【殘忍的單戀非你專利】一個暗戀十年的故事: 那誰

「點解你冇女朋友既？」 
「有妳唔知姐……」 
「點樣樣架？」 
「咩點樣樣？」 
「點樣識架？」 
「Um……上大陸Dup骨識架…」 
「下……哦……」 
「點呀，唔問拿？」 
「唔好意思再問落去嘛…」 
「妳話架乍，唔好陣間又問呀下！」 


「咁……咁佢幾多歲呀？係咪好好身材o個種呀？」 

那個晚上， 
她沒有說起關於男朋友的事， 
我也沒有問。 
就像一對老朋友沒有見面一百年後一見如故。 
眼前的她還是我最依戀的女生， 
除了她， 
再沒有一個女生令我如此窩心。 
無論她把豉油碟打翻、 


無論她把一片廿元的魚生跌在桌上、 
無論她的鞋頭不停踢到我的上五吋下五吋， 
無論她根本沒有留意到以上任何一件事， 
我也一邊看著她的純真，然後微笑點頭。 

幾杯清酒倒進肚， 
Katrina 臉龐通紅可愛極了， 
她帶著醉意說起：「我失戀喇……」 
似曾相識的話匣， 
想起那個下午跟家勤在海中心釣魚。 


她左手托著腮一臉失落看著桌角， 
右手無意識的扭動著小餐牌架。 
我看著小餐牌架不規則的轉動， 
竟沒有一點暗喜， 
她的落寞讓我感到無奈。 

「佢話我唔明白佢，根本唔同世界… 
同我一齊只可以共富貴，唔可以共患難， 
同我一齊好攰… 
我話我可以改，會多D留意，多D了解佢， 
佢話我根本冇辦法改變， 
同我一齊搵唔到共鳴…唔岩Channel就係唔岩Channel… 
點解…… 
我又唔使錢又唔麻煩， 
又唔會要佢報到， 


又唔會要跟住佢去應酬， 
我要求既野好簡單之嘛…… 
就只係想佢關心我，同我去迪士尼…… 
點解要咁對我？ 
點解個個都係咁……我係咪真係咁差…？ 
點解D佢地都總係當我玩具……玩厭就話唔岩……」 

她一直在說， 
我一直在聽。 
她說的， 
我五年前已經知道。

她的單純是可愛， 
一個人隨著時間自不然會長大， 
然而，幸福的她是罕有保存童真的心境， 


她不拜金，與世無爭，天真爛漫的活了二十多年， 
她的世界只有美麗的向日葵花， 
跟她在一起會感到一種脫離現實的情景， 
是這個金錢世界唯一的綠洲， 
是我能沾染一點無污染空氣的純樸村莊。 
幸運的小仙子笑容像馬爾代夫的太陽一樣燦爛， 
於是， 
小仙子的落魄下雨天令我的世界也一同塌下。 

實情是， 
天使折翼落入凡間， 
總有另一種問題， 
就是她不解人情世故， 
跟凡人有著遠遠的距離。 



她不明白揹著都市壓力的人有多沉重、 
她不明白年輕人被老屎忽欺壓的怨憤、 
她不明白事倍功半、百斤半兩的不公平、 
也不知道眼前的我早已包容了她對以上的遲鈍。 
她只為吃不到將軍漢堡而失落。 

說著說著，她就醉薰薰托著腮睡了。 
結帳後，我揹起她的粉紅色小手袋、 
兩個紙袋和一本女性雜誌， 
然後把她抱起，離開日式料理。 
臨別時，老闆跟我說：「你呢個男朋友都算唔話得！」 

計程車上， 
除了看著不時從倒後鏡盯過來的的士司機， 
我一動也不動， 


穩如泰山坐在後座中間， 
是怕弄醒倚著我肩膀熟睡的她。 
這個時刻多美好， 
她像我的女友倚靠著我， 
只是眼角沾了一條綠色的淚痕。 

「哥仔，又到咯喎！」 
「Um……兜多個圈丫，唔該。」