[賠罪系列]錯過，錯愛: CH.4 也許，這是對我們最好的結果
CH.4 也許，這是對我們最好的結果
聽到黎宜君說這句話，我笑說:「講咩呀傻妹，我咁堅強點會咁易跌底呀，傻嫁咩。」
滴—
我的褲子突然有一滴小水點，於是馬上抬起頭說:「咦，係咪落雨?痴線嫁明明咁大個太陽，咁好天氣。何解我條褲有滴水既?喂，黎宜君你...」
她突然把我整個人擁抱着，並溫柔地撫摸着我的頭，像是一個媽媽在安慰不小心跌倒在地然後嚎哭的小孩。
「你做咩...做咩鬼呀，我真...真係無喊呀...好多人望住呀，快啲放…放開我啦。」我的聲線不由自主地顫抖着。
但事實是，我的臉上已經充滿着一道又一道的淚痕。
她繼續撫摸着我的頭，並親切地說道:「傻仔呀衡，仲話自己堅強喎...唔好死忍啦...即管喊出黎啦。」
我默不作聲，因為我已經哭成淚人，連說話這個基本動作都覺得很有難度，簡直是一件天方夜譚的事。
「我好...我好辛苦呀!!但係又無人知...我又唔敢係我班朋友面前喊，你知唔知屈係我個心裡面好辛苦呀。我好唔捨得佢呀!!!點解佢可以咁狠心...咁狠心破壞我地之間兩年既感情呀?我屈埋屈埋都好攰嫁，一直都係到扮堅強扮無野!!點解要咁呀...」
我已經失去理智，聲嘶力竭地大喊，幸好當時籃球場只有幾個中一生，否則明天學校就可能傳出「中五學生方天衡原來係個痴線佬」的消息了。
黎宜君繼續擁抱着我，讓我把頭放在她的膊頭上哭，並安慰我:「傻仔呀衡，想喊就喊啦。堅強既意思唔係叫你唔好喊，堅強既意思，係話你喊完之後，仲繼續開心地生活，唔放棄，先叫做堅強呀。」
「嗚…黎宜君，我好…我好辛苦呀…」我不斷重覆着這句說話。
不知過了多久，我的情緒開始平靜下來，並對黎宜君說:「我喊完啦...好多謝你。」
「......」
沒有反應...?
「放開我啦喂，我都知我好好攬。」我笑着說道。
「......」
還是沒有反應。
「喂...你唔好嚇鬼我呀喂。」
唔係暈鬼左呀嘛...
其後，我稍微用力把她推開，並輕輕力拍她的臉頰。
「唔...咦，我做咩放開左你既，岩岩我唔係攬住你嫁咩。」她微微張開眼，並用柔弱的聲線向我問道，像剛剛睡醒的小朋友般。
原來係訓着左...嚇死人咩。
「我岩岩喊完啦，之後我叫你放開我，你又無反應。我幾驚你暈鬼左，所以咪拉開你睇下發生咩事，原來係訓着左姐。」
鈴—
「打鐘啦，原來我都喊左好耐下。點都好啦，真係好多謝你，我呢家喊完真係舒服左好多。」我向她報以一個微笑。
「唔洗...有咩唔開心再同我講啦...」
原來被一個漂亮可愛的女孩關懷着，感覺挺爽的。
正當她想站起來的時候，她突然失去平衡，向前跌倒。幸好，我敏捷地把她扶住，並慌張地說道:「你無事呀嘛，企都企唔穩喎。洗唔洗送你去醫療室?你個樣好似好唔舒服咁。」
「無事...我應該岩岩訓醒，所以有少少仲未清醒姐，一陣就無事嫁啦...」她露出一個甜笑，可是卻很明顯地看得出，是強擠出來的。
我不作任何回應，隨即把她的右手放在我的膊頭上。
「做咩呀傻仔你!?」然後她擺出一副不知道驚喜還是驚慌的神情。
我霸氣地說道:「扶住你囉。一陣你行行下暈左係到咁點算?我都係扶你上去班房穩陣啲。」
她突然面紅耳赤，並低下頭說:「真係唔該晒你...我都覺得自己好麻煩...」
