《香港唔係追夢既地方》: Episode 05

Episode 5

Jayden 既生命，唔長久，但佢比好多人既生命都要燦爛同光輝。

因為佢從來無放棄過希望。

-

「一起舉傘
一起的撐




一起儘管不安卻不孤單
對嗎？
一起舉傘
舉起手撐
一起為應得的放膽爭取
怕嗎？
任暴雨下
志向未倒下
雨傘是一朵朵的花
不枯也不散」





-

望住呢班敢去唱呢首歌既歌星，我好敬佩，亦都好羨慕，我好想可以成為其中一份子，用自己既歌聲去為世界、為社會、為香港做返少少野。

Jayden 講得好岩，我唔應該放棄。

終有一日，我都會企係台上面，為香港唱出香港人既聲音，唱比全世界聽，唱比所有人聽。

-





只可惜，人生總唔會一帆風順。

雨傘運動最終都持續唔到落去，人群一日一日咁散去，最終曾經一齊努力過既戰友，今日都只能各散東西。

各有自己既生活，自己既忙碌。

香港既馬路又再好似以前一樣咁繁忙，所有帳篷同雨傘，都消失得一乾二淨。

Jimmy 同 Sandy 做返佢地既中學生，繼續準備既DSE考試。

而 Mike 同 Terence 既友情，都好似面臨決裂既關口，睇住 Mike 既 Facebook icon 變成黃色絲帶，同藍色絲帶 icon 既 Terence 解除左朋友關係，我個心有種好難以形容既感覺。

-





雨傘運動落幕，今日既天空再無催淚煙同胡椒味，反而有少少清新爽朗既感覺。

但我唔中意呢種咁令人唔舒服既平靜。

今日係 Jayden 既葬禮，仲記得最後一次見佢，佢仲係笑笑口同我傾計，講夢想、講未來。

唔知點解諗起佢個種對未來期盼既開朗笑容，我個鼻頭好酸。上天好仁慈，賜左一個咁好既朋友畀我。但同樣，上天都好殘忍，要一個好似天使咁既人，咁快返去佢身邊。

有好多好耐無見既臉口都有出現，有過去既老師、同學、佢既屋企人⋯⋯不過特別既係，佢地每個人手上都拎住一樣野。

紙飛機。

「Jayden 生前好想飛，但因為佢既病，令佢唔可以去試下滑翔傘呀⋯⋯降傘呀咁既活動，就連兒童跳樓機，佢都唔可以試。」Jayden 媽媽開始朗讀佢準備既說詞。

「我好榮幸，可以做到 Jayden 既媽媽，想飛並唔係錯、並唔係罪。佢最大既心願，係可以睇到身邊既人，一齊為理想而努力。你地呢？你地有無自己既理想？你地有無試過想飛？」





「我無，我之前只係諗住，點樣可以醫好 Jayden 既病，因為我最大既理想，就係我個仔。」Jayden 媽媽聲音沙啞，但佢堅持繼續講落去。

「我今日講既呢番說話，都係講畀在場咁多位聽，都係 Jayden 想同大家講既一句說話⋯⋯」

「唔好放棄，永遠唔好放棄。」

-

Jayden 正式入土為安，而我地亦一齊，用力咁掟出自己既紙飛機，用力咁掟出自己既理想。

上天待 Jayden 都不薄，送上清勁既涼風，盛載住我地每一個人既理想、思念。一架架純白色既紙飛機，係天空翱翔，係我一生人裡面見過最靚、最靚既景色。

多謝你，Jayden。





-

生活，又再恢復平靜。

政府依然放肆，人們依然沉默。

「喂！份野後日 deadline，今日要準備好喇！聽日就要背 script 練 present喇！」

講野呢位，係我做project 既同學、組員，佢叫 Jack。

「咁我講呢part喇啵？我返去練練佢先。」我講。

「好好好！就咁話喇！」Jack 好爽快咁講。

其實我同 Jack 都算係好朋友，佢都carry左我唔少次。佢份人幾有自己既諗法，同時都好現實，好清楚要係呢個社會，佢要點做先可以生存。





對於我來講，Jack 同 Jayden 好似一對相反既存在。

Jayden 代表既係美好既夢想，而 Jack 代表既係殘酷既現實。

「喂 Tony，交唔交form？」Jack 拍一拍，問我。

「交咩 form？」

「政府請文員呀，apply左先呀嘛，底薪都有萬四五，算唔錯架喇。」

「下？政府工？好悶架喎⋯⋯你無理想架咩？」

「我理想就係買車上樓，穩穩定定過埋下半世，唔好搞咁多野喇。」Jack 漫不經心咁講。

「係香港地，你唔穩定少少打份工，唔好話理想，隨時連屋都無得你住呀！呀你提左我，陣間交埋張form排公屋，而家排得來都要十年先住得，真係痴線。」Jack 苦笑。

「係⋯⋯真係痴線。」

痴線既，係我地，定係香港呢個地方？

未完待續