《香港唔係追夢既地方》: Episode 03
Episode 3
我係一個超級英雄fans，你可以話我膚淺，但我覺得Marvel 既超級英雄真係好有意義。
美國隊長，手執地球上最強既盾牌，去為自由而戰。佢用既唔係劍、唔係槍，而係最無殺傷力既盾牌。爭取自由，係唔應該流血，但同樣唔應該令自己流血。
細個既時候，曾經試過有老師用唔公平既方法，去處罰佢睇唔順眼既學生。個陣，我地無出聲，只可以靜靜睇住呢個老師用佢至高無上既權力去欺壓呢個學生，我地既同學。
到有一次，呢個被欺壓既學生終於忍唔住喊，我地都忍唔住，我地知道如果我地再唔出聲，再唔保護我地呢個同學，就無人會可以安全。帶頭既班長主動為同學求情，最後我地一個一個出聲，件事驚動到主任同副校長，最後成功阻止左呢場欺壓。
我地保護左個個同學，同時亦保護左我地自己。
今日，我唔知道我地做呢件事既結果會係點，我只係知道，我地唔可以再唔出聲。
-
我、Aaron、Chris 同 Lok 一齊去左金鐘夏慤道，搵左個位置靜坐。
呢到四圍都係人，我從來未試過有咁多人一齊坐係地下、坐係馬路，而為既只係同一個目標：自由、選擇。
我同好多陌生既人有眼神接觸，明明係唔相識，但有一種好濃烈既親切感。大家點下頭，微微笑，就知道係戰友，就好似打機咁，會放心將背後交畀對方一樣。
有好多人幫手搬物資，由一個站搬去另一個站，無分彼此。明明係無糧出，大家都咁熱心去做一樣野。
和平、理性。
其實香港人，都唔係大家諗得咁差。
往日會講，香港人情比紙薄，我唔知道呢句說話係岩定唔岩，我只知道係金鐘、佔中個時，香港人情味絕對好濃厚。
就連我個心，都開始熱血起來，想為呢個地方，出一分力。
坐係我地隔離既，係幾個年紀比我地細既中學生。點解我地會知？因為佢地靜坐既時候，都不忘拎住本「DSE攻略」去睇。
大家都靜靜咁坐係到，雖然和平、平靜，但我知道唔可以鬆懈，因為無人知道，下一秒會發生咩事。
「係喇⋯⋯我同緊佢地一齊，你唔使咁驚⋯⋯」Chris 係到講緊電話，我相信佢就係同緊 Sophie 報平安。
「點會咁快走，我岩岩先到⋯⋯坐到佢地走我就走架喇⋯⋯」Chris 似乎應付緊 Sophie 既脾氣。
而 Lok 則頻頻send message，可能都係同緊佢暗戀既人報平安？
天色已黑，一切都好平靜⋯⋯
忽然，隔離班中學生傳出尖叫聲，拎住「DSE攻略」個個男仔忽然暈低左！
「Jimmy！」班中學生開始驚慌，我地都開始圍上去睇下有咩可以幫到手。
「做咩事呀佢？」Aaron 問佢地。
「佢無喇喇暈左！臉青口唇白，使唔使call 白車？」其中一名學生好驚慌。
「Call 白車都駛唔到入來架喎！」Lok 又再次一語中的。
「咁點算呀？」
忽然呢到出現左一陣小混亂。
「唔該借借！唔好意思！」呢個時候，有個男人穿過人群，走左過來。佢年紀比我地大，但都算係後生仔，佢拎住個藥箱，似乎可以幫到手。
「係咪有人暈左？麻煩大家散一散開先，係唔該。」佢駕輕就熟咁準備好急救既用品，準備對個學生進行急救。
然後個男人忽然望住我。
「可唔可以拉支凍水畀我？」佢問，我即刻點點頭，四圍搵支凍水。
-
經過左一陣之後，個男人已經救返醒個學生。
「你好返少少未？點叫你呀？」男人問。
「嗯⋯⋯叫我 Jimmy 得喇，唔該曬你。」岩岩暈低個個學生明顯仲有些少虛弱。
「覺得唔舒服就要再出聲，我就係呢到附近，我叫 Mike。如果真係好唔舒服，記住返屋企抖下先，呢到有我地咁多人頂住，你地可以放心。」個男人微笑咁講，然後佢企起身，走過來我地呢邊。
