《男人多情而長情，女人專情而絕情》: 第二十六章
係既，每個人都有追求幸福既權利，呢句野係我當初同康僑講，依家卻風水輪流轉啦。
已經戀到無可戀慕後 換到同情才罷休
佢行去許願樹果邊，抬頭望一望棵樹，係幾大棵既。
粗大既樹幹同樹根，可見呢棵樹有返咁上下歷史。
我見到樹中間有個心形既牌，上面寫住「許願樹」。
中間記載住許願樹既來歷同歷史。
呢D野對我黎講可有可無，但對KaKa黎講好似意義重大咁。
佢雙手合十，誠心誠意咁低頭許願。
受佢影響，雖然我覺得無咩用，但我都許左1個願望。
我覺得一個就算，試下佢靈唔靈。
『我希望我搵到真愛。』
而我許完願望既時候，KaKa亦都許完願。
「KaKa，你許左咩願呀?」我八卦咁問佢。
「講左出黎就唔靈嫁啦。」佢依然好誠心咁講，睇黎仲未走得返出黎。
「好啦，講笑姐，洗乜咁認真呀?」放鬆D啦年輕人。
「返去啦八卦仔。」佢講完又走左去。
佢講完無等我應佢，就慢慢咁行過去燈塔果邊，行得十分蹣跚，成個企鵝咁。
我慢慢行係佢後面，但由於潮漲關係，行去果邊要經過一灘水。
我唔知係咪精蟲上腦定唔知咩啦，我見佢係灘水面前停頓左落黎，就捉住左佢隻手。
然後慢慢咁，想一步一步咁帶KaKa過去。
佢見到我有咁既舉動，先係驚訝
，然後怕怕地羞
，最後笑到好甜
果個畫面好熟悉，此刻KaKa既笑容同康僑既笑容重疊左一齊。
曾經我都一樣同康僑經歷緊呢D野，但最後卻敵不過時間。
錯覺一再出現係我跟前，回憶如號角聲四起。
我拖住KaKa隻手拖到上燈塔果邊，無放開過。
一直拖住佢遠望呢個漆黑既大海。
強勁既海風吹埋黎，令我異常清醒，但越清醒，我既感覺就越清晰，就越強烈。
我地已經無得返轉頭，呃到人點都呃唔到自己。
「好啦，走啦，係時候返去啦。」佢拖住我隻手落去。
我地兩個搵左好耐先搵到個地鐵站係邊，因為都幾遠下，加上我又唔係幾識路。
兩個方向感勁低既傻仔傻傻下咁搵路，邊有效率嫁。
唔好問啦，我地連google map都可以用錯曬睇錯曬。
一個搵女朋友搵左差唔多16年，一個搵左16年都搵唔到佢男朋友。
真係幾陰公下......但最後係我地問路既情況下搵到路既。
曬左45分鐘送佢返屋企啦，終於都要say goodbye。
開心既時間真係幾快既，咁快就要講byebye。
「今晚可以同你出黎，我真係好開心，你帶俾我既回憶唔係其他人可以俾到。」
「我都係呀，呢一晚我都好開心。」今次輪到我用不一樣既眼神望住佢。
好多謝你呢晚講左咁多野俾我知，你唔講，可能我咩都唔知，就咩事都無，但事情發展到咁已經無彎轉。
「你會一直係我心入面，I promise。」然後佢指一指我，再指一指自己個胸，唔係，係心口。
然後佢就拉左我過黎，直接錫我嘴唇。
今晚我真係受唔少刺激呀，成日俾佢嚇親，但又幾興奮既，幾新鮮。
但我估唔到跟住落黎既野仲刺激仲得人驚。
我好陶醉係呢個kiss度，我感覺到KaKa既嘴唇比康僑既柔軟。
亦更加感覺到佢果種激情，果服衝動；而康僑既只係好平淡，點綴式既kiss。
KaKa又帶俾我一種另類既感受。
我地都唔捨得放開，越錫得耐，攬得就越實。
但最後唔知係咪因為佢無氣，佢放開左我。
而係佢放開我既同時。
我望到KaKa背後有個熟悉既臉龐。
——————康僑
要怎麼雲淡風情 關於愛過 這件事情
我第一下既即場反應係推開左KaKa，第二下係無反應。
講真果句，你遇著呢D情況你會點做／你可以點做？
我當刻既腦袋真係一片空白，咩都反應唔過黎。
康僑佢岩岩係果橦大廈行出黎。
康僑佢見到KaKa，其實佢都呆左，過左一陣先識反應。
講左句「Hi，咁岩呀？」
但我感覺到，佢連講呢句都好勉強。
然後就急急腳係我身邊行過左.......
