《台灣個表妹嚟咗我屋企住》【完】: (五十一)打情罵俏

我另一隻空出嚟嘅手，就可以用嚟食爆谷。

一邊食爆谷，一邊又食波餅。

「咦⋯冇聲嘅？」小南嘅雙眼仍然唔敢直視螢幕。

「嗰個電鋸佬未嚟呀。」我輕鬆咁話。

「做完未㗎⋯咁耐嘅？」





「就快㗎啦，等個電鋸佬死埋先啦。」

「佢出現嗰陣叫我喎⋯等我有定心理準備⋯」

「得啦得啦。」我望向縮埋一舊嘅小南，見到佢嘅驚青嘅樣，真係令人哭笑不得。

見仲未有啲驚嚇位出現，悶悶地⋯我就諗住調戲下佢。

於是我就壓沉把聲，扮到有啲驚慌咁同小南講：「喂⋯表妹⋯佢嚟喇⋯」





小南沉默起嚟，連少少聲音都冇發出。

砰砰！砰砰！

我特登用力跺地，又再嚇一嚇佢。

「佢嚟喇！」我話。

「呀！」而佢就有好大反應。





小南知道我專登整蠱佢，就嬲嬲地咁望住我，然後不停咁打我手臂。

「衰人表哥呀！」

「嘩，做咩打我喎⋯」

「你嚇我！」

「邊有啫⋯」

「哼⋯」

佢哼完一聲之後又繼續拎我隻手臂嚟發發洩。

陰公⋯早知唔帶佢嚟睇鬼片，搞到自己添。





過咗好耐，套漫長嘅鬼片終於都播完。

呢個畫面有啲似曾相識喎⋯⋯

我記得有一次我帶小南去迪士尼玩都係咁樣，只係當時同依家嘅角色調換咗。

冇諗過小南唔驚過山車，反而驚睇鬼片，我仲以為佢好大膽添，原來同我差唔多細膽。

之後，我就同小南一齊步出戲院，走到人來人往嘅大街上，見到佢面都青哂，令我都有啲過意唔去。

「衰人呀⋯唔睬你呀！」小南嬲爆爆咁翹住手咁行咗走。

「喂⋯」我就加快腳步追上佢嘅步伐。「表哥哄返囉，我錯我錯，我唔應該帶你睇鬼片。」





「哼⋯」小南無視我繼續行。

「喂呀⋯」

好啦⋯又要迫我出殺手鐧！

「我依家帶你去你頭先講嗰個地方，食嘢呀！」

雖然小南一開始無動於衷，但過咗一陣後，佢就回應返我。

「我有冇行錯路呀？」

「哈哈⋯我都知我嘅表妹唔會咁小氣嘅。」

「唉呀⋯你呀！我真係有嬲㗎！」





「唔好嬲住先啦，你真係有行錯路呀。」

「咁你仲唔帶我行？」

「ok！follow me！」我拉一拉小南，示意佢跟住我行。

喺拉住佢嘅同時，我仲留意到佢偷偷流露出靦腆嘅甜笑⋯⋯

呢種心動嘅感覺又第一日見到佢開始好似變得越嚟越強，我係咪鍾意咗小南呢⋯⋯