「岩岩唔該曬你地，我叫 Mike。」佢伸手想同我地握手，我地都逐一同佢握手結識。
「我叫 Tony，你好。」我有少少怕羞咁講，因為未試過咁樣去識陌生人。
「佢地始終係中學生，可能你地要幫手睇一睇住佢地，好嘛？唔該曬！」Mike 笑笑口咁講，然後就返返去佢坐既地方。
-
呢幾日，我地都坐起同一個地方，慢慢就同 Jimmy 個班中學生都算識左。
令我在意既係 Jimmy 真係好努力溫書，佢完全唔放棄任何一個機會去準備考試。
佢同我講，DSE只有一次機會，不容有失，衰左既話，即係人生都衰埋。
我地幾個尷尬左互望一下，因為四兄弟之中，得 Lok 一個入到大學⋯⋯
而另一個令我好在意既人，係 Jimmy 既朋友 Sandy。佢係女高中生，係 Jimmy 既同學，所以照計佢都應該要係好好準備DSE至係。但 Sandy 同 Jimmy 相反，佢唔單止無拎住本「DSE攻略」日讀夜讀，反而拎住本漫畫起到日讀夜讀。
「中華一番？」我望住 Sandy 睇個本漫畫，唔小心講左出聲。
「係呀！你都有睇？」Sandy 好興奮咁望住我。
「無⋯⋯不過我只係奇怪，明明好少女仔會睇呢種漫畫。」
「女仔唔可以中意煮野食咩？」Sandy 問我。
「唔係⋯⋯緊係唔係，但你中意煮中餐？」我問返佢。
「係呀！中餐博大精深，比起西餐更加有挑戰性！」Sandy 講起中餐，對眼好似識發光咁。
「溫書喇你！煮中餐？發下夢好喇，綜合卷你上次得10分咋！」Jimmy 插把口埋來。
「唉，都唔知考試係咪真係咁重要，你睇下呢堆 formula，我都唔知第時返工係咪真係要用。」Sandy 一臉抱怨咁講，其實佢講既都唔係無道理⋯⋯
「背曬佢，你考得好地地，咪可以入大學囉，一天光曬架喇。」Jimmy 望住本書咁講。
「咁然之後呢？」Lok 忽然開聲，我地全部人都望住佢。
「下？」Jimmy 望返住 Lok。
「入左大學，之後點？」Lok 好認真咁問，Jimmy 一時間啞口無言，答唔出。
「入大學，係為左將來架姐都係，重要既係，你想做咩。」Lok 講完之後望左下 Sandy，對 Sandy 表示支持。
Lok 呢份人講野真係好中 point。
呢個時候，Mike 經過左我地，然後有一兩個警察同 Mike 開始傾計。
佢地交頭接耳，似乎講緊好重要既野。
我全神貫注望住佢地，忽然感覺到濕濕地⋯⋯原來係個天開始落雨。
「執野呀！去演藝個邊避！」大家開始引導人群去有瓦遮頭既地方。
有人無帶遮，又搵唔到雨褸，好狼狽，呢個時候同 Mike 傾計既警察遞左幾把遮畀 Mike，然後 Mike 開始將遮交比有需要既人。
大家都好有秩序，好和平。
散去有瓦遮頭既地方。
-
我地幾個同 Jimmy、Sandy 幾個開左個what's app group，以便大家有咩不時之需。而我地都加左 Mike 入去，可能始終有佢係到會定少少。
Mike 同我地講，個個警察叫 Terence，係佢既朋友。Terence 話局勢持續咁僵持落去，上頭好快會做野，佢叫 Mike 盡快離開，以免有危險。
Mike 當然話要堅持落去，一日爭取唔到真普選，Mike 話都唔會放棄。
「比著之前，可能我唔會咁堅持。但而家，我想堅持落去。」Mike 好意味深長咁同我講。
「點解既？」
「因為今次，我真係見到希望，係香港既希望。」Mike 雙眼有神咁講，從佢既眼神我可以感覺到，佢真係對香港好有信心。
我都開始比佢感染到。
係，香港，仲有得救。
未完待續