我係望住佢走，唔識郁。
我感覺到後面有人推一推我，我望一望後面。
係KaKa，「去追人啦傻仔。」佢又係衝住我笑一笑。
究竟有無人可以同我講發生咩事？？？
點解康僑會出現係呢度？？？
仲要咁岩見到果一幕？？？
個天是咪玩勁我？？？
我望住KaKa佢轉身行入去岩岩康僑有出黎既大樓。
呢個係咪一個局黎？？？
當我意識到要追上去既時候，已經太遲。
人影都揾唔到啦，仲點會見到康僑呀。
係附近搵過曬，跑到身水身汗，咩野都唔見。
係突然間覺得好似咩野都唔見曬咁，好驚。
好似你細細個，行行下街唔見左老豆老母咁，好無助，唔知點算。
岩岩同KaKa既春宵一刻已經俾我拋誅腦後，呢件事比較著急同重要得多。
我一路搵一路打電話，都打唔通俾佢。
康僑呀康僑，你係邊呀？唔好嚇我呀。
呢一刻我先知錯，我先知原來不知不覺間佢係顯得如斯重要。
我想像唔到我無左佢既日子。
我終於明白點解結左婚既男人偷完食，點都要返去老婆果度。
你飛鬼左佢未算囉，俾人捉到咪捉到囉，食出面果件囉，你無蝕底嫁。蝕底既係你老婆！無曬青春咩都無曬。
但係你點解都仲要咁樣做？求都要求返佢返黎？男人點可以無尊嚴？
係因為佢已經成為你生活既一部分，大家互相依賴。
走左揾另一個重新建立呢種關係？你肯定有把握出面果個女人會陪你捱？
會甘心同你一齊變老？
唔係你老婆無左你唔得，係你唔可以無左你老婆！
我依家好明白呢種「知錯」既感受。
你可能會話，你明知會搞到咁，又何必當初呢？
我唔後悔同KaKa發生過既野，再黎一次機會都只係歷史再重演一次。
但我唔想康僑知道呢件事，我再見返康僑既時候，我唔會諗起KaKa，而我知道康僑既重要性。
可以既話我真係唔想康僑出現係果度。
我搵過曬康僑可能出現既地方，連佢既腳毛都見唔到。
最後，我用左最終極既方法。
打上去佢屋企！睇下佢返左去未，返左佢起碼知佢行蹤，好過依家乜叉都唔知，白擔心一場呀嘛。
我之前有問過康僑拎佢屋企電話黎煲電話粥。
咁我就扮下把聲，扮低沈D，然後打電話俾佢屋企。
「嘟」左幾下，估唔到咁快就有人接聽。
「喂？請問搵邊位？」係一把幾慈祥既聲線，我猜想係伯母。
「你好呀，我想揾阮康僑，請問佢係唔係度呀？」我扮聲咁問佢，連我自己都聽得出好假，都幾怕俾佢識穿。
「康僑佢仲未返黎喎，請問係邊位搵佢呢？」佢語氣真係好溫文爾雅，不禁對佢由生敬意，康僑遺傳曬佢D好野啦一定。
「我係香城中學既林主任，打黎係想同康僑討論一下下年班上既事兒，咁佢竟然唔係度我就係遲下打過黎啦，麻煩曬小姐你。」我都好客氣咁同佢道別。
「唔洗。」然後就收左線。
咁樣就死火啦，康僑佢無返到屋企。
咁夜啦都，佢仲去得邊呀？
我又再沿返岩岩果條路搵多次。
我都唔係抱幾大期望嫁啦，但點都好，俾自己努力埋最後呢個機會呀嘛。
沿路都一樣唔見康僑既蹤影，得返前面岩岩同KaKa吻別既公園仔姐。
都心諗唔會搵到康僑嫁啦，正當我諗住轉身離開既時候。
我聽到旁邊有好細聲既抽泣聲，細心D聽，佢唔係喊緊。
似係喊完一排，D鼻水收唔到既聲音，我估應該係康僑。
呢一下抽泣聲短暫而細聲，本來應該就聽唔到既，但係依家無人又咁靜，好難聽唔到。
但我搵唔到聲音既來源，四周圍都無人，究竟係邊呢？
「康僑！我知你係度嫁！」我係公園度大嗌，「你出黎啦！」
「我知錯啦，你唔好嚇我呀，出黎啦康僑。」
「我Hi Auntie咩，你收爹啦Hi Hi！你嚇向左走向右走親我呀！當人地係比卡超咩Auntie臭系，聽朝仲要返工嫁死Hi Hi仔！」好明顯把聲唔係康僑既，語氣都唔似佢啦緊係。
而係出自樓上既居民把口，睇黎我係嘈到佢地。
俾人咁樣用粗口Hi法，你無得唔自動Stop la啦。
咁我唯有慢慢搵......
草叢，牆背後呀，搵過曬都唔見有。
當我低頭諗緊康僑究竟會係邊既時候，我見到燈柱照射係個「Sir滑梯」。
我係個Sir滑梯見到有個人影，唔洗估都知係邊個啦係咪？
我慢慢行過去康僑果邊，係Sir滑梯隔離坐底。