【大學故】《上到大學，原來真係會咩都唔同曬》: 十三
(十三)
*小熙視覺
自從上次我主動勾引呀賢之後，我地既感情好似更加穩定。
只係我繼續忙到仆街既生活，而呀賢都因為學校野同籃球比賽不停練波。
我連同一間學校既嘉浩都見唔到幾多次，所以我同呀賢基本上一個月都係見得三四次。
另一邊，雪琪都有keep住日日同我whatsapp，佢有表示過覺得嘉浩最近對佢特別好，以前唔肯陪雪琪行街食譚仔既嘉浩而家全部都會做。
我當然知係Ceci單野既影響，但我又唔可以同雪琪講，唯有講啲咩「佢不嬲錫你既，之前冇做出面姐」既說話敷衍雪琪。
「今晚我地組re u，你黎唔黎？」上上下堂收到呀賢既whatsapp。
「唔去喇，我今晚要開會」 望一望寫到滿曬既 schedule我歎左一口氣。
我知呀賢想見我，我又何嘗唔係好掛住佢，但我真係忙到覺到冇得訓咁濟，只好拒絕呀賢既邀請。
「哦。」
望住呀賢呢個回覆，真係無名火起。
識我既朋友都知我最憎人哦我，於是本來諗住氹返呀賢既我果斷已讀不回，而呀賢個日下午都冇再搵我。
其實我都知呀賢都係一時意氣先會咁回我，但我又唔肯搵佢先，搞到成晚開會既時候都好心不在焉。直到夜晚十一點幾，我收到雪琪既奪命追魂call。
「喂，雪琪，你搵我咩事啊？我咪同左你講今晚個會開到一兩點囉！」終於打到第十幾次，我電話震到我已經無視唔到之時，我先拎起電話好唔好意思咁望住主席們走出會議室。
「陳俊賢醉撚左當左我係你啊屌，我搞佢唔掂又無佢鎖鑰。」雪琪焦躁既聲音加埋嘈雜既背景音樂，唔難估到佢地下場係去左飲酒。
我隨即講「但我要開會啊，我whatsapp地址你，你送佢返去喇！」
「我都醉醉地點送你條仔啊？佢... 啊！！！」雪琪未講完，又突然間傳出佢既尖叫聲同玻璃打爛既聲音。
我不禁緊張上黎，問「喂？搞乜啊？」
「李穎熙，你快啲黎。」係我未開聲拒絕之制，雪琪已經cut左我線。
因為擔心呀賢既心情已經大於一切，我知我再夾硬開會都會心不在焉，於是我交代左聲又9up左個大話咩呀婆入院個啲籍口就飛的士落太子間酒吧，而我都好醒目咁叫埋嘉浩一齊去。
「我係屋企出黎要耐啲，你要等我一陣。」睇完嘉浩whatsapp，我就收返埋電話。
根據雪琪send比我既whatsapp地址，半個鐘後就到左酒吧，好快已經搵到呀賢個堆人。
我一去到，只見呀賢面到紅曬咁抱住左雪琪，而雪琪醉醺醺咁傻笑。一睇就知佢兩個都飲大左，於是我嘆口氣就上前同其他人打招呼。
「你好啊，我係黎接呀賢架。」
「你係⋯... 邊位啊？呀賢有女朋友架喇！」一個男仔好大聲咁講，我未黎得切答話，另一個mk妹應該就係呀賢口中既yuki又話「係啊！佢咪攬住左佢女朋友囉，你見唔到咩？」
我好無奈咁反左下白眼，然後笑住回應「其實呀賢女朋友係我。」
點知其他人既反應都好一致，好驚訝咁望住我。
「佢兩個成日一齊行架喎。」
「佢兩個都冇否應過既⋯⋯」
其中個條mk yuki既反應最大「下？頭先佢兩個先咀完，你係咪呀賢隻兵想做第三者拆散人地呀？」
我屌你老未。
我心入邊已經開始好燥底，我專登唔開會搭的士過黎，竟然得到呢個下場。
我冇出聲，然後將手機上同呀賢既合照比佢地睇。
「okay? 我可以接佢走未？」我好唔耐煩咁問，腦袋中一直浮現佢地講既呀賢雪琪係情侶既說法，雖然我覺得無可能，但令成組人都誤會而佢地唔否認既做法，令我好介意。
「係，唔... 唔好意思」之前開聲個個男仔，應該係組爸既角色即刻開口同我道歉。
我笑左下咁走左埋去，捉住呀賢手臂搖左幾下，呀賢慢慢咁開眼望一望我。然後毫無反應咁又合返眼，但今次就放開左雪琪。
