百份百工作: Episode.2

3號房，係小職員通常開會既地方，房就四四方方，架生就一張長檯八張凳咁多多，門口無窗，係入面做乜都唔知，幾好架。唔係話小職員唔可以係其他房開會，只不過係大家都相信一件事，就係無咁大個title，唔好開咁大間房……係辦公室既禮貌。3號房既姿態，就正正適合呢d高就一定唔係高，低又低唔晒，但又決定唔到d乜既小職員去開會。
 
此刻，有幾個小職員係3號房走出0黎。火仔就係其中一人。睇見火仔個衰樣，就知呢個會無好0野。
 
火仔一行埋位，第一句就講：「又改啦，個Plan。」
 
坐佢隔離既阿勁，慢條斯理：「我明啦，都慣架啦。」跟住又拎返轉個頭，望返住個Mon，繼續做0野。
 
火仔望住無再回應既阿勁一陣，阿勁繼續無回應，心諗：阿勁你好波，多謝晒你既回應喎。
 




無乜癮，火仔走去茶水間斟杯水，途經阿Rex個位。
 
火仔一見到阿Rex，又呻：「班八婆又要改0野啦！」
 
「我明丫。」阿Rex0個副明白晒一切既死人樣，令火仔諗起某個牌子既傷風葯廣告。
 
火仔火氣未消，連珠炮發：「一早講好晒，Plan好晒0架啦，班八婆之前都仲話好，拍晒手咁，轉個頭，又話改。」
 
阿Rex氣定神閒：反問：「咁你係唔係真係Plan好晒先？又有無企係人地0個邊諗下先？」
 




「有啦，緊係有啦，個Prjoect一開始我已經叉隻腳埋去，跟足0架。」
 
阿Rex唔信咁款：「無理由0既，你跟足，你Plan好，無理由又要改0既。 」
 
眼見阿Rex好似唔係好明，都唔想多吹，繼續走去茶水間。
 
火仔回程既時候，見到多士，又呻：「上次話要搞0個個Project，又要改啦，班八婆真係唔諗0野0架！」
 
多士嘆氣：「我明丫，我都成日中招。」
 




「係啦…」正當火仔想開火，多士問：「咪住，有無鑊氣先？」
 
一盆冷水照頭淋，火仔即刻無晒癮：「有呀，攻到上天台添呀。」
 
火仔狗UP，多士都露出一副好害怕既樣，火仔諗佢真係揹鑊揹到傻0左。
 
返埋位，飲完杯水，咁0岩Peter行過，佢問火仔：「喂，煲煙or not？」火仔示意ok，兩條友就走0左落街。
 
一點煙，火仔就呻：「上次講0個個Project，班八婆又玩0野，又要改啦。你明唔明呀？真係好很煩呀！」
 
Peter二話不說，只係立即吐出一句：「表佢亞嫂。」
 
「正福娃！」
 
兩人又繼續扯啖深0既。




 
如果我真係明白你，身同感受，我又何需同你講太多？講太多，只係我明白你既處境，但唔明白你既感受。
 
https://www.facebook.com/kofigarden

(待續)本故事全屬虛構~如有雷同~實屬巧合~