《米米蓮的100個揭尾故合集》: 《四方城》謎底

《四方城》

謎底：

由前段故事內容開始…

我細個成日去我外婆屋企玩，佢份人怪怪地既，屋企仲好陰森恐佈…

不過雖然佢個人怪，住又住得怪，但係佢職業都幾專業架，佢係一個人手製作麻雀既技師…





佢屋企有一個好神秘既房，成日叫我千祈唔好入去，不過…

百厭既我又點會聽晒佢支笛丫，我曾經有一次偷睇過婆婆入去，又有一次親身偷偷地入過去…

裡面有張好怪既麻雀檯，一百四十四隻麻雀排好晒喺四邊，不過檯中間係空心既…

嗰陣我仲以為係電動麻雀檯，中間部份仲未整好，但後期發覺原來外婆唔會整電動既野。

我偷睇外婆嗰次，見到佢一個人喺度自言自語，嗰陣我仲估佢係好似我地細個玩機械人咁，自己同自己玩緊啫。





近排，外婆終於要走喇，留低既…

只有一本「麻雀使用手冊」。

我打開一睇，問左我阿媽一句︰「咩黎架？」

「睇過…哦，你公公呀。」

「我公公！？」





我再望一望「麻雀使用手冊」，個心寒到腳都軟埋，跪左喺地下度，因為…

「麻雀使用手冊」只係一個掩飾黎，其實裡面都係人名，我…意識到一樣野…

外婆並唔係「自言自語」，而係同祖先傾緊計，嗰一百四十四隻既「麻雀」，係祖先既神主牌黎。

而且，當日我仲…

好似外婆咁，喺麻雀檯中間瓹上去，之後，我仲…

我…

丫！對唔住呀！求下你地！求下你地丫！唔好怪我！唔好怪我呀！南無阿彌陀佛﹑南無阿彌陀佛﹑南無阿彌陀佛…

(一切可怕既事情，就由主角意識到自己當日對祖先神主牌既所作所為開始)





(完)