(二十一)
*嘉浩視覺


「小熙啊,你話粉紅色定tiffany blue靚啲啊?」雪琪走過黎叫小熙。

「你兩隻色都咁鍾意,我覺得都ok啊」小熙好緊張咁答完雪琪,然後又行番去呀賢個度。

「但我兩個都好鍾意啊點算」雪琪望住手上面個兩個同款唔同色既保暖瓶。



「鍾意咪兩個買曬囉」我係後面攬住雪琪。

「傻架咩,呢啲野買咁多個做咩」雪琪笑左一笑「我都係醒起我用開嗰個爛左先順便買咋嘛」

「算啦都係,睇左啲緊要野先」雪琪放低手上個兩個保暖瓶然後另轉好興奮咁同小熙講「李穎熙我地去睇泳衣囉!」

「喂好喎!」小熙都好興奮咁和應。


雖然我好期待等陣雪琪試泳衣個陣叫我入去幫眼嗰一個moment,但呢刻我剩係feel到個心跳得好快,係前所未有咁緊張既快。



我同呀賢既視線不約而同咁對上左,而呀賢都知道我擔心緊啲乜。

「不如... 泳衣遲啲先睇啦」呀賢話

「點解啊?」雪琪問

「好肚餓啊,你知啦你地啲女仔睇衫揀野有排架嘛,我同嘉浩應該會餓死左」

「係囉,食左野先啦,等陣可以慢慢睇啊嘛」我狗衝附和呀賢



而小熙都應該睇到呀賢既眼色,所以都幫口「呀... 咁食左野先啦,我都有啲想食野」

「好啦咁我地食左野先啦,你地想食咩啊?」我地你一句我一句,最後雪琪都無懷疑咁話好。

之後我地求其去左間茶記度食野,而雪琪同小熙就瘋狂傾買衫買化妝品,我同呀賢都係講番啲男仔野。

食完野都就黎三點幾四點,於是我地就諗住番番岩先個商場睇野,就係呢個時候迎面見到我地最唔想見到既人。

無錯,就係ceci,呢個時候我心諗今次仆街了。

呀賢都同我一樣見到ceci,而小熙就同雪琪睇緊ig所以無望到。

但如果我依家無啦啦掉頭走既話實引起懷疑,而小熙係有咩都擺曬上塊面度,到時雪琪一定會知有野。



我同呀賢唯有硬住頭皮同ceci迎面相遇,而我個心一直求神拜佛佢唔好亂鳩講野。

我開始唔明點解啲男人仲要出去偷食,原來真係會乜柒都驚一餐,我驚我遲早都搞到自己精神錯亂。


「咦,嘉浩,咁岩既」但出奇地,ceci行過我隔離個陣只係對住我笑左一笑,然後打左個招呼。

「err... hi」我一時反應唔黎,只好同佢講左聲hi。呢個時候雪琪同小熙都另左過黎。

「行街?」ceci懶自然咁講

「係... 係啊」我承認我仲係好緊張

「我地趕時間,走先啦,byebye」ceci對住我地四個都好(偽)友善咁笑左一笑,然後就同佢隔離個個同佢一樣係偽abc既女仔走左。



「邊個黎架」雪琪問我

「之前ocamp同組既」我保持鎮定咁講

「好靚女呀佢」雪琪另轉望住ceci既背影「嘩如果我係男仔我實媾佢一獲!」


睇黎雪琪無懷疑,不過... 個心硬係好唔舒服。


「吱~」

『你女朋友都幾靚喎,原來你鍾意大波妹既』

我一睇到呢個msg真係眼都突埋,即刻九秒九del msg。




「bb!行啦!」雪琪係前面走番過黎然後一手撓住我隻手。



「嘉浩啊,黎緊ocamp我想搵你做組爸啊。」同雪琪佢地去完旅行番黎無幾耐,呢一日我收到我地組爸呀峰既wtsapp。

「ocamp係幾時?」

「八月尾,你ok?」

「ok啊」

「但時間有啲趕,我地又book唔到房開會」呀峰繼續輸入「其他人又夾唔到地方,所以我諗緊skype開會o唔ok」