她是害羞嗎...?真是可愛~~
「痴線既，你岩岩先幫完我，我都未多謝你。唔洗咁客氣啦傻妹。」我其後拍了一拍她額前的空氣瀏海。
放學後，我去到郭詠彤的班房前。郭詠彤也馬上察覺我的存在，並露出吃驚的神情，看來她也預計不到我會主動來找她。
我向她揮揮手，並用手勢叫她出來。
「Hi。」我平淡地向她打招呼。
「Hello。」
我們兩人就像陌生人般對話着，中間隔住了幾層的隔膜，不再是之前那對甜甜蜜蜜的情侶交流着。
「不如...去老地方傾下?」我微笑着向郭詠彤說道。
「嗯。」她只能沉悶乏味地回應。
去到老地方的時候，我帶她坐在一個挺有意思的位置，並詢問她:「呀彤，妳仲記唔記得...呢個位...?」
「當然記得啦—」
「呢個位咪就係我地初初相識既位置。」
中三的某一天，我因為測驗不合格，所以被「親愛的」老師疲累轟炸到晚上。
「唉，條友真係麻尻煩，罰到我咁夜。屌，食番個M記開心番先。」
沒錯，我和郭詠彤之間的老地方，就是眾所尻...周知的M記。
我熟悉地向收銀員說道:「六件麥樂雞餐加大，飲芬達，係到食既。比包鹽同黑椒黎呀唔該。」
取餐後我才發現，晚上的M記竟然挺受歡迎的，差不多坐無虛席。幸好，我能夠看到遙遠有一張桌子，只有一名挺漂亮的女孩在用餐。
竟然有女孩會獨自一人吃M記，這個是我熟悉的世界嗎?
「我想問下有無人坐?」我發現原來她是跟我同一間學校的。難道她也是被老師懲罰嗎...可是她的樣子挺乖巧的，應該不會吧。
她向我投以一個微笑，並說道:「無呀~得我自己一個係到，你可以坐。」
原本我跟郭詠彤是各自各吃自己的食物，當我把黑椒跟鹽混合的時候，她突然好奇地看着我，並詢問我:「唔會咸得制咩...係咪真係好味嫁。」
她的樣子好像發現新大陸似的，於是我自信地對她說:「當然係好味啦，呢個方法我已經由細食到大。」
我將一條薯條放在她的面前，並笑着問道:「試唔試下?」
......
這就是我跟郭詠彤相識的故事。
「真係懷念個陣既我地...」她感嘆地說道，我還能夠看見她的眼睛露出輕微的淚光。
「對唔住—」
我把她拉回殘酷的現實，而她也認真地凝望着我。
「呀彤，可能我真係對你太過份，太管束住你。因為我太愛你，太緊張你先會咁樣做。但係，我從來都無顧過，甚至忽視左你既感受。完全唔知道，原來你係咁辛苦。連異性朋友都完全唔比你認識或者交流。係我既大男人主義搞到你咁痛苦，真係好對唔住—」
我吸了一口氣，並繼續說:「琴晚同今日我已經深思熟慮。我覺得自己可能真係仲未識點樣拍拖，點樣做一個稱職既男朋友，依然係一個好幼稚，好霸道既大男人。一對情侶之間最緊要係信任呢兩個字，但係我成日都質疑你。所以—」
「我覺得自己比唔到幸福你。分開，可能真係對我地兩個最好既結果。」
(待續)
我曾經向你立下的種種誓言，恐怕再也不能為你實現，就讓你未來的幸福替你實現吧。
高登Link:http://forum6.hkgolden.com/view.aspx?type=SY&message=6313640&highlight_id=0&page=1&authorOnly=False
大家可以順便入黎留番個名同正評，對我黎講係好大既動力黎。
下一篇會係聽日出。