《台灣個表妹嚟咗我屋企住》【完】: (三十四)背影

好快就經已到咗夜晚，同班同學燒完嘢食，仲玩咗好多遊戲，而玩到時候都已經唔早，大家先準備離開軒少屋企。

當我去埋個廁所諗住同小南走嘅時候，軒少就喺廁所門口等緊我。

「乜你唔洗送佢哋出去咩？」我問。

「佢哋識出去搭車㗎啦，只係⋯⋯我想講返我頭先同你講嘅嘢。」一講呢個話題，氣氛就因為咁嚴肅起嚟。

「唔使講⋯⋯」





「你知唔知點解佢今日冇嚟呀？」

「因為佢驚見到我囉。」我好冷淡咁講。

「係你唔想面對佢咋。」軒少好重語氣咁話。「明明我哋三個係朋友嚟㗎，做咩搞成咁？」

「你問佢就知。」

「佢想同你講對唔住㗎。」





「可能太遲啦。」我行出門口，然後擰轉頭同佢講：「點都好，好多謝你今日請我嚟燒嘢食，我同你永遠都係死黨，但係⋯佢唔係。」

「喂喂⋯⋯」

之後我就同小南離開咗軒少屋企，行咗出去搭車，一路上小南依然係滿面笑容，睇嚟係因為聽到我唔少嘅搞笑事。

而我就低頭沉思緊頭先軒少所講嘅嘢⋯⋯

「係你唔想面對佢咋。」





冇錯⋯⋯我的確唔想，因為唔知點面對佢，面對住一個傷害過自己嘅人，我可以點？我真係唔知道。

「做咩呀星星表哥？依家調轉頭變咗你神不守舍嘅？」小南問。

嚟嘅時候小南帶住疑問，走嘅時候就變成我有疑問。

「嗯，今日玩得太攰啫。」我頹住咁話。

「咁我哋快啲返屋企瞓覺啦！」但小南仍然精力充沛。

當我哋行到出去大街嘅時候，就見到有架巴士啱啱好埋站，我班同學已經上緊車，而我哋同架巴士仲有一段距離。

「表哥！快啲跑啦，架車走㗎喇！」小南一見到架車，就二話不說立即拖住我跑，而我都好自然畀佢拉住咁跑。

望著小南嘅背影，令我諗起嘅唔係朱自清，而係喺度諗如果係小南咁冇機心咁單純嘅人畀朋友出賣，唔知道佢仲會唔會原諒佢嘅朋友呢？