《男人多情而長情，女人專情而絕情》: 第二十四章
但我扮到無野咁，但其實個心好緊張，個人薑硬左咁，唔郁得。
到落車既時候，我輕輕拍一拍佢個頭，佢起身用眼神問我：「嗯...咩事？」
「落車啦。」我輕聲地講。
去到拎位既時候，發覺幾多人咁。
「好多人喔，咁點好？」
「我都唔知呀。」佢撓一撓我隻手，「你話事啦。」
其實男人無咩經驗同堆無反感既話，真係好難拒絕。
就好似依家咁，我真係唔知點拒絕KaKa既攻勢......
我同KaKa去行下其他地方，邊行邊等位。
佢撓住我住手行街，「係呢，你同女朋友點呀？」
哇，佢問D問題叫人點答呀？
『關係＿事咩？』你又唔會咁串，『咩點呀？』咁樣又白痴左D，你明明知佢想問D咩。
佢都幾識套料喔，定係女人都係咁？講野咁利既。
「無呀，咪又係咁。」其實答得都幾語無倫次，因為真係唔知點答佢。
佢輕輕咁甩一甩開我隻手，走去睇衫。
「咁我好D定你女朋友好D呀？」佢無望住我，好專心咁揀緊衫，問得好輕鬆。
但呢個問題既攻擊力卻好勁，足夠秒殺我。
答邊個都唔係啦，焗住人地答中間位既姐。
「各有各好啦。」除左答呢個，我諗唔到可以點答。
同佢出左兩次間，佢講野都唔係咁既，唔知點解今晚講野特別有骨咁。
「咁我既好多D定係你女朋友多D？」佢窮追不捨。
「咁緊女朋友啦，唔好都唔揀佢啦。」呢句我真係好真心。
「咁姐係...我唔夠好啦。」佢講得好細聲，但句說話好重，所以直入我心。
其實佢唔係唔好，佢係好女仔黎，但我地唔岩姐。
咁我同康僑岩咩？我唔知，有一定既時間相處，就會清楚。
咁點解唔俾機會KaKa試下相處？
「你唔係唔好，係時間唔好姐。」我講完之後就即刻講：「應該到我地啦，我地返去睇下啦。」
繼續講落去就死啦，我無理佢有無跟埋黎，我就去睇下到我地未。
「好啦。」好彩佢都有跟上黎。
之後我地就無再講過呢一個話題。
我連提都唔敢提。
餐飯食得幾愉快，KaKa食得幾有儀態。
其實不得不承認佢係幾港女，但食野方面佢係不失大體。
可能佢食貴野養成既，我食野就無佢咁有儀態啦，慣左大咧咧。
KaKa呢樣同康僑一樣，好鬼優雅。
食完飯就同佢行下北角海旁，再行到去鰂魚涌公園果邊。
果邊既夜色好靚，D氛圍根本就係溫馨，岩俾情侶去既。
呢個公園，我同康僑成日都黎，呢次係我第一次同另一個異性黎。
但感覺卻截然不同，同康僑黎係好輕鬆自在，而同KaKa黎係好緊張。
「好舒服呀呢度。」微風拍打係KaKa塊面度，吹起佢既長髮，好女神feel。
「你無黎過呢度咩？」我有D訝異。
「無呀。」佢整理一下凌亂既散髮。
「住港島點會未黎過呢度？」
「住港島就一定黎過呢度？」
係喔，「唔係，只係呢度出名靚，估唔到你未黎過姐。」
「我唔係住呢度附近呀嘛，我住南區果頭嫁。」佢對住我笑一笑，「你份人真係有趣既姐。」
「我好鐘意你呢D咁有趣既人。」佢成日望我既眼神都好像有其他意思，搞到唔夠膽直視佢既目光。
咁算唔算係表白呢？
其實我唔明，唔明自己究竟何德何能，會有兩個女仔同我表白？而自己未曾表過白，未曾真正咁去追一個女仔。
呢個情境好虛幻，好唔真實。
我不禁懷疑自己係咪俾人玩？
「唔好講笑啦，我呢D人你邊會鐘意呀？」
「點解唔會？」佢好堅定咁望住我，唔似係講笑。
我真係難分真與假......