「不如上黎我度啦,我ok啊。」因為我就住係學校附近,所以我先無住hall。

「真係?會唔會唔係咁方便啊?」

「唔會,我屋企平時都唔會有人」的確,我呀爸呀媽呢幾日都係去左旅行,而我個妹就成日蒲街去佢啲男朋友度訓,所以我屋企長期得我。亦都因為咁所以我成日都會叫雪琪上黎訓。


「咁好啊,麻煩曬你啦」

「咁組媽係邊個啊?」我問

「我問左小熙啊,我諗住你兩個fd啊嘛,應該易啲夾」

「ok無問題,你約好時間再話我知」

覆完組爸峰,我就準備落街拎錢俾我個好細妹。


「呀哥!你依家係咪屋企啊!!」

「咩事啊?」

「借住二千黎先啊!!」

「借咩啊借,妳『借』左我十萬九千七仲未還,唔好成日美化你既搶錢行為啦」我邊講邊打開銀包睇下有無咁多銀係身。

「快啲啦,救命用架!」佢好心急咁講

「今次又救啊pandora妹妹定係salad姐姐啊?」

「嘩呀哥你咁醒既,不過今次係chanelbb」藍詠兒對住個電話發癲。

「我依家落黎啦,巴士站等啦死港女」

「yeah!都話呀哥最好!」



我個妹藍詠兒,正中港女黎,無名牌不歡,成日都著到偽韓妹咁出去媾仔。

真係好慶幸雪琪唔係咁。

其實詠兒變到咁,都應該同我有關。

媾到雪琪之前,我都係成日出去玩去媾女既人黎。其實如果個陣未玩夠既話,我諗我連的起心肝讀書既心都無,更加唔好話入u,仲要讀psycho。

詠兒之前好乖,名列前茅。但係唔知係咪見到我成日出去拍拖送野俾啲女之後,升到F4後佢就開始學下打扮。

本身樣唔差既佢當然媾到唔少仔,又真係俾佢冧到好多男仔送野俾佢,搞到買名牌買上癮,有病咁款。結果最後應該沉迷左呢個感覺,搞到墮落曬。

就連雪琪都知佢成日濃妝,上次成袋化妝品拎俾佢。

我呀爸呀媽係好開通個啲人黎,無話一定要仔女入大學,佢地話最緊要自己揀完條路唔好後悔,同埋最緊要係自己想去做喎。

所以佢地一直無鬧過反叛期既我同詠兒,不過佢地都會關心我地,所以我同詠兒由細到大都好鍾意我地既父母。

又或者佢地想我地自己體會然後成長。

不過藍詠兒,妳幾時先會醒覺唉。


「嘉浩啊... 我岩岩諗住問小熙,但原來一個錯手問左ceci啊,佢又話ok,你ok啊嘛?」

我心諗,可以唔ok咩。

「我無所謂啊,可唔可以叫埋小熙幫手?始終同佢夾開,做野應該爽手啲」

「ok無問題(笑喊)」佢繼續輸入「如無意外後日會開一次會先,你得閒?」

「ok啊」


「藍嘉浩!」一聽把聲就知係藍詠兒

「我好歹都係你呀哥,可唔可以禮貌番少少先?」我一手巢亂佢個頭

「頂你!我岩岩做完treatment啊,咪搞啦!」

「喂係啊,後日你唔好番黎啦」我將個兩千遞俾佢

「哦你又約雪琪番黎啪啪啪,係咪!!」佢一手拎過個兩千然後求其塞落袋。

「啪妳個頭,開會啊我,仲有洗唔洗俾支咪妳開心宣揚我既私生活?」呢個妹真係世界級,不得了。

「得架啦,我唔單止全日唔係屋企,我個晚唔番黎訓架啦」佢笑住咁講「我走啦,今晚等我食野啊!俾人甩底」

「妳搵chanelbb陪妳食啦,我約左雪琪,係咁啦」我諗住轉身走。

「搞錯啊」詠兒已經準備碌電話搵佢啲fd。


你話我唔擔心個妹既安全,由得佢自己出去同班『fd』玩通頂?藍詠兒同我一樣由細學跆拳道學到大,酒量仲好過我,你話我仲洗咪驚?


「吱~」「吱~」

「嘉浩,小熙話佢ok啊」係組爸峰

「後日又見啦我地」呢個,係ceci