《香港唔係追夢既地方》: Episode 11

Episode 11

「朋友，我當你一秒朋友。」

「朋友，我當你一世朋友。」

「奇怪過去再不堪回首，懷緬時時其實還有。」

Sherry 靜靜坐左係我身邊，無講任何野，淨係默默咁陪住我。





可能，Aaron、Chris 同 Lok 都係我既最佳損友。

「朋友，你試過將我營救。朋友，你試過把我批鬥。無法再與你交心聯手⋯⋯」

不過⋯⋯

「畢竟難得有過最佳損友。」

係。





「從前共你，促膝把酒傾通宵都不夠，我有痛快過，你有沒有？」

你地，有無掛住往日係公園飲酒傾到三更半夜，咩都講咩都呻既日子？

「很多東西今生只可給你，保守至到永久，別人如何明白透。實實在在踏入過我宇宙，即使相處到有個裂口⋯⋯命運決定了，以後再沒法聚頭，但說過去，卻那樣厚⋯⋯」

「問我有沒有，確實也沒有一直躲避的藉口⋯⋯非什麼大仇，為何舊知己在最後變不到老友？」

「不知你是我敵友，已沒法望透。被推著走，跟著生活流⋯⋯」





「來年陌生的，是昨日最親的某某。」

可能下一年，我同 Aaron 已經變成點頭之交，佢有佢既同事朋友、保險生活，為左跑數而日夜奮鬥。而同我，就一日一日變得陌生⋯⋯

我唔知道佢會唔會同我一樣，都會懷念以前，但我就一定會。

因為佢曾經都係我最親既某某。

-

喊左一輪，個心都開始平靜落來，Sherry 遞左張紙巾畀我。

「無事呀嘛你？」Sherry 仍然好溫柔，我唔想佢聽到我把爛聲，所以我只係搖搖頭，接過佢張紙巾，抹下眼淚。

「次次見你都係眼腫鼻腫，上次雨傘運動又係咁，今次你又係咁，下次可戈唔可以唔好係咁？」Sherry 笑笑口咁講，我都忍唔住笑，原來上次真係佢。





「生活有時就係咁殘酷，有時我地都可能會承受唔到，但都要堅強捱過去，因為我地就係我地自己本身既傳奇。」Sherry 好堅定咁講，我有時真係好佩服佢，點解佢可以咁強悍⋯⋯我到而家都仲未可以追上佢。

如果我當時夠強，或者我地就唔會⋯⋯

「雖然我唔知道點解你咁傷心，但一定係遇到好大既挫折，你先會咁。加油呀！人生溜溜長，仲有好多關要你過，唔可以咁易就畀人打敗，知道嗎？」Sherry 笑笑口咁講，睇見佢充滿自信同希望既笑容，真係畀左好大動力我。

佢仍然都係咁靚，咁燦爛。

「係呢⋯⋯套劇你寫得幾好喎，你將來會唔會做編劇？」係，我記得佢好中意寫野，佢仲講過佢想做作家。

「你點知我想做編劇架？我真係諗住做編劇架⋯⋯我有好多故事想講，除左小說之外，我更加想我寫既故事可以變成影像，影響更多既人。」Sherry 好憧憬咁講，一個有理想有夢想既人，真係好靚、好吸引。

「你要加油，你得架。」





「多謝你，你都要一齊加油，做自己想做既野。」Sherry 微微一笑，佢既笑容永遠都係咁輕描淡寫，但偏偏係最美麗。

【慶完功未呀BB？】呢個時候 Jamie 傳左個 what's app畀我。

「你女朋友搵你喇喎，係時候要返去喇。」Sherry 微微一笑，我點點頭，就起身走喇。

「係，多謝你陪左我咁耐。」我好平淡咁講。

「只係咁岩路過，陪下一個失意既好朋友姐，唔使多謝。」Sherry 講。

係⋯⋯好朋友姐，唔好諗咁多。

【我返緊屋企喇，BB。】我覆返 Jamie。

【Love you forever! 返去早D休息喇，你都累。】Jamie 再覆我。





正當我行左兩步禁緊電話既時候，Sherry 忽然叫住我。

「Tony！」

我即刻轉身望住佢。

「我地會再見架可？」Sherry 忽然問，我笑一笑，點點頭。

「會，一定會。」

-

自從完成左呢套音樂劇之後，我就好努力咁預備副學士生涯最後一個考試，亦根本無時間去諗其他野。可能大家都各有各忙，四兄弟唔再聚埋一齊，而係越行越遠。





「下？又得返二百蚊？唉，未出糧喎……」我望住絕望既櫃員機，真係唔知做咩好，呢排掛住考試又無咩點返工……

「點呀？我借住畀你先喇。」Jamie 真係善解人意，好彩我有個咁精打細算既女朋友。

「大人救命之恩，小人沒齒難忘，唯有以身相許……」

「咪住先，我有D野要同你講。」Jamie 一本正經咁既樣，斃喇……

「你有無諗過我地將來架？你下下咁樣洗清光唔係辦法架喎，你而家唔開始儲錢，將來點結婚，點買樓呢？所以為左我地既將來，我諗左個方法畀你。」Jamie 奸笑，我都心知不妙。

「大人，你想點？」我震曬咁問佢，佢笑笑口拎左個豬仔錢箱同一本簿仔出來。

「拿，呢個就畀你儲錢用既，我諗左好耐架喇，所以你無得 say no。」

原來一早設左個伏畀我既，你好野！

「仲有，呢本就係寫低你既收入同支出，無論你今日搭左幾多程車、用左幾多錢，你都要寫低佢，學識咩叫量入為出，咁先可以儲到錢架，知無？畀你既。」Jamie 一野塞曬畀我，我就知道，大難臨頭……

唔通，我咁快就要做老婆奴？

未完待續