冇幾耐嘉浩到左之後，我都扶起呀賢同其他人打聲招呼就走。雖然理智話我知只係誤會，但心入邊既懷疑不停擴大。
而上到的士之後，陳俊賢竟然好輕聲咁講左一句「雪... 雪琪...」
令我好驚訝咁反應唔切，一陣鼻酸已經直湧上黎。
⋯呀賢同雪琪... 應該唔會真係暪住我同嘉浩一齊左掛？
「雪... 雪琪...」
凌晨一點半。
我望住訓係我隔離既呀賢，個腦不斷諗起呢幾個鐘之內所發生既事。
一切都黎得太突然。
我知道陳俊賢真係好愛我，而我都知道雪琪好愛嘉浩。
一個我男朋友，一個我好朋友，佢地一定唔會做出對我唔住既事架。
只不過... 點解佢地任由其他人誤會都唔解釋？岩岩係的士個陣呀賢點解又會叫住雪琪個名？
我好亂。
我唔想再諗。
或者... 佢地係費事煩所以先唔解釋姐，又可能係呀賢好醉所以先以為送佢番屋企個個係雪琪唔係我。
呀賢同雪琪... 唔會背叛我既。
「陳俊賢今朝係地鐵站口仆親，手肘都撞到損撚埋，笑死我」
自從上次件事之後，我同雪琪既相處都好似平時咁。雖然雪琪既態度都無咩變，但唯一奇怪既係佢係咁講呀賢啲野俾我知，令到我有啲唔知想點。
「佢唔同我講既？」我覆雪琪，同時撳入呀賢對話諗住wtsapp佢。
「知妳實擔心到死！我一早幫佢痴左膠布啦，放心啦傻仔，有程雪琪係度，你男朋友一定好安全，哈哈！」
痴膠布？做咩雪琪要幫佢啊？呀賢自己黎都得啦！
「小事費事妳擔心啊嘛，我無事啊」我望一望電話，原來呀賢都覆左我「咁耐無見，不如等陣你放左學我地去睇戲啊，你咪話想睇紀念日既。」
「好呀」望住呢個wtsapp，我將岩岩既擔心已經一掃而空。
「小熙，等陣lunch食咩好啊？」坐我隔離既呀朗細細聲問我。
因為個期keep住要練舞，差唔多每日既lunch都係同呀朗一齊食。到依家已經變到好似習慣咁。
「sorry啊呀朗，我今日唔陪你食啦，我等陣約左男朋友」我尷尬咁笑左一笑。
「咁妳今日唔練舞啦？」呀朗問
「係喎！完全唔記得左添，咁...」我好失望咁望一望個電話，想同呀賢講，但係一方面又好掛住佢好想見到佢。
「一係妳今日陪男朋友啦，咪當休息下囉，你呢排咁chur」呀朗好似睇穿左我內心既糾結「但係後日一定要出現架，我地又就黎有比賽啦」佢叮囑我。
「喂bb我到左啦，你係邊呀」我係朗豪坊戲院打俾呀賢
「我行緊上黎啊！」
過左大概三分鐘我就見到個著住對純白air max既男仔跑過黎。
「sorry呀bb，遲左少少」呀賢一黎到就即刻拖住我「行啦」
雖然話葉念琛啲戲全部都係啲千篇一律既港產愛情片，但我原來套套都有睇咁濟。
之前個啲十分愛我的最愛我都無睇到喊，但係呢套紀念日唔知點解我喊到眼都腫咁濟。
「傻妹黎，喊到咁」出到黎呀賢一路笑一路拖住我
「咁係呀嘛，岩岩唐寧拍片個度好慘啊，跟住stephy同方力申鬧交個度又係講野好hurt對方喎」
「係啦係啦」呀賢摸左我個頭一下「我地十年之後都會好似依家咁sweet，唔會好似佢地咁鬧離婚既」佢笑左一笑
呀賢真係好了解我。
「我肚餓呀」我話
「去食野呀，想食咩？」
「爭鮮！」
「你同雪琪真係專一到死」呀賢話「一個譚仔一個爭鮮，係咪食極都唔厭架」
點解陳俊賢要無啦啦講起雪琪啊
「係呀，所以到八十歲你地都係會俾我逼去食爭鮮！」
「妳兩個真係好朋友，講野都一樣」呀賢忍唔住笑左出黎「上次雪琪又係話一日譚仔終身譚仔」
雪琪前雪琪後，做咩姐依家...
係我面前係咁講第二個女仔，陳俊賢你係咪玩野啊？
佢地... 係咪真係行得好埋？
「做咩啊小熙，唔舒服啊？」呀賢見我有啲呆濟加黑面，於是就咁問我
「唔... 唔係呀，喊完有啲攰，同埋肚餓咋嘛」我話
「咁我地快啲去食野啦」佢拖住我行去爭鮮既方向。