Wow……..
就此, 我們拍拖算是進了一步, 到了可以讓朋友知道的感情穩定的甜蜜狀況.