此刻既氣氛，令我個頭諗唔到野，我想將此時此刻交俾感覺。
想將理性呢家野拋誅腦後，咩野唔理。
因為我個腦一直都話俾我知，要堅持，唔可以咁。
但越壓抑，反效果就越大。
越同自己講唔得嫁咁樣，就越想去做，越想去嘗試去突破。
就好似人地同你講，你咁樣唔得嫁，但你唔服輸，越想去做俾人睇，證明自己咁。
「其實呢一刻既你，係咪真嫁？」似幻疑虐既感覺一直充斥住我個腦，我好亂。
「點為之真？」佢問返一個問題俾我。
「專一既感情就係真感情？平淡既感情就係真實？其實感情裡面咪又係一場戲，只係你唔知原來你就係戲當中既主角姐。」KaKa望住個海徐徐地道。
我感覺到佢背後有好多故事，唔似咁單純。
但此刻我無諗咁多，我只係覺得佢好有魅力，好吸引我。
我......我好想錫佢，但我卻步。
我以為呢半年我會變到咩都敢做，但其實本性係改唔到。
「做咩呀？想錫我呀？」佢慢慢轉個頭黎望住我。
頂，又會俾佢睇穿曬既？係咪我表現得太明顯？
「你唔係第一個想錫我既男仔，只係我想唔想俾佢地錫姐。」
大姐，你咁樣邊似無拍過拖呀？定係收兵神手？
呢個時候，我聽到電話響，KaKa下意識去睇下係咪自己手機響。
但發覺唔係佢手機響，而係我。
我一拎起部手機，睇下邊個打黎既。
一睇，康僑。
接定唔接好......?
「邊個打俾你呀？女朋友？」佢有偷望我部電話，大約估到係邊個黎。
我一路由佢響，「嚀」、「嚀」聲響不停。
「聽啦，怕咩姐男人老狗。」佢兇我。
我估唔到佢會咁樣兇我。
我聽到就啦啦聲聽左佢。
「喂？咩事呀？」我裝作語氣平靜。
「無呀，我食完飯，想睇下你係邊姐。」
係我聽緊電話既同時，KaKa佢伸過頭埋黎，明顯係想聽我地既內容。
但佢一行埋黎，我就聞到佢既髮香，而且佢仲係我耳仔邊吹氣。
明顯係玩勁我姐，果一刻，我想即刻收線，但我唔得。
「我岩岩同完家姐食完飯呀，行一陣就返去啦。」我又講大話。
「我仲想黎搵下你添。」佢係電話裡頭對住我撒嬌。
咁我自然要哄下佢，「唔好咁啦，聽日都見嫁啦。」
「人地依家想見你呀嘛。」
我聽到KaKa佢忍唔住笑左一笑，好彩佢無笑出聲，如果唔係我都唔知點兜。
但係我都係拒絕左康僑，聽日都見嫁啦，咁心急做咩姐。
我地明明都已經成日見，見少一日都唔夠咩？
「乖啦，聽日先見啦好無？」我講得有D強硬。
而康僑都感覺到出黎，「好啦，咁聽日見啦。」
「聽日見啦。」然後就收左線。
「做咩唔去見佢姐，你女朋友黎嫁喔。」
好明顯聽得出佢聲音係有D醋意。
「唔洗啦，我地見面既時間又唔多。」
「有道理，咁你今晚就好好地陪下我啦。」
佢示意我跟住佢行，好似帶緊小朋友出街咁。
我地行到去石春路果頭，佢好興奮咁叫住我。
「華dee華dee，去玩果個呀，好無呀？」
「你做咩咁興奮姐，你未玩過咩？」
「我平時少玩呀嘛，我地果度樓下都無既，得健身室炸。」
有錢人都會有咁情況，咁又係既，兩個唔同世界，自然D野都會唔同。
有人想係裡面走出黎，有人就拼命咁想走入去，真係諷刺。
其實玩石頭路我真係覺得無咩野，因為我唔係幾感覺到痛。
但KaKa就叫到殺豬咁款，「好痛呀！呀！」
「點解呢度果D咁痛既？同我之後玩開果D唔同。」佢捱係欄杆度，一臉無力咁對住我講。
「我點知姐，你問設計呢個公園既人啦。」
「我唔得啦，我唔理，你揹我出去呀！」佢D要求都幾無理嫁喔，岩岩仲係咁叫我聽康僑電話。
女人真係菜煲......
咁我就揹個我一半體重既野出返去，佢壓上黎既時候我就真係感覺到痛啦。
不過佢貼到好實，我可以感覺到佢姣好既身材。
雖然抽水只係抽得一段路仔，不過都抵既。
咁出返去我就放返佢落黎，「估唔到我行到一半就唔得啦。」
「唉，老啦老啦。」佢講笑咁講，但言語間帶點感歎。
「咁跟住你想去邊呢小姐？」其實我想返屋企啦。
「依家幾點呀？」
我拎起部電話睇下，「9點半度啦。」
「仲有時候，陪我搭船去對面既三家村啦！」佢指一指對面海。
KaKa真係攞人命都算夜嫁啦，仲要過埋海。
咁又唔係成日，我又覺得唔算過份既。
KaKa行去前面既小小渡海小輪，去只係需要6個幾，陪佢坐係度等船。
其實我咩唔知嫁對面，我去都無去過。