「問咩呀?」

「我⋯」

問唔問好呢?我好想搞清楚到底小南日記上所寫嘅田川係咩意思,但我一咁問,就即係代表我偷睇佢本日記,咁嘅話佢唔嬲我就假。

有時有啲嘢,唔太清楚都好嘅,起碼唔使擔心個結果令自己難受。

我冇問到佢嗰樣嘢,反而問咗另一個問題。





「我想問⋯⋯其實你最鍾意食啲咩㗎?」

「我鍾意食啲咩?諗下先⋯⋯」小南好認真咁去諗,然後笑住咁答我:「秘⋯密。」

「秘密?食得㗎?」我只係心入面諗而冇講出嚟。

不過連鍾意食啲乜嘢都要講秘密,我真係睇唔穿呢個表妹到底係咪玩鳩緊我。

咁當然我有好冷靜咁追問落去:「秘密?咁即係咩意思呀?」





「秘密就梗係唔講得㗎啦,除非⋯」小南又再一次神神祕祕咁,好古惑咁望住我。「除非你用一個秘密同我交換呢個秘密啦!」

交換秘密?

「吓⋯咁簡單咋?」

「咁你講先啦!」

表妹連最愛嘅食物都可以當秘密,咁我都得啦。





「唔⋯⋯等我諗諗先。」我話。

其實突然問起我最鍾意食咩,呢個都算係一個難題,因為我只有辣嘢唔食之外,都冇咩嘢唔會食㗎啦,但講到最鍾意,都係媽媽親手煮嘅餸菜⋯⋯簡單嘅粗茶淡飯,只要係媽媽煮嘅,我就好滿足。

而如今小南係唯一一個人令我可以喺一餐住家飯中,尋回嗰種充滿思憶嘅味道。

於是我就施施然將呢個秘密告知小南:「我嘅秘密就係⋯⋯最鍾意你⋯⋯」

小南聽到一半,塊面就立即紅卜卜。

「煮畀我食嘅飯菜。」我話。

唉⋯大獲!我講嘢嘅速度似乎太慢,係咪搞到小南會有誤會呢⋯早知講說話就唔好咁吞吞吐吐啦。

「哎⋯係咩?原來⋯你咁鍾意食。」小南話。





「咁真係好好食嘛。」

「咁識哄人㗎你⋯嘻⋯好啦!咁到我講啦。」

「嗯嗯⋯」

「我最鍾意食嘅嘢⋯⋯就係燴番薯。」

燴番薯?唔係啩?小南竟然鍾意食燴番薯?

「嘩哈哈哈哈⋯⋯」我實在忍唔住捧腹大笑起嚟。

「喂⋯笑咩啫?好好笑咩?」小南話我。





「咁真係幾好笑呀嘛!我以為我阿婆嗰啲老人家先鍾意食呢啲咁老餅嘅嘢咋⋯原來表妹你⋯哈哈⋯」我繼續傻笑。

「哼!我就知道你會笑我,我先唔講咋,早知唔同你交換秘密啦!衰人表哥!」小南略帶怒氣咁話。

「好⋯好⋯我唔笑囉⋯」我收起笑聲,雖然嘴角仍然向上揚。「表哥係好奇你點解鍾意食⋯燴番薯啫。」

「咁鍾意一樣嘢就梗係有原因啦⋯⋯」

冇錯係,鍾意一樣嘢一定會有一個原因。