一場十年的夢。: 和她的緣

我估大概讀者都會估到，後來係同咗家姐一齊。
嘩！姐妹丼喎！唔怕咩？
的確唔怕。
雖然我平日好介意人哋嘅睇法，但係愛情路上我從來我行我素。
就算見到呀妹都唔會尷尬，我先係受害者。
 
同家姐拍拖，感覺其實幾舒服。
舒服嘅原因有好多，其中一個係：
佢鍾意我多過我鍾意佢。
 


同佢一齊係因為佢示愛，
我諗唔到咩理由唔接受就諗住試下。
以往都係我比較喜歡對方，
所以對方成日都可以對我一啖砂糖一啖屎嚟應對我，
因為我總唔會話離開佢地，
而我就經常提心對方會離開我。
所以好多人，包括高登仔都話，
溝女最緊要係對對方唔上心，
你愈係WFC，條女就愈唔會走。
 


今次，應驗咗呢句說話。
 
戀情係我中五尾發生，
由於我其實都仲係有少少鍾意呀妹，
所以心情唔多好，無乜點溫書。
 
總帶少少考試運嘅我考會考，
本來打算死硬要讀IVE，
點知有好幾科比預想好，
死好彩咁就碌咗上預科。


JOHN哥就無我咁好彩，得八分，
諗住佢會去IVE啦，
佢又唔認命喎，竟然走咗去私立讀預科。
幾年後佢又係去邊連鎖壽司店到做，
唉，白白浪費兩年光陰。
呀晞同橦桐，自從分咗手就無乜點有交集，
所以都唔太清楚佢地嘅去向。
 
最終，初中至高中我熟識嘅朋友、舊情人，
各散東西。
 
 
預科生活係忙、忙、同忙，
忙到訓到無時間訓，
食飯都要拎住堆筆記邊食邊溫。


 
同班有三個留級生，其中一個叫小文。
 
小文係個小肥嘅女仔，
粗小腿、少少暗瘡、有把好長嘅頭髮、講野有少少痴脷筋。
佢成績算係咁，唔太差，應該係因佢讀多我地一年。
 
對佢，有種似曾相識嘅感覺。
好想同佢熟絡，好想同佢做朋友。
 
｢喂，對於細過你嘅男仔，你覺得點？｣後來熟咗我問佢。
｢DEE DEE我唔鍾意喎！｣好直接，好HURT，好直接咁HURT。
｢不過如果好成熟嘅話都可以考慮嘅～｣
嗯……有少少機。
自問比同年紀嘅男同學成熟少少，


最少佢地嗰D係課室扔蘋果之類嘅瘋癲行為我完全零參與興趣。
｢唉……我咁肥咁樣衰，邊會有人要呀！｣佢雙手禁住自己個頭叫春。
｢比信心自己啦，你都唔算肥。｣係我係好怕好瘦嘅女仔，情願佢地有多少肉地。
我從來唔會叫女仔減肥，原因分兩多類：

• 正宗肥婆，唔好意思，我食唔慣肥野，太肥嘅我會連朋友都唔想做。
• 其實唔肥。唔一定係真係唔肥嘅，只係我到肉嘅接受能力比較高，有腰嘅我都覺得OK，反而你話完全瘦到得排骨，我真係食唔落。若然我接受到嘅，我又何必叫佢地減呢？

 
係同小文相遇嘅五年後，
佢減肥成功，變得好好身型。
但我更想念嗰個肥肥地嘅小文，
而係差唔多嘅時間，我終於都知點解我會對小文有感覺。
 
再過三年，我出咗嚟做野，
曾經封咗面書嘅我因為一D原因開一開返面書，
轉嚟一個遲咗三幾個月嘅短訊：
｢喂！我結婚啦！你會唔會嚟呀？｣


 
個短訊嚟自小文。
｢噢！我閂咗我面書，唔知添！唉！MISS咗添！｣
｢唔緊要啦，我都係問下嘅啫。｣
｢吓？唔緊要？問下嘅啫？SOSAD，｣
｢我真係咁唔重要……｣
｢梗係唔係啦，嗰班人裡面，我淨係問你咋。｣
｢無計啦，可能我地無乜緣啦，你最近同女友點呀？｣
｢換咗啦，唔講啦返緊工，遲下再傾啦。｣
｢OK~｣
 
至少，在小文心中，我仍是特別的一個。