「小姐,你對馬好有興趣~?我都好有研究。」卡金又走上前,從落地大玻璃俯視其中一隻黑色的馬兒:「我就話,個隻馬會贏啦~」

「唔好再騷擾我家小姐。」我走在卡金面前,說:「就算你幾有錢……喺死亡面前,每個人都係平等。」

「你…你想點啊…」卡金退後幾步,說:「大家斯文人!」

「小時,就俾佢繼續廢講。」霞胸有成竹的量視著會場眾馬,傲然的神氣又浮現到臉上:「我想試下騎馬比賽。」

「吓?」我愣住。





「喂,垃圾。」霞望住卡金,問:「我有冇得參加比賽?」

「咩…咩垃圾啊!我不靠父幹…白手興家嫁!我當日唔游快啲點做卡多個仔呀!!」

「垃圾,回答重點。」我抱住手、盯住他。

「…」卡金咬牙切齒地說:「雖然你的確係天仙下凡,但就算俾你參加到比賽…都無可能贏到!」

「點解?」霞問。





「因為馬場內所有參賽者嘅輸贏我哋一早暗裡控制好…參加得比賽嘅都係我哋嘅人,我哋嘅馬師!只要邊個少人落注,我哋就會事先講好俾佢贏!就算落注嘅人賠率好大,個啲通常都係我哋嘅人,即係左手交右手……所以你永遠無可能贏到我哋,因為我哋根本唔會受你玩。」卡金很快就全數道出自己父親馬場內的詭詐之道。

其實我一早都猜到九龍寨這些馬場是受人操控,因為這裡沒一樣東西是真的,包括肉……我至今還是有點介懷。

「哦哦~所以你哋,就驚我一個小女子會贏到你班壯健嘅騎師?」霞戚起眼眉。

「呃…我哋點會驚!你一個女仔又邊會贏到我哋!」卡金急急解釋。

「咁就接受我嘅挑戰。」





「……」卡金臉露難色,但還是硬著頭皮說:「好!我偷偷哋改個比賽出場名單,加你個名上去,但係有代價……!」

霞爽快地點頭同意:「好啊。」然後滿懷信心的,望了向FirstLove。

「代價係,三日之後,你要嚟我府上。」卡金說。

「喔~得嘅。」霞又點頭。

「…」我稍為望住了她。

「放心啦。」霞向我低聲地道,且淺淺一笑:「厹不厭詐。」

「好!即刻同你哋去搞一搞啲出場名單。」說罷,卡金就離開貴賓房。






「點解你要參加比賽?你咁樣曝光法…好危險。」我問。

「你仲未明?我要為FirstLove爭一口氣。」霞心高氣昂地答。

「為…佢?」

「我自細都養過馬、騎過馬,俾人困住喺屋企個陣,就覺得騎馬係最自在。」霞雙眼稍為放空一下,似是回憶到當時的畫面:「如今我遇到FirstLove,我第一眼望佢就已經覺得同佢好夾…就好似我同你咁,你話係咪?所以我要完成佢嘅心願。」

「總之,到時有唔對路就即刻走……」我知道多花嘴舌,也阻止不了她。
已有 0 人追稿