第二日嘅夜晚,我喺一間冇咩人嘅m記坐低。

我嚟呢度唔係為咗食嘢,只係為咗見一個人,而冇幾耐嗰個人就嚟到。

瘦削嘅身型,有啲毒嘅樣,原來同我想像中依然差別不大,佢孭住一個黑色書包慢慢步近我⋯⋯

「好耐冇見,星爺。」

「嗯⋯⋯好耐冇見,阿榮。」





估唔到見返佢會係咁老套嘅開場白。

阿榮坐喺我對面,然後喺書包度拎咗一隻碟畀我。

「嗱!呢個係我上個禮拜去日本買畀你嘅手信嚟㗎,同時算係道歉禮物啦。」

眼見枱面嗰隻碟封面寫住“女教師之日常”。

呢條友仔⋯⋯算佢有我心啦,知我鍾意呢個明星。





「咁⋯好啦,我勉為其難收咗佢囉。」我扮到唔係好情願咁。

「收咗嘅話,以前嘅嘢就一筆勾銷㗎啦。」阿榮原來一早計劃好哂。

既然阿榮都咁大方,咁我更加要收喇。

「嗯!一筆勾銷。」我話。

「你真係原諒我?」阿榮似乎唔太相信。





「係呀,屌你!咪咁婆媽啦,何況⋯⋯我都有做錯。」

「哈哈⋯⋯咁就好啦。」

反正當年嘅事都過咗咁耐,依家再提返嚟都無謂啦,只要我肯願意原諒,咁就一定原諒得到,況且阿榮都向我道咗歉,所有嘢都係時候放低,真正嘅朋友真係冇隔夜仇。

「sorry,上次軒少屋企燒嘢食冇嚟,因為嗰日有嘢做⋯」

「唔緊要啦,你冇口福啫。」

「搵日出嚟,我哋三兄弟再聚過。」

「好呀!但係你畢咗業之後,諗住做咩?」

「我?諗住讀副學士囉,唔夠分呀,諗住讀多幾年讀上去⋯⋯咁你呢?」





「我打算repeat中六呀。」

「repeat?咦⋯我記得上年中五好似好多靚女喎⋯⋯」

一講起女呢個話題,我同阿榮都變咗專家進行學術性討論。

喺m記嗰晚同阿榮吹咗好耐水,將好耐冇講過嘅嘢一次過講哂出嚟,講到唔捨得走咁滯。

但最後都要走㗎啦,於是我就同佢講好咗搵日再約,而臨走前佢都不忘提醒我要帶走個位“女教師”。